2019年11月27日星期三

【頭條獨家】主動送名牌包包陸浩明寵壞女友做「港女」 __,港女,陸浩明,

【頭條獨家】主動送名牌包包陸浩明寵壞女友做「港女」

有呢個暖男做男友，陳詩欣拖到實唔放。

好多人話靚仔冇本心，所以唔係靚仔陸浩明(6號)，但勝在對女友溫柔體貼就好有市場，6號好叻叻豬咁媾到個仙氣模特兒女友陳詩欣（Ayan)，當然鍚她鍚到燶，仲將女友寵成「港女」，主動送上名牌包包畀女友做生日禮物。

喺上周嘅一個悠閒下午，6號同現身銅鑼灣時代廣場一間C字品牌名店快閃買包包，記者直擊見6號早有準備，到場後便向職員展示已訂好的包包圖片，隨後即取貨，由6號埋單，好快就拖實一臉滿足，拎住戰利品嘅陳詩欣離開。所見6號送畀女友嘅黑色小手袋約值2萬蚊，因為方便放小量化妝品及手機出街，屬星級熱賣款，岑麗香、劉嘉玲等都係用家。

6號坦言係補送畀女友10月19日嘅生日小禮物：「因為之前我哋去咗葡萄牙旅行，加上嗰時工作好忙來不及買禮物，直至最近市道唔多好比較得閒，馬上訂貨再帶佢去拎貨。(唔係已請咗佢去生日旅行咩？)女人當然喜愛包包，佢鍾意呢個品牌，其實佢唔想我使咁多錢，成日叫我唔好買，咁一年都只得生日同情人節送禮物啫，冇所謂啦，我咁辛苦做嘢都係想佢舒服啫。而我生日時佢都有送返嘢畀我，不過係自製手工嘢居多，好似今年4月我生日時一齊去咗越南，佢帶埋DIY玻璃瓶禮物送我驚喜，除此之外，仲加馬送多部手機。基本上年年都會有生日trip，去年同佢去咗希臘，我哋Keep住甜。哈！好彩佢生日早過TVB台慶一個月，否則我唔做台慶都要陪佢過呀。」問到幾時送戒指時？6號則帶有暗示說：「咁就要留意我嘅社交網站啦，但我未搵到合適求婚指環。」