【頭條獨家】被麥美恩爆洗衫密咗 馮盈盈：疫情下更珍惜媽媽
TVB因應新冠肺炎剛播完的特備節目《學是疫學非》令「是非精」麥美恩、馮盈盈、戴祖儀、劉穎鏇及何依婷汲取唔少抗疫知識。麥美恩更爆料指喺疫情下，馮盈盈𠵱家洗衫都洗密咗。盈盈就帶點唔好意思話，𠵱家會拎衫返屋企畀阿媽洗，因為住緊嗰度都冇洗衣機。當被問到內衣褲等貼身物品係咪交託阿媽代勞清洗時？她啞口無言，一臉尷尬道：「自己洗囉…咁唔係點啫…」搞到現場「是非精」喪笑，祖儀忍唔住取笑她：「好擔心你嫁唔出呀！」好搞笑。採訪：方騫平
藉着今次節目，各人都話得益良多，劉穎鏇學會自製酒精搓手液，何依婷就話，檢測下原來用酒精搓手液比梘液成效更好；麥美恩就呼籲唔好盲搶物資，唔係個個啱戴N95口罩，尤其呼吸唔正常唔好戴，平常人只要戴住外科口罩就OK；戴祖儀就提醒大家唔好用酒精噴口罩嚟殺菌，咁樣反而會破壞口罩結構。麥美恩最開心《學是學非》終可以成為十點半嘅節目，「是非精」人強馬壯，都想合作拍劇，笑言最好搵埋韓星元彬做男主角，戴祖儀就話：「聽聞古天樂同TVB仲有合約，我想揀古天樂呀。」盈盈拍手附和：「我哋同古天樂拍完嗰套劇，仲有電影拍𠻹呀！」
另外，麥美恩指盈盈以前隔幾日先洗一次衫，好污糟，𠵱家洗衫都洗密咗。盈盈即辯解：「如果冬天有底衫，冷衫着三次先洗有乜問題？着一次就拎去洗，件衫好快縮水，𠵱家驚自己洗得唔乾淨，所以呢方面交畀有經驗嘅媽媽洗，但絕對冇當阿媽係工人。(咁內衣褲呢？) 係…自己洗…我哋講下個話題喇…不嬲都知媽媽好嘅，𠵱個疫情更珍惜媽媽。」
來源 source: http://hd.stheadline.com
|
鍾意就快D Share啦！
|
|
|
