探熱針
跌餐飽 商台大整蠱 容祖兒做布景板
打晒鑼話未必出席樂壇頒獎禮的容祖兒，以工作理由甩底力撐了多年的「新城勁爆頒獎禮」，但上週四（一月一日）卻現身商台「叱咤」，據了解，容祖兒一直吼住多年來得個睇字的「我最喜愛的女歌手」，寧願得失新城蒲頭「叱咤」，可惜心頭愛卻落在謝安琪手上；連帶過去攞慣的「樂壇女歌手」金獎和「至尊金曲」大獎，都被楊千嬅和許志安瓜分。坐足成晚，只得兩個細獎， Joey被商台當人肉布景板！
得失新城
樂壇唔好玩！在無對手的悶局下，陳奕迅缺席今年各大頒獎禮，容祖兒亦因為要去美國開騷，缺席新城「勁爆」。
「阿臣（ Eason）唔玩，至於 Joey今年大部分時間都俾咗屋企（容母發現癌症第三期），去到年尾先發力 plug歌，所以佢一度諗過效法阿臣，所有頒獎禮都 no show！」英皇的員工透露。
過去在「叱咤」攞過九次「女歌手金獎」的容祖兒，○三、○四年曾攞過「我最喜愛的女歌手」，但近幾年一直失手；明知對方「心有所屬」，為免頒獎禮暗淡無星光，商台於是以「好大機會」利誘容祖兒出席，同一時間，又以「女歌手金獎」氹已經四年無現身的楊千嬅蒲頭。
「最有娛樂性嘅阿臣（ Eason）唔到，天后又無個撐場，個頒獎禮冇厘吸引力，所以公司落晒 order，點都要氹掂佢兩個。」一名商台員工透露。
據了解，希望再成為「叱咤我最喜愛的女歌手」的 Joey，兩星期前才落實出席，吃不到葡萄的新城高層朱明銳，一收到風即好大反應：「如果祖兒返嚟去『叱咤』，我哋新城會好傷心，過往支持祖兒所有行動都俾佢辜負。」
至於楊千嬅，據知也是一直拖到頒獎禮前兩日，確認「女金」到手，才答應現身。
坐到放晒蚊
「叱咤頒獎禮」當晚，容祖兒以一襲 see through有 heart裙現身，「叱咤十大」佔一席外，只得到「女歌手銀獎」，屈居楊千嬅之下；至尊歌曲、至尊唱片等所有大獎全線冇份，連以為有望重奪「我最喜愛的女歌手」，最後也成為謝安琪囊中物。
整個頒獎禮過程，容祖兒愈坐愈呆，有時幾近黑面；《撐起雨傘》攞獎時，撞啱鏡頭對正被影到繑手打呵欠。
之後在慶功宴上被傳媒問到「放蚊」一事，做足成晚布景板的容祖兒忍唔住寸嘴說：「如果咁樣針對個動作去挑剔，點都可以，但我坐喺度冇乜可以挑剔。」
為商台得失新城，結果換來一肚氣，容祖兒好火！
|
鍾意就快D Share啦！
|
|
|
