掃呢頁CODE去手機

2015年5月28日 星期四

加強戰意 爆肌男狂操唐貝詩 [壹週刊 - 1316] 唐貝詩,M1,



探熱針

加強戰意 爆肌男狂操唐貝詩

去年簽約中國 3D數碼公司,正式入娛樂圈的寇鴻萍大女唐貝詩( Lydia),作為藝人二代,先天人脈廣,但為了十拿九穩,早已有空手道底子的唐貝詩決定再加料,近日搵到個世界先生教路,日操夜操,加埋瑜伽、跳彈床兼減食量,一星期達標,減走十磅。

冇得偷懶

已經二十六歲的唐貝詩,大學畢業後一直在媽咪寇鴻萍的網購公司做 CEO,去年底才離開母蔭闖娛樂圈,本身是空手道啡帶段的她,早已決心靠打開路,亦明白機會只留給有準備的人,為進一步加強戰鬥力,唐貝詩搵了個朱古力肌教練 Andy狂操。

「個教練好嚴,次次做兩粒鐘,一個鐘做肌肉訓練,另一個鐘跑步,佢全程喺隔籬𥄫到實,唔俾機會我偷懶。教練操過好多 artist,有次幫個新人歌手(謝偉倫)喺一個月時間內減咗五十磅,我跟咗佢做 gym幾個星期,最初自己唔夠勤力,而家晚晚操,一星期減咗十磅。」唐貝詩說。

為火速操 fit,唐貝詩找來一身爆肌,去年在健身賽獲銀獎的教練 Andy催谷。

同唐貝詩操完, Andy索性將佢當人肉啞鈴咁舉,十足力王一樣。

驚變厭食症

狂操減食唔錫身,但媽咪寇鴻萍依然認為她唔夠勤力。

「媽咪要求好高,佢話娛樂圈嘅女仔個個都好瘦,我根本未達標!而家我戒鹽戒油,每餐食烚菜白肉,夜晚仲要再食少啲,朋友都擔心我會變厭食症!」

公司揸弗人變新人,收入大減,唐貝詩卻認為是一個好時機。

「我一直都想入行,而家跟老師上緊演技班,自己又成日去睇戲,希望可以盡快上手。其實兩年前都想行呢條路,但當時未搞好自己情緒,有啲反叛,尤其媽咪話我唔啱,就偏偏唔聽,加上拍拖都影響心情,反而甩拖個人情緒好好多,我已經成年冇拍拖,更加可以專注做嘢。」唐貝詩說。

信主的她早前受浸,一家到場撐之外,教友周慧敏也來打氣。

唐貝詩跟毛玉萍兒子 Eric拍拖三年,在 11年分手,之後也被拍到跟新男友行街睇戲,但她從未承認。

日操夜操,唐貝詩經常搞到手腫腳腫。

減肥雙管齊下,午飯只有白烚西蘭花加雞肉。

近日也有出席公司新戲《壹獄壹世界》的宣傳活動。

冇問鄭裕玲

希望做出成績,但唐貝詩未有向功力深厚的契媽鄭裕玲取經。

「決定入娛樂圈前我都冇同契媽傾過,不過我知佢一定會支持!我哋平時都係傾女仔嘢,之前同男朋友分手,反而有問契媽意見。而家嘅我,好清楚自己要啲乜,好似搵男朋友,最緊要係有共同興趣,例如鍾意做運動,大家可以一齊做最好,如果唔係,大家根本好少時間見到面。」唐貝詩說。

11年,寇鴻萍投資的網上購物公司開張,鄭裕玲也有到賀,當日仍是學生的唐貝詩,打扮靚靚跟契媽影合照。

10年回港度暑假,她喜歡跟一班富二代如何超盈,及 Moiselle太子爺陳柏熹去 P。

「盆景貓」事件後,契媽鄭裕玲特登約了她出去食飯傾偈,媽咪跟妹妹唐貝欣也有出現。

跟前港姐周美欣十分老友,二人經常相約一齊睇戲出席首映。

年少無知

Lydia唐貝詩 11年於英國 University College London工商管理系畢業後,回港幫寇鴻萍打理投資二千萬的團購網站工作,去年決定入娛圈做新人。

Lydia最為人知是於微博上載一張把小貓塞在奶樽的照片,自稱已訂購了「盆景貓」惹來圍插,更被網民賜封「盆景詩」。重提舊事,她說:「年少無知,當時係個超級勁爆大誤會,中學時聽過有呢樣嘢,我當時係取笑朋友,扮話自己都買咗,而家梗係唔會咁做。」

拜名師

為唐貝詩操肌的健身教練 Andy Wong,去年曾奪 IFBB「 International Bodybuilding& Fitness Invitation Championship」銀獎,一身爆肌吸引藝人黎諾懿、何雁詩等追隨,並由肉騰騰操到結實。

黎諾懿

前:去年趕上加入「肌佬」行列的黎諾懿,現身健身比賽為教練打氣。

後:在 Andy指導下,花三個月操到一排朱古力、 43吋胸,即吸引廣告商找他與張繼聰拍減肥產品廣告。

何雁詩

前:身材向來圓潤,今年三月拜 Andy為師,誓要踢走手臂拜拜肉。

後:經過近兩個月的操練,身材明顯結實晒。

陳樂基

前:去年參加《中國好聲音》打入 16強的香港歌手陳樂基,操肌前一條柴。

後:狂操之後,手臂爆肌,一條柴變大隻基。

謝偉倫

前: Andy的得意門徒,健身前是 180磅肥仔。

後:一個月成功減走 50磅,仲有埋人魚線,型晒!

唐紫睿

前:吳浩康舊愛唐紫睿( Hazel),操前得上圍有睇頭。

後:經過一輪催谷,身材變纖瘦又平均。

鍾意就快D Share啦!