掃呢頁CODE去手機

2015年2月26日 星期四

[壹週刊 - 1303] 大得閒 馬浚偉開波啪定丸 馬浚偉,BKD_S,M1,




馬浚偉好 talk得,食飯傾足個半鐘,都未夠喉,帶隊轉場食糖水再傾過。

探熱針

大得閒 馬浚偉開波啪定丸

黐到強國金主的馬浚偉,去年成立「中港桃園馬浚偉工作室」,集中火力在內地發展,出碟又拍福音電影《下一站再愛你》,可惜新碟出街無人知,擔正的電影,票房只得二十六萬四千,嚇親!

無事可忙,馬浚偉得閒到搵定位約朋友開餐,再全男班打羽毛球兩粒鐘, hea住過日子。

負責等位

今年身體頻頻出現毛病的馬浚偉,啪定補充丸先埋位打羽毛球。

冇嘢做,大得閒的馬浚偉約朋友飯聚,負責搵位。同三男三女九龍城開餐,馬浚偉六點就率先到,霸定張大枱。朋友聚餐,講多過食,飯局個半鐘,仲未傾夠,行過兩條街,去合成食糖水,坐低繼續吹。

啪丸打波

喜愛羽毛球的馬浚偉同全男班波友分組作賽,打足兩小時無偷懶。

晚上八時半,馬浚偉先離開,過馬路去 7仔買了支維他命水後,再朝住發嫂(陳薈蓮)最愛的九龍城街市進發,直上樓上的室內羽毛球場,會合五名男子,準備開波。

過去一年,馬浚偉毛病多多,試過頭、頸、腦麻痺、腸胃抽筋、血壓失控颷升至一百八十,唔想家人擔心,他戒酒戒齋啡又早睡早起多做運動;開波前,馬浚偉更啪定丸,做夠熱身先埋位,同波友激戰兩小時。

得意忘形

一二年,馬浚偉為逃離樂大媽的打壓,跟風北上,以為有份拍大製作《忽必烈傳奇》(前名《建元風雲》),同胡軍、佘詩曼做對手戲,實有發圍,可惜命水唔夠鄭嘉穎、陳偉霆好,二幫角色彈唔出,吽足成年,焗住扮矮仔跪求珍姐(無綫戲劇製作總監曾勵珍),劈價回巢拍《守業者》。

去年搵到國內有製作公司肯揼水搞「中港桃園馬浚偉工作室」,一時得意的馬浚偉「大頭症」又發作,對於珍姐 call返大台拍劇,大口氣到:「我未來啲時間都預留咗俾內地,唔知拍唔拍到。」但公司成立當日,大鑼大鼓話要將合作過的對手,包括陳法拉收歸旗下,全部得個噏字。

信主埋堆出福音碟、拍福音電影,去年中推出的《 Cherish 2》大碟又拍埋微電影配合,照樣無聲無息。自己擔正的福音電影《下一站再愛你》,在香港票房得二十六萬四千,慘到冇人有。事業冇轉機,但信咗耶穌唔可以去車公廟,點算好!

馬浚偉準時六點前往 cafe,霸定位,等朋友放工開餐。

去年 8月,馬浚偉黐住關菊英去雲頂登台搵真銀。

馬浚偉揼本,扮巴士司機拍微電影,去年中新碟推出依然無聲無息。

馬浚偉擔正的《下一站再愛你》,分別在香港及內地上畫,其中香港票房超慘淡,只收二十六萬四千元。

成立自己工作室的馬浚偉,曾表示有意將合作無間的陳法拉收歸旗下,但對方至今仍將工作重任交由陳慧琳經理人鍾珍代為安排。

鍾意就快D Share啦!