新冠肺炎疫情蔓延，無綫新劇《踩過界II》幾大主要演員齊齊病倒「冧廠」，女主角之一嘅張曦雯（Kelly），早前亦唔舒服取消外景。不過，病咗幾日嘅Kelly好快好番，估計因為之前拍攝外景上山吹風，有少少感冒。
早前，趁住新正頭放假唔使開工，東姑仲跟埋Kelly，連同佢兩個好友徐肇平及靚女KOL朱韻韻，一齊去玄學家陳定幫嘅佛堂祈福。Kelly除咗求桃花運，仲順道拜埋財神及太歲。當日，三個人先喺佛堂誠心上香；然後，求桃花運嘅Kelly及朱韻韻，雙手合十順時針圍住桃花行咗三個圈。陳定幫師傅仲提示佢哋，要邊行邊諗住心目中期待實現嘅畫面；跟住，三人再喺小天燈上面寫低心願；隨即，掛上桃花樹，閉目許願。
東姑所見，Kelly喺小天燈上面，除咗許願身體健康、開心之外，重點希望「事業好成績」，睇嚟相當事業心重。佢講笑話：「我桃花OK夠，不過始終做呢行要多啲觀眾緣，男友反而唔多理，我哋好少見到面，唔好問我點算好，我都係想專注喺工作上，慶幸大家感情都叫穩定嘅。」
今年無綫嘅《萬千星輝頒獎禮》，Kelly先啱啱奪得「飛躍進步女演員獎」；睇嚟，佢已經好心急，想盡快乘勝追擊「升呢」做「視后」喇！
新年到佛堂求桃花運嘅張曦雯，笑言唔係為男友，而係求桃花運催旺觀眾緣，希望事業更上一層樓。
當日，張曦雯與好友徐肇平（左一）及KOL朱韻韻，結伴去到陳定幫師傅（右一）嘅佛堂，拜桃花增運。
張曦雯絞盡腦汁，喺小天燈上面，寫低佢嘅心願，希望願望成真。
來源 source: http://eastweek.my-magazine.me
|
鍾意就快D Share啦！
|
|
|
