藝人黎耀祥為TVB節目《回家》任嘉賓，於明晚（5日）播出的一集中，他重返近40年前的成長地—順利邨，探望在該處住足近40年的鄰居之餘，並四處找尋昔日店舖老闆好友、店員及老街坊足迹。談到當年屋邨生活，祥仔甚是回味，尤其是六點半新聞報道的前奏音樂，更是屋邨左鄰右里開飯的提示聲音：「嗰時大家唔使睇鐘，一聽到TVB新聞報道之前嗰個音樂，你就知係六點半，大家就會開始食飯。」祥仔續指屋邨井字型設計，令家家戶戶飯香四處飄溢，以港式香味緊扣港式人情味：「就算冇乜接觸人，仍然感覺到好有人情味。你唔使約定架，原來大家都喺度做緊同一樣嘢。」祥仔又謂這次回家，讓他感覺到上一代之前在邨內建立的人際關係及感情得以延續，祥仔感觸謂：「屋邨嘅故事，亦係人與人之間嘅故事，都係一種傳承。我媽媽雖然走咗，但佢好多老朋友仲健在，我感覺到媽媽嘅感情依然留喺順利邨。」
傳承了雙親重情義一面的祥仔，趁難得舊地重遊良機，帶領新一屆藝訓班學員們，與看着自己長大的丁醫生齊齊義務為年長街坊測量健康指數；期間他除不斷說笑替街坊紓緩緊張情緒，還到小時候經常幫襯的士多買飲品派街坊，旋即掀起Selfie及集郵熱。是集製作組炮製的驚喜，是找來祥仔昔日藝訓班好友兼舊街坊吳瑞庭為祥仔煮麵兼話當年，已有近二十年沒有聯絡的二人，久別重逢依然雞啄唔斷，祥仔更忽然興起與瑞庭神還原昔日拍下的珍貴合照，祥仔笑言：「睇吓，都仲係咁靚仔（指吳瑞庭）！注定你係偶像派，我係實力派啦。」
後晚（6日）播出的嘉賓，是瀝源邨長大的香港單車代表隊運動員黃金寶，近年致力推廣單車承傳的他，畢業後仍經常抽空出入小學時的母校，出錢出力為單車界培育新血，成立獎助學金之餘，更曾籌款幫師弟師妹一圓到美國比賽的夢想。全程掛著開心滿足笑容重遊昔日成長地的黃金寶，除笑指小時候十分奀皮，更是為食仔一名，除了最愛煎紅腸送飯，更曾想過向經常幫襯的茶餐廳老闆B哥拜師學廚。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
