58歲的黃日華被視為絕世好男人，與太太梁潔華相愛逾40年，年前太太患上俗稱血癌的「急性骨髓性白血病」，黃日華一度停工照顧。他曾在微博冧爆留言：「願我身邊的女人永遠幸福快樂！家庭美滿，身體健康！」難怪連女兒黃芷晴都大讚爸爸浪漫又長情。
日前下午3點半，黃日華暫時撇低妻女，疑是與一齊踢明星足球隊的男友人食下午茶「吹水」。戴住黑色眼鏡的黃日華穿上藍色運動外套，身材和樣貌都keep得好好，拍得住其他「五虎」兄弟劉德華、苗僑偉咁英氣。黃日華離開茶餐廳後，與朋友繼續煲煙和傾偈，好似有講不盡的話題。他之後便乘坐七人車，到附近的手機店整電話，見他揀選了一輪電話殼，逗留大約15分鐘後離開。
黃日華近年主要返大陸發展，他在香港最後一部劇是在2015年拍攝HKTV劇《開腦儆探》，之後亦有接演劉德華主演的電影《拆彈專家》和《追龍》，但始終未有返回娘家無綫拍劇。
黃日華於1980年加入TVB，1983年與翁美玲主演《射鵰英雄傳》一炮而紅，其後與劉德華、梁朝偉、苗僑偉及湯鎮業合稱「五虎將」。不過黃日華曾在Now節目談到在TVB拍劇辛酸史︰「嗰陣凌晨3、4點收工，6點開工，一收工就衝入廁所霸位瞓。」結果捱到患肝炎，黃日華仍未有跟其他四虎往外闖，一心留在TVB，怎料在1987年傾續約時卻受盡委屈︰「當時主管竟然話我呢幾年冇貢獻，聽到我火都嚟，心諗，冇功都有勞啩，我只要求加幾千蚊，佢就話我好大想頭！」氣得黃日華拍枱拒續約，表示3年後約滿即走。
採訪、攝影：徐錦池
|
鍾意就快D Share啦！
|
|
|