唔可以多過4人～
歌神許冠傑（Sam）今日下午5時將於尖沙咀某商場，破天荒首度舉行全球網上演唱會《2020許冠傑同舟共濟Online Concert》，約下午12時，現場已有20多名記者、多名Fans在場等候歌神來臨。
未幾，約半小時後，身穿休閒服、Full Gear防疫裝上陣的Sam，戴齊Cap帽、黑超、粉紅色口罩，由4名保安、3名助手陪同之下現身，保安見到大批傳媒都有叫「讓開」，而Sam未有應記者要求停低影相及做訪問，邊行邊揮手打招呼、又舉V，非常親民！
受限聚令管制，見Sam只跟3位助手入餐廳包廂用膳，4名保安則行出餐廳門外守候。Sam大仔許懷欣稍後亦有份演出，他約於1時到達，雙手合十快步行入餐廳，未有發言。
Sam約一個半小時後離開餐廳去綵排，依舊由多名保安及助手護送。心情大好的他，一路行一路舉手指公又揮手，問到有何打氣說話跟香港人講？他大開金口送八字真言：「同舟共濟、開開心心！」問到可會期待演唱會？他興奮再舉手指公！至於會同大仔許懷欣合唱咩歌？他再說：「《Just a little》。（得一首？）仲有《半斤八兩》。（反應好會Encore？）預定唱一個鐘頭。」全程還有多名Fans跟隨，直至Sam坐上7人座駕，他仍隔住玻璃揮手講Bye Bye，座駕隨即直駛直播場地。
演唱會製作總監蕭潮順隨後到達，他透露演唱會歷時55至60分鐘，並笑言歌神「開倉」，歌曲數目由12首加碼至20首，會有個點歌環節，Sam一支結就唱到。問到之前失業的演唱會幕後功臣有參與？他說：「有1、2個由之前合作到依家。全部工作人員加埋有8至10個，到時大家會保持距離，睇到個畫面都會闊，冇可能有人掂到佢。」
問Sam有何防疫措施？蕭潮順說：「留番畀許太搞，佢都會嚟，Sam全日都會戴口罩，淨係唱歌嗰陣會除。」提到Sam過往開騷作風，都會走到觀眾席送肉嘴，蕭潮順笑指咀嘴留待真正開騷先，而原定於7月開騷已取消。
講到是次全球直播，蕭潮順謂下了不少功夫，希望網上平台能負荷瀏覽流量。問重播只限24小時？他指是Sam的意思：「佢從來開騷都唔出DVD，係佢嘅風格，佢亦尊重佢嘅偶像貓王，都係唔出錄影帶，24小時係就番全球嘅時差，係足夠嘅時間，唔會Miss到。」
來源 source: http://hk.on.cc
|
鍾意就快D Share啦！
|
|
|