武漢肺炎爆發後，在停不了的限聚令下，多個行業都大受影響，近日疫情似有放緩趨勢，政府宣佈將於周五（28日）放寬食肆堂食至晚上9時，繼續限2人一枱，並重開戲院、美容院等部份行業，惟已經蝕到入肉的幾位藝人老闆，都轟開得太遲，開Partyroom的陳潔玲更譏諷：「只係十八層地獄同十七層地獄嘅分別！」
雖然美容院可以重開，但政府強調不是無條件重開，細節稍後公佈。身為美容院老闆的羅霖因武漢肺炎令生意大受影響，停業多日終可以重開，她回覆《蘋果》表示：「係太遲，美容院虧損嚴重！不用安排甚麼來吸引人，因為好多熟客都好想做美容療程。」
在尖沙嘴和銅鑼灣開設台式餐廳的龍小菌，暗寸堂食放寬到9時的限聚令：「啲病毒之前就6點出嚟，而家就9點，佢變種得咁突然，我都冇辦法。如果諗到政府做乜就發達啦，做老闆好無奈！政府不斷變我咪惟有跟住變通，諗啲即食點心之類去應對，捱到最後一刻啦，呢個係我做人宗旨。講真，我對今次放寬期望唔高，隨時可能又第四波、第五波，市民惟有配合咋。」
在大角嘴開設飛機主題餐廳的張惠雅：「政府嘅政策我都唔係好明想點，好摸唔透，所以無咩事我都係繼續乖乖帶好口罩同多洗手唔好亂摸面，希望可以快啲回複正常生活。」
至於經營Partyroom的陳潔玲，其行業不在今次放寬之列，坦言對政府早已心死：「我已經由初頭嘅擔憂、絕望，到而家已經好平靜，由始至終疫情點解咁反覆爆發，都係因為香港政府堅持唔封關，所有政策上失誤，都係由我哋幫佢埋單，至於佢啱啱公佈放寬限聚令，部份行業可以慢慢恢復營運，其實都冇乜意思，對佢哋嚟講，餐廳可以開返門，但都要兩人一張枱，同之前晚市停堂食，我覺得只係十八層地獄同十七層地獄嘅分別啫。」
陳潔玲表示已將Partyroom 生意擺埋一邊，「而家好專心做其他生意，做產品，做網店，賺番啲錢彌補呢度嘅損失。如果靠政府，我一早死咗。5月份申請嘅第二輪抗疫基金，到我哋8月第三輪停業都未批得到，算吧啦香港政府。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
