武漢肺炎全球大流行，大家都避免外遊，假日都選擇回歸大自然，人人行山抗疫，打卡P圖執到靚又點少得？肥變瘦、短變長、黑變白，個個變成大美人。日前鄧月平（Larine）到飛鵝山行山抗疫之餘，分享她不用P圖影靚相零死角的心得，Larine一拿起自拍器操作自如，她說：「其實影相唔好背光，但係若果真係背光，就影側面嘅輪廓，咁就得咗！4肢唔好貼近身體，因為會顯肥；影相嘅時候可以做伸懶腰，拉長手腳。」Larine更充當攝影師，示範用手機的廣角鏡功能，能夠將短腳變長腿。
Larine認為拍照是一門藝術，她愛以照片來傳遞訊息，愛靚相自然愛執相，不過P圖過火會出事，輕則遭人恥笑，更有機會被罵，那Larine又可有P圖鬼斧神工？她笑說：「其實我覺得P圖同唔P圖都OK嘅，有時P圖係會俾人鬧，我又覺得P得圖嘅，都係希望將自己最靚嗰一面展現畀你睇，我覺得管好自己先，唔好去鬧人，多啲傳達一啲正能量嘅嘢。我成日都P圖出事，可能我成日都好粗略，執完啲色會變晒，啲頭髮變彎。P圖係一個文化、一個潮流，P得靚都係一個技術。呢個世界好隨和，你想點做就點做，唔好太過care人哋眼光，個世界係你自己嘅。」
疫情下Larine的工作也受影響，原定到澳洲及沖繩拍攝節目要延遲出發，Larine會趁空閒行山抗疫，更會多陪伴家人增進感情，她說：「大家嘅工作、收入都減少咗好多，我覺得而家要裝備好自己，迎接疫情後嘅工作。疫情期間盡量都唔好去多人聚集嘅地方，可以去郊區抗疫，最近我都去咗郊區摘士多啤梨，健康活動。唔想出街就趁呢個時間喺屋企陪吓屋企人，香港比較忙碌，好多時候返工放工未必咁多時間，趁呢個時間同屋企人增進感情。希望疫情快啲過，全民復工。」
雖然暫時未能如期到外地，但Larine將成立自己的YouTube channel，亦會投入ViuTV的新劇拍攝，她說：「近期好多人都叫我開YouTube channel，睇吓日常生活嘅我係點，關於我嘅飲食、點樣整蠱人，仲會教大家整嘢食畀男朋友同屋企人，整畀心儀嘅人就整甜品，冧屋企人就可以煲湯。而新劇我都已經進入狀態，隨時ready。」問到希望接一個為自己度身訂做的劇本嗎？Larine說：「每個演員都想有呢個機會，我特別鍾情鬼片，有生之年一定要拍一部，同埋想談一次甜甜的戀愛，有籌備緊嘅監製不妨考慮吓小妹。至於真實方面，感情睇定啲先我係一個幾難追嘅女仔，物質唔會打動到我，我係睇時間考驗，喺呢段時間工作為先。」
採訪：羅慧敏
攝影：沈健程
攝錄：馮嘉銘、林賓尼
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|
