【頭條獨家】新戲演夫妻夠默契 衛詩雅歎嬲林德信唔落
衛詩雅和林德信（Alex）最近在「香港亞洲電影節」開幕電影，以前「包山王」、攀石運動員黎志偉真人真事改編的《獅子山上》中，首度合演夫妻，雖然兩人第一次有大量感情戲，但出奇地有默契。詩雅大讚導演選角出色，縱然角色有婚外情，但因Alex有種魅力令人「嬲佢唔落」；而Alex就讚詩雅精湛演技，令他感動到流下男兒淚。撰文：杜淑霞 攝影：李維隆 髮型：Nikoo Chan(衛詩雅)、Negan Leung(林德信)@Hair Corner(CWB) 化妝：Kayte Fung(衛詩雅)、Aimie Cheung(林德信) 服裝：Lane Crawford(衛詩雅) 場地：R One Space(銅鑼灣)
詩雅和Alex雖然拍攝前未聽過黎志偉的故事，但知道後都大讚對方意志力好驚人，飾演對方角色的Alex感受更強烈，「我唔敢諗自己如果好似佢咁遇到交通意外，搞到半身不遂，可唔可以好似佢咁有毅力，去完全自己嘅夢想，但我都係比較正面諗嘢，呢個故仔係一個好好嘅訊息，話畀人聽遇到困難一定要夠正面。」
導演選角出色
講到初次合作，詩雅和Alex都覺得溝通得好好，Alex仲大讚「老婆」演出令他感動，「有場戲講我哋喺床度傾偈，佢講咗句『如果有下世，我唔會再揀你！』聽見真係好心酸，我都忍唔住好自然喊咗出嚟。」戲中演Alex太太的詩雅，明知他有外遇，依然為他生仔，仲不離不棄撐起成頭家，詩雅自問本身愛恨分明得多，「佢個角色，其實係個好自私嘅男人，佢無論愛情、家庭定事業，咩都係諗自己先，如果我係佢太太，發現有第三者就一定忍唔到，可能會帶埋個仔走都未定。不過導演選角好好，Alex有個特質就係做唔好嘅嘢，都嬲佢唔落，觀眾唔會憎咗佢。」問到現實中Alex會如何抉擇，他直言一定會揀番老婆，「唔鍾意就唔會結婚」仲話好鍾意小朋友，將來都想做老竇，但依家仲未搵到對象。
|
鍾意就快D Share啦！
|
|
|
