林師傑於今年6月在社交平台宣佈跟無綫及星夢解約，他更自爆無綫要和他轉簽「6 show」約，保證他每年有12,000元收入，結果林師傑未有接受這份「恩賜」，決定離巢外闖。
回復自由身的林師傑日前接受阮德鏘的YouTube Channel《囍趣台》訪問，林師傑直言自己得不到高層歡心，在他們心目中的評價相當低：「我入行11年，仲係聽到好多負面嘢。」他更用「柒」字形容自己：「我諗唔到可以用邊個好啲嘅字嚟形容自己，入行嗰陣鍾意做好多嘢得罪人，明知自己做唔到嘢，又自己走去做，真係好大鑊。我由細到大做人都唔圓滑，對人情世故有一種障礙。」
阮德鏘在節目大爆林師傑揸車趕返電視城，中途因「爬頭」而向一架七人車的司機「伸中指」，結果林師傑在幕前消失了一段時間，他聞言後說：「其實只係一件好簡單嘅事，嗰日我要入廠，喺環保大道去到燈位，嗰陣係綠燈，但係前車架車突然踩brake，我EQ唔係咁好就呠佢，之後嗰個司機落車，我已經心知不妙，但係過嗰陣個人好『着』，準備諗住鬧人，跟住覺得佢認得我，可能係公司嘅高層，我只係做咗一個『做乜事』嘅表情，之後佢再望我幾次，就算轉咗綠燈都唔開車，我咪cut咗去慢線開車走，結果好快就知發生乜嘢事。」
他續說：「我好快就收到兩個監製、PA、經理人嘅電話，就要上8樓，好多人都知乜事，話我舉中指，一次過X咗7個監製。之後樂小姐都有問番我件事，由迴旋處開始到卡樂B嘅燈位，喺呢段路我嘅駕駛態度，點樣揸、揸咗啲乜嘢，最後總結係話我超咗速，咁即係我唔啱，之後就轉咗身走咗。」最後林師傑要親身到7位高層房逐一道歉，之後被「雪藏」了差不多一年。
幸好最後獲珍姐（曾勵珍）給予機會，安排他演出《愛‧回家》中的「木偶哥」一角，其後他憑劇中歌曲《小木偶的話》奪得「勁歌金曲獎」，殊不知又因為致感謝辭時又再得罪人，林師傑說：「嗰陣我第一個多謝嘅人係珍姐，諗住《小木偶的歌》係套劇嘅歌，所以咪多謝珍姐先，點知原來係音樂頒獎禮，要先多謝歌曲監製，我次序錯咗，所以又得罪人，結果又俾人鬧。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
