「2013年拎咗全港銀行Top Sales大獎，派咗去越南河內，去到後發現商機好大，直程覺得唔去就錯失機會，結果一返香港就辭職」性格急進的趙國傑（Luffy，每次一有idea便會博到盡，2013年他放棄年薪百萬的銀行工作，到深水埗買煮食用具，連配方也都練成，便到越南河內開雞蛋仔店，每月賺得1.5萬元，跟以往的高薪厚職比，差天共地，但他認為創業比打工更開心，輾轉之下轉行做越南地產中介，他笑言：「香港年輕人仲有冇希望？無論以前銀行界又好，大家都講同一番說話，但我覺得堅持做自己想做的事，先唔理有冇錢賺先，總會發揮到一條路。」
今年37歲的Luffy想法奇特，說話速度比一般人快，他形容自己性格及行為「癲癲哋」，一有想法便會去做，甚不符常規地去做：「好癲呀，好似做雞蛋仔，我都未有調好，就已經諗點喺越南搵靚舖位去租。」Luffy自小不是讀書料子，跟現在的進取心態相差很遠，他坦言中五重讀過3次，才考上預科班，但這個經歷令他知道時間有限。自從做事決心大增，甚至變得很急進。
任職銀行銷售保險時，曾連續3年成為Top Sales，取得全港大獎後，2013年獲公司委派往越南：「以前係去杜拜呢啲，到我就去越南，大家初期都唔認識呢個地方，怕治安唔好，點知我一去到，就覺得機會處處，一返香港就辭職諗住創業。」當時他在想，當地沒有便利店及房地產中介，是做「開荒牛」的最佳時機，結果他跟當時的越南籍女朋友Angela商議後，決定開雞蛋仔店，「我問佢越南有冇，之後再帶佢去試食，佢話好正，就決定去越南開啦，我未學識，已經諗租舖，好快租咗市中心一間舖，仲租埋屋，幾千蚊一個月就3房單位。」
他的雞蛋仔改名做「羅密歐」 ，格仔餅則改為「朱麗葉」做生招牌，結果不足半年就收回成本，但每月只賺1.5萬港元：「同以前份人工差好遠，但每日都做得好開心，因為做自己想做嘅嘢。」不過其後發生意外，他手掌受玻璃割傷，經歷兩次手術後才康復，結果要將越南店舖結業：「當時洗好多血，成架的士都係，入到醫院我以為就咁完啦，呢件事令我改變咗好多，以前拎咩Top Sales，賺幾多錢，全部都唔重要。」
回港後任職私人銀行數年，2016年再回越南創業，不過這次是開地產中介VHome：「越南終於開放畀外國人買樓，於是我就行動啦，我又係好急，乜都未準備好，已定好開講座嘅日期，逼自己快啲完成。」多年銀行經驗，令他找到出路：「當時香港借200萬，只係2厘息，但我放喺越南做定期有10厘息，中間賺到息差，每個月有萬零蚊使，喺越南好好用呀！」
除此之外，他13年開雞蛋做時，斥資百多萬買了一幅千呎越南地，目前已升值數倍：「以前收入唔錯，我11年就屯門置業投資，結果1年後就升咗好多，當時好多人又驚樓市大跌，仲問屯門有冇牛呀，慢慢買埋天水圍、深水埗，認定咗我房地產投資嘅路。」目前他的越南地會起一幢5層高的寫字樓，作共享辦工室之用。現時VHome總交易單位數超過400間，每月平均10至20間。他透露目前在越南持有近20個物業：「我自己都有份投資，先至叫到客人投資。」
Luffy曾經年薪百萬，看似起步較一般年輕人暢順，但他認同目前香港年青人向上流的機會較少，但並非完全沒希望：「而家啲樓同舖係被人買晒，置業係困難嘅，但每個人一開始都要努力打工，儲咗第一筆資金先，然後再堅持做自己想做嘅事，開頭唔好諗賺錢，慢慢係會成功，而且年輕人揀嘅路，上一輩人係唔會行，例如雞蛋仔，你叫我而家去做，我都唔會做，所以後生嘅仲有希望。」
記者：陳新政
影片：
採訪/ 陳新政
編撰/ 陳新政
攝影/ 細釗
剪接、後期/ 何文超
編導/ 何文超
編審/ 楊智佳
investMAN
For People of Style & Substance
掌握理財智慧 感受生活品味
http://investMAN.hk
-----------------------
屬於香港人的移民攻略
立即登入【全球樓行】
Dream House零距離
來源 source: http://hk.entertainment.appledaily.com
|
鍾意就快D Share啦！
|
|
|