童星Julian（JuJu）在劇集《暖男爸爸》中飾演鄭中基3歲兒子暴龍哥，他在劇中十分搶鏡，一頭鬈毛頭髮、鬼鬼哋可愛臉孔，加上表情多多，十分吸睛，被封為「暖男仔仔」的他，瞬間成為劇中的人氣王。自《暖》劇出街後，今年5歲的年幼版「暴龍哥」JuJu都未有現身宣傳活動，這天JuJu終於現身，由媽媽帶來與監製戚家基（Peter）有個約會，《蘋果》直擊兩人的會面過程。
劇集拍攝完成已有大半年，JuJu再見返Uncle Peter時十分雀躍，當JuJu看到送給他的暴龍公仔時十分興奮，更愛不釋手，將暴龍公仔全程攬到實。活潑可愛的JuJu，說起話來仍帶點BB音，問他叫甚麼名字？初時他會整蠱做怪擺出鬼馬表情，之後他才以不鹹不淡的廣東話說︰「我係暴龍哥，JuJu，我係5歲。」然後他又介紹手中的暴龍公仔說︰「佢叫Bubble，6歲（佢係哥哥？）唔係，我係哥哥，有妹妹。」問他愛錫妹妹嗎？他搞笑地中英夾雜的說︰「Sometimes同佢打交，但not always。」
當拿着鄭中基（Ronald）在《暖》劇的劇照給JuJu看時，他微微笑說︰「Magic PaPa。」原來Ronald在他心目中是位Magic PaPa，JuJu媽媽解釋說︰「Ronald好好，休息時會同佢玩，又用銀仔變魔術，所以叫佢做Magic PaPa。」有一次JuJu睡着，Ronald幫手抱起他，當交到媽媽手時，便問左手還是右手，JuJu媽媽對Ronald的細心感動的說︰「佢應該湊慣仔，問我抱慣左手定右手。」之後當JuJu看到自己一張污糟樣的劇照時，他語氣加強力度說︰「only paint，拍戲only。」問他靚仔嗎？JuJu一臉童真又帶點怕醜細細聲說︰「梗係……靚仔。」JuJu還表示最喜歡Marvel中的英雄Deadpool（死侍）。
劇組最初在200多名童星中，仍未能找到心水人選，直至工作人員向監製推薦完全沒有演出經驗的JuJu，雙方便一拍即合。問JuJu媽媽為何讓兒子拍劇？她說︰「剛好嗰段時間停課，佢嘅表姑媽同表姑姐都喺劇組做服裝指導，所以帶咗佢去（試鏡）。JuJu性格比較慢熱，怕醜啲，所以畀佢試吓，拍完之後佢係唔同咗，群體接觸多咗，懂得聽人講。平時佢鍾意講英文，所以中文弱少少，但而家佢都肯講中文。」至於JuJu為何樣子有點混血兒？JuJu媽媽說︰「JuJu上幾代係有外籍家人，所以有啲遺傳。」劇中演5歲版暴龍哥的Jasper，原來跟JuJu是表兄弟，難怪JuJu來到劇組，很快便適應。
對製作人來說，拍童星是一大考驗，而JuJu開工兩天便融入當中，監製Peter說︰「佢成日坐喺導演位望住個mon，又識得嗌action，有次佢仲揸住對講機話『儍Bill（副導演）action』。」有樣學樣十分搞笑。問到JuJu媽媽，會否再讓兒子拍戲？她說︰「再拍會睇情況，我好open-minded，要睇件事有冇意義，希望睇咗套劇會令人開心。今次劇組同演員都好照顧小朋友，係JuJu一個好好嘅回憶。」JuJu媽媽並非一般的怪獸家長，反而重視小朋友學習過程開不開心，她說︰「原本JuJu讀緊傳統學校，但係佢喜歡運動，嚟緊佢會轉去國際學校，以sport為主比較適合佢，小朋友讀書好辛苦，唔想佢被功課淹沒咗，男仔係要跑吓活動吓，想佢童真啲。」
撰文︰羅婉玲
攝影︰仇志中
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
