- 【《法證》女一守家居隔離】李施嬅勸勿做自私精:若你害死人 罪惡感會跟你一世
- 31分鐘前
隨著武漢肺炎在歐洲爆發，好多人返港避疫，接受強制家居隔離，但人性的自私，令近日香港發現多宗隔離者妄顧他人安危，隔離期間外出，感染個案大增。
《法證先峰IV》女主角李施嬅，日前從加拿大工作完返港，需接受家居隔離，李施嬅可能不屑太多自私精違反隔離令，佢今日拍咗長達數分鐘，名為「對於14天隔離的一些感想」的分享片，教育大家要緊守崗位，勿揀做千古罪人。
「只要有一個人未隔離完行出呢個門口，而且係有病，就會再影響成個社會，係一個惡性循環......原本香港一個月前有好轉，但因近日多咗人飛返嚟，又冇隔離，咁就散播咗一啲病毒，令到確診個案增加……希望大家真係要緊守自己崗位留在家，其實好多人陪你，大家坐埋一條船，我都係隔離緊，全世界好多人都做緊，你只要問自己五年之後，回望過去你想做一個感染千千萬萬嘅人，害死一啲人嘅罪人，定係好自豪地對自己講，當日我有緊守崗位，我留在家十四日，我無俾社會任何負擔，我同全世界行緊呢一條路，而我問心無愧，相信大家都想做後者，因為你揀做前者的話，罪惡感係會跟足你一世，所以希望大家同我一齊行呢條路，大家互相支持。」
片中佢分享一到香港機場後要填申報表嘅過程，又展示戴在手的隔離手帶及文件，其隔離日期至下月5日便屆滿。之後佢話:「普通感冒係一個人傳染俾1.3人，但呢個肺炎係一個可以傳俾三個人咁高，到嗰三個又傳俾三個，如此類推，去到第十層，你一個開始散播下，可以感染到五萬九千人，係一個好大數目，當然有好多人或會身亡，所以當我哋喺屋企覺得好悶時，覺得自己無乜症狀，但可能係喺潛伏期，若我哋帶病出咗呢個門口後感染到三個人，可能會害咗千千萬萬嘅人，所以真係唔好出街。」
李施嬅又建議十四日當中可以做啲咩消磨時間:「我知道喺香港隔離，地方細，係會有啲辛苦，但只要你諗下依家咁多醫護人員喺醫院搏鬥中，用緊佢哋嘅生命，健康去幫一啲已經受害嘅人，咁佢哋只係要求我哋乖乖留喺屋企十四日，我哋有得喺屋企，又可以叫外賣，有得煲劇，有得上網，其實都唔係咁難受，希望大家緊守自己健康同崗位。」早前另一個藝人熙琳(Hillary)於三月中去完日本拍攝旅遊節目返港，冇一盡公民責任，被踢爆家居隔離未滿十四日就外出試鏡，搞到製作公司及試鏡當日接觸者人心惶惶，姑勿論檢測結果最後呈陰性反應，但妄顧隔離嘅重要，自私行為確實不要得，正如李施嬅所講，你想揀做害死人嘅罪人，還是問心無愧，無帶俾社會負擔嘅盡責公民。
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
|
鍾意就快D Share啦！
|
|
|