賭王四房的何猷君和奚夢瑤為賭王添首個男孫，囝囝改名何廣燊（Ronaldo），早前才升呢做外婆的四太梁安琪，立即又升呢做嫲嫲，她更笑言變成了「嫲婆豆腐」，四太今晚7時多出現養和醫院採望乖孫，見到守候的記者，四太開心停步做訪問，全程笑到四萬咁口的她說：「多謝，多謝，真係好開心，諗唔到喜事重重，我自己都覺忽然間升級，變咗大家所講嘅『嫲婆』，我同好多朋友講會請你哋食麻婆豆腐餐。」
問到四太可是要日日來抱孫？她答：「由而家開始日日嚟抱吓個孫，好多謝大家，辛苦大家。」四太表示未想到會送甚麼給新抱：「未諗到，因為提早咗，商量吓啦，我未知要有乜送嘢畀BB同新抱，新抱同囡囡超盈又好，兩個同我傾偈，知道做媽咪唔係咁簡單，佢哋都捱過懷孕過程，我相信佢哋會好錫個BB。」
四太笑言會狂湊孫，她說：「我老嘛，我要退休。」是否左右手各抱一個乖孫？四太續說：「都得嘅，耕過田。BB幾磅？佢都足月。」下月賭王便生日，賭王抱孫非常開心，四太說：「你諗吓佢會唔會唔開心，梗係開心啦。」可會送大給孫仔？四太說：「你講咁嘅嘢，呢啲咁奢侈嘅梗係留番佢爹哋媽咪努力去做，我自己送乜畀新抱，我覺佢都好辛苦，我都要諗一諗，咁都要有秘密，唔公開。」可會是任填銀碼支票？她說：「佢講。」四太會過兩招給子女湊小朋友嗎？她即說：「而家唔同咗，我幫手玩，責任係佢哋，我哋係玩吓，佢哋做父母成熟咗，佢哋責任大咗」四太自爆開心到瞓唔着：「佢哋就緊張到瞓唔着，佢哋安排我陪入產房剪臍帶，以前生時，我全身麻醉，冇睇過，Mario（何猷君）覺得我可以重溫一吓，會更錫孫仔孫女，嘗試未做過嘅嘢。」四太未有透露新抱是半身麻醉、順產或是開刀生B，四太說：「呢樣留番Mario同你哋講。」她指新抱身體狀況很好，因為有過照顧超盈生女的經驗，所以都有準備了湯水給新抱。何家添男孫會派利是給員工嗎？四太說：「我冇諗到，大家一齊分享，將來遲啲嘅事，BB房仲整緊，都仲有少少嘢。」四太稱好後期先知新抱陀男孫：「好神秘，我後來知係男孫係開心，佢哋叫我去剪臍帶咪睇到。」四太爆料指不止流開心眼淚：「我震到貓王咁，多謝晒。」
採訪：張明
-----------------------------
|
鍾意就快D Share啦！
|
|
|