森美父母檢疫報告呈陰性。
爆發新冠肺炎嘅郵輪「鑽石公主號」停泊於日本橫濱，14天隔離期已於昨天（19日）屆滿，乘客陸續下船。香港政府派出包機接載港人返港，首班包機有106名港人乘搭，並已於今早抵達香港國際機場。而森美尋日表示父母未攞到檢疫報告，所以未能跟隨第一班包機返港，而今早，佢喺電台節目就話父母喺凌晨12點幾終於攞到報告：「佢身邊啲朋友已經攞咗。原來佢哋係跟歲數，80歲以上、70歲以上，咁我阿爸阿媽60幾歲，所以冇咁快。」而結果係呈陰性，所以相信會今晚跟包機返港！
而返港後需要再隔離14日，即係總共加埋要隔離28日，森美就笑言有朋友Send啲隔離營嘅内部裝修資料佢睇，話環境似乎OK嘅！佢又透露父母喺船上只出過甲板放風一次，真係完全隔離咗14日！而依家終於可以落船，令佢都安心啲，因為最擔心喺船上愈耐感染機會愈大！
不過父母有啲同行朋友就希望留喺日本，但森美就覺得萬一有咩病唔係咁好，而且問過醫生朋友意見，覺得言語不通，同醫院或醫生溝通都有問題，「唔係咁樂觀」！
而森美亦向東網表示：「他們的檢驗結果呈陰性反應，將會乘搭下一班機今晚六點鐘回港，然後再接受14天隔離，多謝關心。」
來源 source: http://hk.on.cc
|
鍾意就快D Share啦！
|
|
|
