許廷鏗在樂壇過了第一個十年，由TVB的巨聲幫起步，捱過了「公園事件」的考驗，踏上紅館舉行演唱會，離開大台後被「娘家」封殺，到今年元旦在叱咤頒獎禮首奪男歌手金獎。因為靚仔、唱功好、牙醫、叱咤金的外在條件，被網民封為「人生勝利組」，然而，看似一帆風順的背後，許廷鏗的內心卻埋藏着恐慌！
去年，香港是難過的一年，時代變壞，城市和人都病了，「經過2020年，疫症面前人人平等，靚仔可以抗疫咩？我曾經覺得做藝人有特權，但嗰啲特權有附帶條件，有堆人唔明白，點解你會得到咁多人錫，可能許廷鏗唔係你第一個諗起要幫助支持嘅人，好似感覺上有更多人值得幫，『佢自己乜都搞得掂，又有錢又剩。』我唔係去呻，但我只係話畀大家知，外在條件你睇到有幾好，都會有啲缺憾嘅位置。有啲人斷六親去賺錢，冇愛情冇親情，可能最後佢寧願賺少啲錢而有番親情呢？內心得失每人把尺唔同，歌手有機會以自己方式講想講嘅嘢，已經係福氣，唔係有條件任性先做咁多嘢，係睇你有幾硬淨地堅持自己相信做緊嘅嘢。」
出道1年後，許廷鏗橫掃四台新人獎，之後順風順水，但風光背後，卻聽盡冷言冷語，「『得個樣嘅』、『吓，佢多曝光啫，劇集歌嘛，多人識』、『真係唱得好好咩？我聽佢唱歌好辛苦喎！』不能盡錄，我記得唔係因為我小器，係不斷推向前畀自己更加叻嘅動力。我以前會避開唔睇，因為好影響自己情緒，曾經有個階段，我嘅作品喺YouTube係dislike多過like，我嗰時不明所以，而家聽番隻歌，自己只係做樣投入，又係用番嗰把聲chok住，以為自己唱得好好聽，就好似我喺《全民造星》講嗰啲，冇infect冇影響力，作品完全冇感覺，我而家就明，當時以為呃到人，原來有啲嘢係呃唔到。」
那段時間，就是他離開星夢前的最後兩張大碟，「自己都知有個階段想蒙混過去，有次錄咗三個字（15分鐘），監製話出去食tea，坐低叫嘢食後，『做乜？聽到你唔想唱喎！』我仲扮嘢：『冇呀，你覺得我唔想唱？我而家返去錄都得。』若干年後，同樂迷面對面交談，佢話我初出道時好鍾意我，一直追隨我，去到某個階段，佢冇再聽我啲歌，因為佢覺得我唔鍾意做緊嘅嘢，佢一講我忍唔住喊咗出嚟，跟住我就同自己講要洗心革面，入得錄音室唔好嘥呢啲機會。講真我初出道，就算喺牙科學院朝九晚六做完實習醫生，喺學校洗手間化妝整頭去做嘢，嗰陣時係做得好開心，入錄音室係人生最大娛樂，但後期點解要諗住扮混沌過去，我覺得呢個係警號，我唔忍心見到樂迷一個個流失。」
2017年，許廷鏗離開星夢逃離大台，一切重新開始，去年出新碟《Negative》，請林夕寫出他內心的恐懼——《慌》，「我嘅驚，係驚自己喺人哋心目中嘅形象，今日着呢套衫精唔精神？唔gel頭得唔得？隻眼係咪有啲腫呢？當我踏出去面對人，會好在意大家點睇自己，人哋可能一句慰問：『今日係咪有啲攰？』但我會諗個樣係咪唔夠精神呢？瞪大對眼先。我睇營養師，希望每日起身照鏡，望住自己係自在嘅，營養師覺得好奇怪，你個人咁虛，講吓自己想落幾多磅，我同佢解釋唔關肥瘦事，係對自己狀態嘅滿唔滿意，我做素人時冇乜所謂，但娛樂圈肥瘦關人事，歌手係販賣自己情感，夕爺將佢變歌詞，當你乜嘢都驚，其實有乜嘢需要驚！」曾經有段時期，許廷鏗因為發福了，被fans指跟張如城撞臉，連網絡紅人瓊姐都開post：「許廷鏗發福驚變張如城？」他轉發瓊姐的貼文，留言：「收到喇！我會痛心減肥！」
當林夕在大陸變「佚名」，許廷鏗依然請夕爺作詞，「從來我都係以小學生身份跟佢學嘢，有日佢打嚟同我講天南地北，其中兩個字我好深刻，係『感激』呢兩個字，心領神會，我都同佢講番感激，我人生第三隻碟，《愛到透明》佢已經幫我，自己都諗乜嘢新鮮蘿蔔皮，能夠得到夕爺呢隻歌詞，再後期《我的志願》、《恐怖情人》，佢一直教緊我某啲嘢。好記得《我》經歷緊同父母喺我事業諗法上唔相符，我send咗張圖畀夕爺，父母攞鉸剪剪咗囝囝對翼，本身歌名《誰剪斷了我的翅膀》，我記得睇到份詞嗰日係3月2日，我睇到一半喊咗出嚟，佢好似用歌詞話我知，爸爸媽媽角度係咁，其實係為我好，剪斷我的翅膀，佢哋點會唔痛呢？佢哋唔想我行冤枉路，多謝夕爺咁多年繼續用佢支筆寫我心迹。」
許廷鏗的父親是香港腎臟基金會副主席許義鏞，從事貿易生意，有指手持過億物業，哥哥許永鏗曾是執業律師，現轉行做banker，兩個家姐分別是醫生和banker，許家一門四傑，雙親對孻仔寄望甚殷，許廷鏗卻半隻腳入娛樂圈，十年努力得過唔少獎，今年首奪叱咤男金，父母對他唱歌的態度有否轉變？「如果佢哋因為呢個獎而有變化，我諗我唔會咁尊重佢哋，從day 1開始，佢哋一方面戥我高興，但同一時間又為我擔心，佢哋唔係星爸星媽呢種人，呢個獎話畀兩老知道，個仔一直努力緊，得到認可辛苦都值得，作為仔女最開心莫過於見到爸爸媽媽為自己覺得驕傲同埋少啲擔心。」
許媽媽有冇因兒子獲獎而開心到喊？他笑說：「冇吖，我媽好冷血，哈哈哈，講笑，我媽媽好內斂，朋友畀驚喜我，搵爸爸媽媽拍咗條片，我阿爸係一個好老正人：『恭喜你，得到呢個殊榮，爸爸都為你感到好驕傲，繼續努力都冇估過你得到呢啲獎項嘉許，大家都好認可你今時今日成就，作為爸爸都感到好安慰。』我媽媽係冇講過嘢，喺隔鄰撞爸爸，『夠啦，講好長。』佢哋好唔慣做呢啲，我喊住睇，笑住喊，百感交集。」
金牛座的許廷鏗，性格硬頸，「自己對音樂追求，簡單嚟講我係冇貪心，喺一個電視台但冇拍過劇，可能都係一個小遺憾，但嗰陣時更加着意做好音樂，呢種金牛嘅硬頸，近年歌手身份獲大家認知：許廷鏗，好鍾意唱歌囉，儍儍更更，唔拍劇喎！係，我真係選擇唱歌。」
在踏上成功的路上，許廷鏗亦走過滿途荊棘，別人一個眼神可以擊敗他！當年初出道發生「公園事件」，因醉酒與男友人行為親暱爆斷背疑雲，對他打擊甚大，「嗰陣時我會諗公司係咪會放棄我，嗰時去到一個眼神都可以擊敗自己，被定義咗某啲身份取態，我嗰陣時用咗好多方法同自己講，冇你想像中諗得咁大件事；去到《全民造星III》有幕我嘅說話被曲解，有個男仔着高踭鞋着裙唱歌跳舞，然後我喺評判席上講咗句『just be yourself』。」
當日，B組的NY（鍾諾言）穿裙及高踭鞋唱跳，擔任評判的許廷鏗說：「我知道對高踭鞋差啲難倒你，不過值得嘅，just be yourself，自己鍾意做咩就做咩，做自己覺得最舒服嘅嘢」之後組員問NY為何不平反，許廷鏗被指誤會了NY的性向。原來許廷鏗一直將此事放在心中，認為自己的說話被曲解了，「其實我冇定義佢嘅任何取態，甚至所謂易服，之後無啦啦變成一件需要平反嘅事情；我嗰句『just be yourself』意思唔係咁，好純粹地你覺得係啱係最有型最靚咪去做囉，2021，大家有乜未見過，你孤陋寡聞定係你唔夠多見識，世界變咗，嚟緊可能LGBT係一個主流，唔需要再用呢啲字眼定義。如果亂噏：我真係易服！我當我自己係，我睇到呢個演出，我覺得好正，但事後如果係需要平反，我真係諗，係咪我有問題需要平反？」
32歲的許廷鏗，這刻對愛情沒有熱烈追求，「我想搵一個我愛佢，佢亦都愛我嘅人。如果我而家有個伴，咁點？出街食飯book間房，保持社交距離，呢樣對於對方都好唔公平。唔係冇諗過，但一諗到呢啲嘢，都唔係拍緊拖，點解要開展一段咁難經營嘅關係呢？當然啦，如果有一日，有個伴都幾好，但呢個moment對我嚟講，冇亦唔係咁大缺失。」
雖然未搵到人生伴侶，但卻已得一知己，就是鄭欣宜，「佢係我好少數喺行入面可以肆無忌憚講真話嘅朋友，咁多朋友入面，嘈交最多都係佢，我甚至唔明點解會發展到咁嘅關係，友達以上，戀人未滿，我哋係戀人過咗，然後變成親人，所以我哋以異父異母低能巨孖寶自居。」
人生有幾多個十年？許廷鏗在圈中的第一個十年已過去，再十年後希望自己怎樣呢？「十年後，我40幾歲啦，希望內心仍然係澄明，對於自己嘅所作所為行事，仍然係覺得對得人拜得神。」
撰文：余燕儀
攝影：add攝影組
髮型：Derek Li@Xenter
化妝：Khaki Yan
場地：SKYE Roofbar and Dining
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
