掃呢頁CODE去手機

2015年1月8日 星期四

[壹週刊 - 1296] 失踪 3年 吳帥返港搶女 楊思琦含淚:講乜都無用! 吳帥,思琦,楊思琦,M1,




被問到吳帥踩上將軍澳寓所搶女一事,楊思琦即眼泛淚光。

娛頭

失踪 3年 吳帥返港搶女 楊思琦含淚:講乜都無用!

一二年三月,楊思琦在美國未婚產女,女兒卓穎( Krystal)隨母姓楊,從此,與空心吳帥再無瓜葛。

銷聲匿跡三年的吳帥,一個月前突然返港,踩上楊思琦位於將軍澳寓所,要求入屋見女兒。據了解,當時在家中的思琦被對方突如其來舉動嚇得半死,堅拒放吳帥入屋。

吳帥蒲頭搶女,獨力撐起頭家做單親媽媽的楊思琦擔心得向身邊人哭訴,怕對方會再有動作,騷擾女兒。對吳帥上門認親一事,楊思琦含淚說:「唔使擔心我!講乜都無用,最緊要係個女開心成長!」

不停㩒門鐘

一轉眼,楊思琦女兒楊卓穎下個月便夠三歲,當年搭上空心吳帥,匿到美國生女,受盡冷眼的她,亦已放下前事,以撫養女兒為己任。

母兼父職,楊思琦湊女、做嘢搵錢,獨力擔起頭家。一切逐漸回歸正軌,三年來一直冇聲冇氣的吳帥,一個月前突然蒲頭,踩上昔日曾經黐住過,楊思琦位於將軍澳的寓所,拍門要見女兒 Krystal。

「嗰陣思琦仲有一個月就生得,但吳帥已經唔知去咗邊,而家佢突然返嚟,話要見個女,都唔知佢有乜居心。好彩嗰日思琦唔使開工,思琦媽都喺屋企,佢哋唔俾吳帥入屋,個男人係咁不停㩒鐘,思琦怕騷擾隔籬鄰舍,所以答應同佢出去講數,思琦媽就留喺屋企,睇住 Krystal!」楊思琦身邊人說。

為避債主,吳帥潛居中國南通市。

楊思琦和媽咪一人一邊拖實囡囡放學,嚴防吳帥埋身。

為賺錢養家,即使到偏遠地區工作,楊思琦照接,早前便與陳法蓉到雲南省麗江出席活動。

再嚟會報警

做咗單親媽咪後,昔日怕事性格不再,再見吳帥,楊思琦全無留戀,絕不拖泥帶水。

「呢幾年吳帥不聞不問,思琦已經放棄呢個人,吳帥講乜,思琦都唔會動搖,嗰日思琦講明以後都唔會俾佢見個女,但吳帥態度好軟皮蛇,思琦好清楚佢呢份人,亦唔想俾機會佢𦧲,所以好強硬,總之佢再接近個女,就會報警!個男人喺外邊欠人咁多數,佢都驚自己俾其他人搵到,聽見思琦話會報警,佢先肯走。」知情者說。

趕走吳帥,但仍未死心的他繼續以電話騷擾楊思琦。

「思琦冇聽佢電話,亦唔想同佢再有任何關係,好彩之後吳帥冇再出現。呢個聖誕同元旦,思琦專登帶埋個女去美國探哥哥,熄埋電話。個女係思琦命根,今次吳帥搵上門,佢好擔心,喊晒話驚對方會再嚟,佢仲嬲到同管理處投訴,追究點解放陌生人上樓!」

楊思琦送完女兒返學,即飛車入香港仔,替港台電視部拍劇。

楊思琦參加珠江頻道《粵唱越響》比賽,唱一集有八萬元收入,即使被指走音,仍表示能躋身一班專業歌手中比賽,已經賺咗。

冒名搵着數

據了解,過去幾年,吳帥一直龜縮在內地南通市,即使與楊思琦分開多年,但他仍借舊女友招搖撞騙,搵着數。

「吳帥有個契家姐,喺南通電視台做主持,成日同人講話佢(契)細佬搞好多生意,老婆係港姐,搬思琦個名出嚟氹人俾錢投資。」

一一年,楊思琦爆出背住拍拖九年男友李泳豪,與被指是富二代的吳帥暗交。

「思琦讀緊教育學院就識佢,一一年佢哋撞番,吳帥只係傢俬廠買手,思琦知佢唔係有錢人,只係無諗過佢爭人咁多錢,後來仲誇張到要思琦攞錢俾佢填氹同搞生意,到佢周身街債嘅事爆煲,吳帥就開始閃,之後仲失踪埋。」知情者說。

楊思琦會合出租車司機後,一同行去停車場,打扮平民化的她,身上的斜孭手袋亦國產味濃。

楊思琦在廣西工作完畢,乘機到深圳機場,一個人推住大堆行李,會合司機坐租車返香港。

一一年底,楊思琦飛美待產,當時用的豹紋行李喼,原來而家仲用緊。

為了慳錢,思琦會自己駕駛七人車接送女兒上學,司機都做埋。

個女最緊要

求證吳帥踩上門認女一事,楊思琦一聽見對方名字,已經落閘:「我唔會講!(佢喺大陸仲用你個名招搖撞騙,話自己老婆係港姐楊思琦。)人哋講啲乜,我唔會回應。」

至於會否擔心吳帥會重施故技,失驚無神摸上門,思琦含住泡眼淚說:「唔使擔心我!講乜都無用,最緊要係俾個女喺健康開心嘅環境成長。(你為咗保護個女,所以同吳帥劃清界線?)我已經有自己生活,而家過得好好,有自己工作,有自己朋友,唔會理佢。」楊思琦語氣肯定說。

一一年九月,已經懷孕的思琦,親自駕車載吳帥由將軍澳寓所到紅磡火車站。

楊思琦趁假期帶女兒到美國 L.A.探兄長及阿嫂。千多呎的平房,正是當日思琦秘密安胎之地。

吳帥上門搶女失敗後,楊思琦即與父母帶埋女兒飛美國探胞兄,未有向外洩露行踪,直至回港前翌日,才在微博放上 L.A.迪士尼的照片。

被指唱夜場做啤酒妹,楊思琦表現激動:「咁樣講好影響,夜場好多 artists都唱,做完嘢就會走,絕無其他!」

衰男人

吳帥是前香港跳水代表運動員,曾參賽亞特蘭大奧運會,第八屆全運會等大型比賽, 02年,被香港泳總指違反紀律,被重罰停賽 3年後,轉任游泳教練。 08年,突然爆出楊思琦到北京任奧運主持時與吳帥撻着,一一年,楊思琦為他同拍拖九年的李泳豪分手,其後吳帥被揭是空心老倌,欠債纍纍,更試過被債主告上小額錢債追債三萬,一度要搬往土瓜灣劏房的他,自 11年底現身美國接楊思琦後,自此失踪,丟低當時還有一個月就生得的楊思琦。

孭四層樓

01年當選香港小姐冠軍後,楊思琦密密做,雖然無法同天王巨星相提並論,但勝在極慳,平日出席公開活動,置裝全靠贊助商提供,幾乎與名牌絕緣。 12年女兒 Krystal出世後,要獨力湊女養父母供樓的楊思琦,更加搏命,去年逃離大台,跳去人工高三倍的有線擔任清談節目主持,又頻頻返內地接騷拍廣告,有得搵就搵。

慳家楊思琦喜歡將餘錢變磚頭,現手持四個物業,每月生活支出連供樓十萬唔少得。

唔斷尾

做錯事一走了之,算是功德無量,返頭搞事,又或者留低手尾,搞到另一半擔驚受怕,無好日子過的,更加可怕!

陳秀雯

前夫林國雄欠下百萬巨額街數,每次出事都要老婆向外家借錢,還連累陳秀雯花盡積蓄代夫還債, 08年,有財務公司於亞視及陳秀雯太子寓所外張貼大字報,家人生活受盡騷擾。

薛家燕

83年下嫁越南華僑石保慶,誕下三名子女做全職主婦的家燕姐,多年來面對丈夫不忠,甚至私自將二人共同資產轉至男方母親名下,之後更一走了之。家燕姐被迫復出,對前妻不聞不問的石保慶,間中仍會打電話回家,騷擾三名子女。

趙頌茹、周永恒

與趙頌茹分居後,去年 9月周永恒以見女兒為理由,到阿 Yu娘家搗亂,喊打喊殺爆粗,更向外母吐口水,最終被警方拘捕。



鍾意就快D Share啦!