2020年5月13日星期三

變身湊仔公林盛斌陪子女玩新娘拋花球 #林盛斌

變身湊仔公林盛斌陪子女玩新娘拋花球

阿Bob跟四子女在家中房間大玩結婚拋花球遊戲。

政府日前宣布各個年級於本月27日起分階段復課，不過距離復課仲有一段日子，林盛斌（Bob）嘅3女1子仲可以盡情玩樂，加上喺疫情下阿Bob冇咁忙，不時變身湊仔公，齊齊玩角色扮演，增加親子關係。昨晚阿Bob上載一條同仔女玩結婚拋花球短片，Bob留言：「玩到冇嘢好玩系列...... 個人好欣賞大家姐條婚紗裙，好認真。」片中由11歲大家姐林霏兒（Faye）用被鋪做嫁衣，「新娘子」企喺床上準備拋花球，由阿Bob做返婚禮司儀老本行，兼任埋攝影師，阿Bob投入地用司儀腔口說：「好啦，跟住到新娘子準備拋花球嘅時候喇！啲姊妹經已喺度喇喎！Hello！新娘子準備啦喎，睇吓邊個接到呢個祝賀先！」霏霏興奮和應說：「準備好未？」跟住兩父女數完123後，花束應聲著地，花散落地氈上，結果由二妹熹熹瞓身搶到，細女機機和孻仔唯有執地氈花瓣，十分好笑，不過，四姊弟都興奮到彈彈跳，勁開心。」連阿Bob都忍唔住笑說：「哈哇！恭喜晒！」

其實在停課期間，阿Bob四子女都乖乖咁留喺屋企，三個乖女除咗溫習、做功課外，還懂得自娛，大家姐霏霏仲教妹妹打麻將打發時間，又講故事畀細佬妹聽，咁識得照顧弟妹好令父母感動。