高息藍籌股突然宣布暫停派息，嚇窒股民！
新冠肺炎疫情爆發至今，圍繞全球金融市場的壞消息不斷。企業違約已是等閒，高風險債券、槓桿ETF、房託基金出事，市場反應都不大，倒是周三(1日)傳來英滙豐控股(00005)應英國監管機構要求，暫停發放股息，震驚股民，皆因唔少股民都長坐滙豐收息過活，如今話去年第4季息取消、2020年度的中期息亦會欠奉，之後係點充滿不明朗因素，分分鐘近10厘年股息化為烏有，你話收息族聽到係咪「十級霹靂」？
今次滙豐被煞停派息，說明同樣係收息，將錢放在銀行同將錢買股收息，風險係好唔同，皆因更好的企業，原來可以因應情況話停派息就停派息，唔使太多理由。經過呢次教訓，大概好多股民認識呢個分別，只是代價實在不菲。
周三滙豐股價低位在39.8元，都仲有唔少股民問撈唔撈得貨，又話見40元關幾硬淨咁。筆者的看法是，依家市況咁差，班大戶小戶要沽滙豐，股價低開咗一浸，再沽都要邊托邊沽，免得大冧棚仲傷，所以40元關絕對唔係叫「硬淨」。有追開「股民熱話」專欄的，應該記得喺3月12日，帥哥就話過五大理由滙豐股價等見海嘯價(https://bit.ly/2URCvf1)，呢個睇法至今未有改變，股民有及時「安逃生」的，自然慶幸做咗滙豐的「EX-股東」，避過一劫！
如今筆者最擔心的，是滙豐被煞停派息，乃全球銀行業的重大不祥之兆！點解咁講？
全球經濟日差已是事實，歐、美疫情至今尚未受控，全球性的不景氣，最終一旦演變成大蕭條，對銀行業而言必然會是一場大災難！老實講，依家全球央行都在減息量寬放水，歐洲央行和英倫銀行大可加大放水力度，但偏偏要求銀行暫停派息保留現金以增強資本，此舉的一個負面效果，係影響市場對銀行股的信心，股價下跌蒸發資產，為禍可能仲深，但都要咁做，可能係考慮到量寬的空間限制和效應遞減，亦可能係預料到經濟仲有大鑊嘢跟尾，甚而會引發重大系統性風險，故還是促銀行自己暫停派息，直接保留現金應急。
無論點都好，筆者認為，當前宏觀經濟展望滿布陰霾，能見度低，銀行業既是百業之母，必然會首當其衝。更何況這些年，長期量寬所製造的資產泡沫，一旦爆破，對銀行業而言，已不只是經營困難的問題，而是一場生死存亡的淘汰賽。即使政府購買企業債或向企業注資救市，唔可能救到所有業者，最終唔少業主被「叮」走。這個風險，投資者實在不容低估。
派息暫停事少，本金安全事大。股民謹記有備無患，減槓桿、增持現金、分散風險，以平生最高的規格，做好風險管理，全球金融市場更大的超級風暴還在後頭！切莫自欺欺人，以為股價愈低愈溝，可以同佢鬥長命「望鄉」有期，一則閣下的生命無論多長都有盡頭，二則地球上沒有企業可保證會永生...
東網財經專欄作者 帥哥
－－－－－－
Sakura Japan專營日本房地產，大量日本一手及二手盤源；有移民服務，投資經營簽證，日本租務管理經驗，提供一條龍服務，立即查詢！
電話：6810 2200
WhatsApp聯絡：https://wa.me/85268102200
Sakura Global擁有大量海外一手項目盤源，豐富海外租務管理，移民服務經驗，立即查詢！
電話：5133 0626
WhatsApp聯絡：https://wa.me/85251330626
【仲等咩？】最強炒股神器《東網Money18》APP已全面升級，新增多項新功能，助你投資理財、揀股問股！即刻click入http://on.cc/redirect/money18下載安裝！
來源 source: http://hk.on.cc
|
鍾意就快D Share啦！
|
|
|
