2015年5月21日 星期四

企硬 餐廳拆夥 四季酒席撻訂 朱慧敏出走美國 [壹週刊 - 1315] 朱慧敏,M1,



娛頭

企硬 餐廳拆夥 四季酒席撻訂 朱慧敏出走美國

朱慧敏與前 EO2成員彭懷安( Eddie)拍拖三年幾,今年初男友在朱母墳前求婚,成功令朱慧敏答應明年二月拉埋天窗,可惜三十七歲的準新郎唔生性,日前竟爆出偷食長腿索女。

嬲爆!火都嚟埋的朱慧敏決定撻訂四季酒店三十幾圍酒席,將婚事煞停,同時拆夥 Eddie的餐廳,又 plan好出走美國三個月。自知傷透女友心的 Eddie,發誓戒酒戒蒲,等女友回港後一齊去做婚前輔導箍煲。不過箍唔箍得掂,真係好難講喇!

吵大鑊冷戰

朱慧敏與 Eddie拍拖以來,感情一向穩定,就算男友早前被踢爆在夜店與韓妹把酒談心,她仍擺出一副打風都打唔甩的姿態,投對方信任票。但今次再進一步,攬女過夜,冇晒面的朱慧敏強忍淚水講:「同類事件並非第一次」。

男友背叛自己,朱慧敏直認得悉後經常失眠,更自爆之前已與 Eddie展開冷戰一個月。

「我哋冇聯絡,但唔係純粹今次件事,係我哋之間有問題出現!」朱慧敏說。

爆偷食之外,原來二人還為婚事而經常起爭執。

「 Queenie(朱慧敏)同 Eddie為咗結婚嘅嘢成日嘈交, Queenie係完美主義,乜都要最好,但 Eddie就比較隨意,所以有時會令身邊人覺得佢唔夠着緊,兩個返到華星客棧都會嘈,成日面左左, Queenie呢排都冇返華星;而家仲話唔會再理華星啲嘢,之後都唔再返餐廳。」知情者說。

Eddie被爆偷嗒曾在電影《賭城風雲》系列做大茄的「長腿 G.E.M.」陳惠敏,她常在 ig低胸晒料。

早前 Eddie同朱慧敏去買金器,很捨得花錢在婚禮上,無非想女友嫁得風光。

朱慧敏:有問題要處理

朱慧敏透過 WhatsApp回覆本刊,表示跟 Eddie有問題要處理,但有考慮接受婚前輔導。

對於出走美國,朱慧敏並沒否認,但只透露會去外國走走。

上門求饒

過去朱慧敏亦曾自爆和男友意見不合,搞到嗌晒交。「我哋真係鬧到爆,乜嘢都鬧,如果有人搵我拍籌備婚禮真人騷,我真係唔介意,原來有好多學問,又好煩,我同 Eddie講過不如唔好結!」

事實上,在偷食斷正前,二人已冷戰一個月,朱慧敏不但拒接男友電話,更封鎖了 WhatsApp,又將他的個人物品 pack箱,送回對方大埔老家。其間 Eddie曾到過朱慧敏位於清水灣半島屋企求和,但她堅拒開門。

「兩個人相處有問題,尤其係大家拍住搞食肆後,情況更明顯。 Queenie自細冇咗爸爸,十年前媽咪又過咗身,習慣咗靠自己,所以性格好強,佢會嫌 Eddie唔夠獨立,成日要聽朋友意見冇主見。但 Eddie其實已經好努力,對女友做咗好多嘢,令佢好大壓力,好似搞結婚,買咗隻十萬蚊鑽戒求婚,又用四萬幾買件裙褂,仲喺四季訂咗三十幾圍,想 Queenie嫁得好好睇睇!」

Eddie唔算有錢,但願花十萬買求婚鑽戒給朱慧敏。

Eddie和朱慧敏拍拖三年多,感情一直很好,可惜為婚禮炒大鑊,又衰偷食,有可能斷送這段感情。

冷靜三個月

籌備結婚變冷戰,唔想做錯決定的朱慧敏,決定先冷靜諗清楚。

「 Queenie上月廿二號三十四歲生日都冇同 Eddie一齊過,反而因今次偷食斷正,上個禮拜六(十六日),兩個人有通過電話。大家都知 Queenie未想分手,但佢真係冇晒安全感,亦唔知點行落去,所以寧願撻咗嗰幾十圍酒嘅訂,唔想有個期限,令大家有壓力。 Eddie提議做婚前輔導挽救, Queenie初步都同意,但無論如何,佢月尾就去美國,嗰邊有表妹陪住佢,話想用三個月時間,諗清楚先。」知情者說。

朱慧敏回應本刊時,亦承認考慮接受婚前輔導。

「 Eddie係個心地善良嘅人,但我個人認為婚禮有需要延期,一定要先處理好目前嘅問題,先可以走入人生新階段。每段關係都有甜、酸、苦、辣,問題出現咗,就需要處理同面對。我哋嘅態度都係積極,會盡最大努力去維繫同解決。」問她是否將出走美國避 Eddie,「我可能去外國行吓,地點仲未決定。」朱慧敏說。



爆出偷食𡃁模後,為箍煲的 Eddie即發聲明,承諾會檢點之外,還因又煩朱慧敏為佢解畫講對唔住。

去年底,有未婚夫 Eddie教做生意,入股開餐廳的朱慧敏親力親為,朝早返鋪企包檔,兼做收銀,一臉夫唱婦隨的模樣。點知今日兩人鬧翻,女方冇返餐廳個多月,打算拆夥。

當日華星客棧開幕時,朱慧敏開心入股做老闆娘,有份剪彩的梁漢文本來更為其婚禮任兄弟,可惜現在一切煞停。

Eddie:盡力挽救

同朱慧敏恢復聯絡後, Eddie公開承諾戒蒲戒酒。本週一(十八日)晚,跑完步返屋企的他承認上週終有機會,與女友傾電話。

「主要係傾番我哋一直存在嘅感情同婚禮上嘅問題。大半年前即係訂婚之後,我想快啲搵多啲錢,令個婚禮搞好啲,亦有啲嘢忽略咗 Queenie嘅感受,另一方面,佢亦理解我好大壓力,大家好感觸,點解因為搞婚禮會出現咁多磨擦。」 Eddie說。

朱慧敏決定避走美國冷靜三個月,對於會否飛到美國繼續箍煲, Eddie說:「唔會飛過去!我知佢採取觀望態度,大家由冷戰進入冷靜期,想靜吓。」

女友主動取消婚期,但 Eddie仍未放棄,還聲稱想跟朱慧敏做婚前輔導,進一步挽救雙方感情。

「我哋有共識,大家都想去做,想前路幸福開心,總之有任何可以挽救方法,都盡量去試。」 Eddie說。

今年初, Eddie被網友爆夜店攬韓妹,偷食有前科的他仍得女友維護,輕易過骨。未幾他更求婚成功。

日前再爆偷食𡃁模陳惠敏後,面對傳媒解畫的 Eddie堅稱冇出軌,但承諾戒蒲戒酒。

今年二月,鐵定婚期的他們 sweet到淺水灣酒店物色婚宴場地,豈料因籌備婚禮搞到冷戰多時,喜事變憾事。

渴望有個家

○四年港姐亞軍朱慧敏,父母自小離異,隨母親長大的她一直受到好好照顧,物質不缺!芭比公仔多到唔想玩,著嘅用嘅都是貴嘢,又可以去美國迪士尼度假。但當媽咪(圖)、外婆和阿姨都因乳癌過身,一度令她感到十分恐懼和無助。

「媽咪同阿姨 48歲就唔喺度,婆婆就 63歲走,我 24歲做過測試,自己都有同樣基因,搵過美國同香港醫生傾過,當時亦考慮切除乳房,但醫生建議我生咗小朋友先,因為切咗就唔可以餵人奶。」朱慧敏說。

因此,朱慧敏一直渴望有自己的家庭,但之前同台灣闊少 Rick Chang拍拖,對方衰偷食;未婚夫 Eddie更在婚前被踢爆同女繑手過夜,企硬將婚期煞停的她,要孤身出走美國。

婚訊變分訊

產前有憂鬱,婚前一樣會恐懼!定下婚期後,不少準新人都會為籌備婚禮出現意見不合,嚴重到臨門一腳,婚訊隨時變分訊。

楊明 撻 Q

12年宣布同拍拖三年的圈外女友 Joanna結婚,婚期定在 13年 10月,酒席訂好晒,又花幾十萬翻新寓所做愛巢,但籌備婚禮期間二人吵大鑊,一班戥穿石陳智燊、徐榮等在婚禮三個月前收到通知,婚事告吹,二人亦分手收場。

C君 撻 Q

組合農夫的 C君, 12年打鑼打鼓訂好酒席準備做老襯,豈料臨門一腳卻遭女友以不能接受另一半有先天地中海貧血病為由悔婚,原來女方偷偷搭上 C君好友,令娶唔成老婆的 C君一度情緒崩潰。

王浩信 過骨

11年擇好 11月 11日「六條一」結婚的王浩信,婚前一個月被踢爆偷食陳冠希舊菜 Cammi(謝芷蕙),據悉陳自瑤雖然嬲爆,但奉子成婚的她焗上艇,令婚前偷食的王浩信順利過骨。

鍾意就快D Share啦!
Related Posts Plugin for WordPress, Blogger...