熱爆娛樂: 馮允謙在港生活十年視為家：比加拿大安全，凌晨放心落街買嘢食 #馮允謙

2021年1月29日星期五

馮允謙在港生活十年視為家：比加拿大安全，凌晨放心落街買嘢食 #馮允謙

疫下展拳腳

馮允謙，32歲，2011年由加拿大返港參加TVB《超級巨聲3》入行。2018年加盟寰亞唱片，並在武漢肺炎疫情肆虐的2020年，連出兩張專輯。這一步，是冒險，還是突圍？馮允謙明白這樣做，的確是個很大的投資，畢竟很多歌手都只推出數碼版，而且逐首逐首歌出，比他穩陣得多。

「大家都知道賣碟銷量可能唔夠多，而現時更困難，好多演出又被迫取消，好多藝人都未必有演出工作，所以對發展樂壇事業會更困難。但透過呢一年，令我發覺音樂真係好重要，因為雖然有疫情，見到有好多人離開，但我感覺到因為佢哋離開，好多人都需要音樂呢股力量，幫忙做一個healing。所以我呢一年做音樂，係希望可以感動到好多人。同埋而家有不同渠道去同大家分享自家音樂，例如網上平台，可以做得更多，利用呢方面去接觸更多fans朋友，我覺得係一個好好嘅機會，推出更多好歌，令更多人認識我嘅音樂。真係好感謝公司畀好多資源，好錫我，幫我推出咁多好唱片。」他說。

當很多歌手都只推出數碼版時，馮允謙在疫下連出兩碟，他也知道是很大的投資。



馮允謙2020年的兩張專輯：《Detour》與《Awaken》。

樂壇未死

馮允謙2020年的歌唱成績，大家有目共睹，相當亮眼：

《新城勁爆頒獎禮2020》新城勁爆歌曲《地球來的人》、新城勁爆專輯《Awaken》；

《2020年度叱咤樂壇流行榜頒獎典禮》專業推介叱吒十大第五位《地球來的人》、叱咤樂壇唱作人銀獎、叱咤樂壇男歌手銀獎；

《第四十三屆十大中文金曲》十大中文金曲CASH創作歌手金獎。

不過，就在各大頒獎禮派成績表同時，外界又再次提到「香港樂壇已死」，隨即歌都有得唱：「香港歌手經已死，甩嘴走音兼無氣，企在原地──《樂壇已死》。」馮允謙作為香港樂壇一份子，他這樣認為：

「其實我覺得好似一個循環，例如銷量愈嚟愈少，公司賺嘅錢少咗，然後投資喺歌曲上嘅預算又少咗。因為預算少咗，歌手做嘅歌曲又未必可以做得更好，因此而影響歌曲質素，所以我覺得對整個循環都有影響。但，有好多外國mixing，或者好多人鍾意聽韓文歌，因為mixing做得好好，但人哋有好多投資，有政府資助，可能投資好多錢，用幾百萬美元去發展一隊男團。但喺香港無政府支持，就未必可以做到呢件事，或者呢個效果。不過我相信只要更努力做歌，用更多心機去做，如果好聽的話，無論係咩嘢語言，其他人都會聽，大家可能會喺YouTube聽歌，上載一首歌後會有好多人瀏覽，因為而家就係咁方便，呢個世界距離細咗，所以有人話廣東樂壇已死，但我覺得唔係，只要做好音樂，就有人會聽。」



馮允謙2020年的歌唱成績，相當亮眼。



與此同時，外界又再出現「樂壇已死」的說法，但馮允謙不認同。

不K

其實，時下香港歌手做歌，不少已跳出夠不夠商業、是否K歌的舊框框，馮允謙更直言他的新碟《Awaken》內容很不K，卻很多人喜歡，令他喜出望外。

「我會覺得以前有好多好爆嘅歌，會比較容易上口，或者K歌類型，因為當時有好多人唱K。但我發覺而家有好多歌手，例如Serrini、林家謙，我覺得佢哋嘅歌都唔係好K，但係好好聽，好有自己個性同性格。所以我覺得而家係咪一定要做K歌先至成功？其實又唔係，主要係歌曲要展示到個人特色，呢方面先至係最重要。

今次做《Awaken》呢隻碟，好多因素都無考慮過，例如市場會唔會鍾意、歌迷覺得夠唔夠商業、夠唔夠K，係完全無考慮。例如《開始倒數》，或者《A New Day》、《Dancing In The Rain》，呢啲都唔係K歌類型，所以能夠有反應，我哋都覺得已經係一個好大嘅驚喜。所以今年大家留意到馮允謙嘅音樂，我覺得係因為有自己嘅性格。」



馮允謙認為現時不一定K歌才受歡迎，最緊要有個性與特色。(《開始倒數》截圖)



例如《Awaken》中的《開始倒數》、《A New Day》等，很不K。(《A New Day》截圖)

豐收年的內疚

馮允謙唱出了自己的性格，更唱出了豐收的2020年，但背後卻有遺憾與內疚，因一手照顧他幾兄弟長大的嫲嫲，在剛過去的12月因武漢肺炎離世，而自己因為在香港衝事業，每年只一次半次回加拿大探望，很少時間相處，但他堅定地說：「我已經覺醒，知道人生中咩嘢至係最重要，就係屋企人，所以而家一定會分配多啲時間畀佢哋，唔可以淨係工作。雖然賺錢好緊要，不過其實帶唔到入棺材，但人與人嘅關係，時間一過就會消失，我覺得呢方面對我嚟講好緊要，嫲嫲離開呢件事令我醒覺，發現原來屋企人係咁重要！」