39歲「波波姐」莊韻澄（前名莊端兒）與細5年的圈外男友呂成忠（Joe）共諧連理，二人擇日今日註冊，在親友見證下結為夫妻。雖然Joe曝光即被揭失業兼破產，以及欠街數等負面新聞，但莊韻澄仍然願為他封盤，再婚的她有見疫情兼限聚令，有意明年才大搞婚禮補請親友。新娘子好友翟威廉、游蕙禎、龍小菌、林柏希等都獲邀往觀禮，嘉賓人數在30人之內，一對新人在簽紙時都戴着口罩，十分守規矩。
雖然一直傳莊韻澄奉子成婚，她都未有否認，還大賣關子指稍後再有喜事宣佈，莊韻澄今日未有穿婚紗註冊，她揀了鑲了閃石的Deep V小背心配白色西裝褸及西褲，露出孕味濃的腰肢。莊韻澄沒着婚紗還是拋胸吸睛，她全程笑到四萬咁口，今日禮成後，莊韻澄接受《蘋果》電話訪問時，自爆簽紙時有小蝦碌：「我就冇喊，但我哋都有啲烏龍，老公同我戴戒指時，佢好緊張，佢拎錯自己個隻，我哋簽紙時都手震震。」莊韻澄表示今日大約邀請了20多位親友來觀禮，大家為免冒風險，全程都戴口罩。她說：「今日場地細，大佬孝（邵仲衡）同吳啟明呢，我出年擺酒先請佢哋嚟。」
升呢人妻，莊韻澄難掩興奮心情，她續說：「到而家仲係好開心。」可習慣大家叫她呂太？莊韻澄答：「其實未慣，應該好快習慣，哈哈。」至於可會同時宣佈有喜消息，她仍堅持保持神秘，可能未夠三個月怕BB小器：「喜事留番畀我遲啲宣佈，過多一排先。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
