視后胡杏兒近年中港兩邊走，早前仲瞞住節目組，大住肚拍攝大陸綜藝《演員請就位》第2季，因為唔想有特權被優待！而最近佢又再返上大陸，為咗出演尋晚舉行嘅春晚！
巨肚如籮嘅佢同倪妮、張雨綺等合演搞笑溫情小品！杏兒以一身紅裙配外套壓軸出場，扮演男星包貝爾老婆！而亮點係杏兒全程都講廣東話對白，喺春晚出現真係激罕，而最後佢仲好有感情講咗兩句東北話，演出近3分鐘，惹得全場爆笑，果然係視后呀！
原來對上1次有香港藝人參與春晚小品已經係1999年曾志偉嘅時候，當時佢同大陸著名小品演員潘長江等合作。而今次係相隔22年，再有香港演員出現，加上以廣東話演出，認真難得！而杏兒就喺社交網晒出大肚相，留言：「春晚舞台飆粵語和東北話實在是夠過癮！祝大家新年快樂，新年牛牛牛🐮」
杏兒續稱今次演出好嚴謹，由2月1號便開始綵排，直至正式演出前已排了很多次，過程十分開心﹕「今次更開心係同老朋友倪妮再合作，我哋係自2015之後再次碰面，當時我仲未結婚，所以有種他鄉遇故知嘅感覺。當然最開心係今次同第三寶（指肚中bb）一齊喺舞台演出，又一個難忘嘅體驗。」完成除夕工作後，杏兒今日便搭飛機回港過年。
而獨在香港嘅杏兒老公李乘德（Phil），尋日年三十就帶兩個仔返去祖村拜神，貼門神對聯：「雖然他們依然很小，但我都希望他們可以多接觸一些我們客家的傳統習俗，讓我們客家傳統可以一直傳遞下去。奕霆今天和村裏的長輩說了幾句客家話，他們聽到都非常開心。」
來源 source: http://hk.on.cc
|
鍾意就快D Share啦！
|
|
|
