恭喜晒！
歌手菊梓喬在《2019年度勁歌金曲頒獎典禮》中狂掃六個大獎，大比數拋離只得三獎的師姐吳若希，更力壓對方得到大獎「最受歡迎女歌星」，菊梓喬冧莊連續兩年奪得此獎，令吳若希想重奪「星夢一姐」夢碎！
大前年吳若希因為突然生女而被師妹菊梓喬搶去一姐之位，兩人不和之說傳通街，有你無我！去年吳若希再戰樂壇，不斷努力出歌宣傳，力圖爭番星夢一姐之位，可惜最後都不成功，再次輸畀師妹菊梓喬，而吳若希更是連「最佳演繹女歌星」都輸埋畀菊梓喬！而菊梓喬領取「最受歡迎女歌星」獎時，台下的吳若希都有拍手，不過卻擰歪面同旁邊的胡鴻鈞傾偈，睇怕呢兩師姐妹仲有排鬥。
菊梓喬上台致辭時全程哽咽眼濕濕：「上年到今年發生好多事，做咗好多自己想做嘅嘢，例如開咗演唱會，又唱咗好多首好好嘅歌，多謝公司、老闆、音樂班底。」之後停頓了一會，開始想喊，表示要多謝粉絲：「如果唔係你哋，我有好多嘢都未必堅持到，希望以後一齊同行。」
而最後「勁歌金曲金獎」就由周柏豪的《讓愛高飛》奪得。全晚菊梓喬是大贏家，合共奪得6獎，其次是奪5獎的周柏豪。
來源 source: http://hk.on.cc
|
鍾意就快D Share啦！
|
|
|
