武漢肺炎疫情一直未被控制，香港不斷有新增確診個案，作為前線醫護，同醫護家人，都一齊承受風險同壓力。
江華大仔Bryan(陳耀淙)，是大埔那打素醫院的護士，早前他自願加入「Dirty team」，現仍等候安排。在這段非常時期，Bryan不想連累家人，每日收工返家，就躲在房間自我隔離，不與家人碰面接觸。作為前線醫護的家人，江華說見到兒子在醫院拚搏後，返家還承受這麼抑壓的封閉隔離，感到心痛。
江華說，兒子每日返家，如生人勿近一樣，要全家返入房迴避。「因為佢本身專業，所以會比較謹慎，例如放工返屋企之前，定會WhatsApp我哋，意思係叫我哋迴避，然後佢就會匿入房，唔會同我哋有任何正面對話、接觸。
因為都聽佢講過，醫護人手係極度短缺，工作以一對十，故好多時早班之後就要接夜班，返到屋企佢都已經大昏迷，到第二日又繼續返工。以前都仲會傾吓偈，但而家呢個情況，就算唔使返工，佢都唔會步出房。」
兒子情緒有否影嚮？「從常理去推斷，我估計佢嘅心情都唔會好，佢都係一個人，仲係一個年青人，心情一定唔會好。不過慶幸佢份人比較樂天，所以我哋相信佢可以應付到。」江華說。
Bryan將房間變成禁地，清潔打掃自己一手包辦，不容家人踏入房間半步。同一屋簷，卻一門之隔，父子這麼近，那麼遠，有次江華不忍之下犯兒子禁令，結果遭他趕出門外。
「我最初就覺得係咪需要咁樣呢？有一次我敲佢房門，然後開門，話而家經常咁樣，連傾偈機會都無，講咗幾句類似大概內容，跟住佢問我係咪真係唔怕死？係咪真係唔驚？然後趕我出去。」可想而知，當醫護的兒子，心理壓力不輕。
「我都要尊重佢，我覺得呢份係佢嘅工作，既然佢覺得需要咁樣做，我就惟有配合。最初做父母嘅當然會擔心，但從另一角度睇，知道佢做緊嘅工作，要付上乜嘢代價，好自然就要釋懷。」江華說。
不想增加醫護同兒子的負擔，江華盡公民責任，少出街，謝絕聚會，做好防疫。「我諗每個人都需要負起自己責任，就算我哋幫唔到手，至少都唔好添亂。」
Bryan曾經在社交網批評政府防疫措施做得差，由抗爭到抗疫，跟兒子立場不同的江華，在醫護裝備問題上，他選擇相信政府。
「我無問過佢有關政府唔夠裝備呢啲問題(記:點解唔問？)唔需要呀，我覺得醫院一定會供應口罩俾醫護，呢方面無需要置疑。首先我覺得係咪真係唔夠呢？其次如果真係唔夠，係咪有原因呢？定係有心人將事情放大？我會咁樣睇！無論咩嘢事都好，我覺得一個政府做每件事，都必然有佢嘅處事方法，或本身計劃。」
父子雖然政見不同，但他說因兩代互相包容想法，所以避過攬炒。
「我只會表達，即係只會話俾佢聽:『未必一定係咁樣嘅，可能會變成咁樣呢……』可能佢會話：『老竇，你唔好同我講呢啲啦，成日淨係話你見過嘅嘢，我未見過嘛，我就係最唔鍾意聽到你講呢句說話！』，然後我就唔會再講。
我作為一個父親嘅責任，會做一個表達讓你知道，但聽唔聽，你絕對有權選擇，我唔會強迫你，亦都迫唔到你，所以我唔會同佢有咩爭拗或者敵對。」難得共融的黃藍家庭。
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
|
鍾意就快D Share啦！
|
|
|
