全城熱爆的娛樂八封新聞 & 時事趣聞 & 生活 + 趣聞
恤衫絲巾都係 Leonard Paris嘅許老太，個樣霸氣十足，李嘉欣要招呼呢位非常奶奶，肯定要打醒十二分精神。
幾貴幾辣嘅車都好，長期唔郁，同廢鐵冇分別，一定要久不久揸吓，撻吓副 engine。人都一樣，一日到黑車出車入，腳唔掂地，就算食幾多補品，副偈都玩唔耐。深明此理嘅，有李嘉欣奶奶許簡劍勳。由太子大廈穿 Landmark行返去家族持有嘅中建大廈，要兩個人一左一右做人肉枴杖，花多一般人幾倍時間，許老太一步一步慢慢行，都要俾啲骨頭運動吓。
許老太出巡似太后起駕， 89歲嘅仙姐白雪仙就精靈得多，除咗日日打幾圈保持頭腦靈活，亦會約吓朋友下午茶。早排《壹》仔見到仙姐繑住個男仔，去銅鑼灣利園二期 Cova三點三。其實以仙姐嘅狀態，唔使人扶一樣得，搵個人做扶手棍，純粹係穩陣計。都啱嘅，老人家真係唔跌得㗎！
唔想年紀大機器壞，許老太就算要用兩個人借力，都自己一步一步行。
搭扶手電梯上去 Cova飲茶，仙姐一手繑住身邊人，一手扶實扶手，安全至上。
