黃耀明（明哥）和劉以達組成的樂隊達明一派，出道三十多年唱過不少諷刺社會時弊的歌曲，雖然經過去年的社會運動，自由言論不斷縮窄，他們卻仍堅持自己的作風。明哥更斥國安法任意、抽象，恐懼令創作者有如踩鋼線，箝制創作自由，不過他明言：「係驚，但唔可以收聲。」更希望以音樂connect香港，保持士氣、團結。
達明一派原打算在去年12月舉行演唱會，可惜因社會動盪而延期，後來碰上疫情又再改期，演唱會延至本月13至19日在伊館舉行六場。黃耀明日前受《蘋果》專訪，他表示演唱會名「Replay」，本來計劃在一年內舉行兩季演唱會，重新演繹達明一派出道以來的八張大碟，今次暫時選定主打唱1989年六四事件前後推出的專輯《意難平》及《神經》的歌曲，至於其他唱片，明哥笑說：「後會有期。」
如今舊曲新唱，明哥透露將獻唱從未公開表演的歌曲：「我覺得到呢個年紀，係懷舊或者睇吓自己過去嘅歷史。同埋發覺做咗好多嘢但冇人理、冇人現場聽過、你從來冇表演過，我會覺得奇怪。我proud of我哋達明一派做過嘅，大部份作品再拎出嚟聽唔會難堪嘅。」同時明哥亦有新歌推出，讓樂迷驚喜。
達明一派歌曲題材一向前衞、勇於在政治表態，《意難平》1989年5月面世，當時仍未發生六四天安門事件。明哥說：「潘源良第一次畀《四季交易會》嘅歌詞好有趣，講北京民主牆，好多人貼出自己對社會、政治嘅訴求。你會覺得好奇怪，80年代喺北京仲可以做呢件事，有少少似連儂牆，但今日嘅北京乜都唔可以。當時我嘅音樂唔係要啲咁硬嘅，之後變咗𠵱家嘅版本，講緊一個華人社會，或中華民族嘅民族性，對理想唔執着，隨時可以買賣。」明哥又提到《意難平》中的歌曲《愛在瘟疫蔓延時》，寫的是愛滋病：「填詞人周耀輝就想用呢個題目講世界上有好多恐懼，政治都係種恐懼。」
香港經歷了去年的社會運動，到今年相關人事被秋後算賬，達明一派在這個時期重唱充滿控訴的歌曲，也許令人更感沉重，明哥苦笑說：「其實係好大諷刺，𠵱家比嗰陣時體驗更深，更加真確。1990年出嘅《神經》仲恐怖，好似預言30年後再發生，歷史係有一個循環。」《神經》收錄多首八九學運有關的歌曲，如《排名不分先後左右忠奸》、《十個救火的少年》及《天問》等，《天問》更被內地列為禁歌。
在《意難平》中的名曲《天花亂墜》，最尾一句歌詞是「我諗，我應該收聲」，這句會否是明哥現時的心聲？他堅定的說：「唔會，冇得收聲。係驚，會驚好多，我地要更加有智慧同更聰明，但唔可以收聲。」他形容社會狀態加上疫情，提供了豐富的創作題材，但恐懼令創作路有如在踩鋼線：「以前都踩鋼線，但好似容易啲，寫呢啲歌大陸唔批，或者大陸版會cut咗，但𠵱家唔係，你寫咗隻歌唔知會唔會俾人拉喎，因為國安法係好任意、抽象。大家都知有寒蟬效應，但喺咁嘅時候更要面對，如果一路退落去，香港所有做創作、文藝嘅人，只能服務嗰個政權。」
明哥形容以他的個性和音樂路上方向，於這時候很難不回應這個時代：「其實過去十幾年，我都可以返中國大陸演出，大部份歌可以演出，除咗拎走咗嗰幾首，佢畀我錯覺以為中國大陸社會進步，點知突然一切嘢倒退。我覺得好奇怪，一個所謂強國，點解喺文化、藝術上，反而箝制住？我覺得係不能理解嘅事。」明哥更希望盡快推出新歌及上台演出：「大家唔可以喺街頭connect，至少喺另一個方式，喺音樂上connect，我哋保持一種士氣、保持團結。」
化妝： Kris Wong
髮型： Ivan Lee of headquarters
來源 source: http://hk.appledaily.com
|
鍾意就快D Share啦！
|
|
|
