2015年5月20日 星期三

玩 3D追韓星 港澳影相新蒲點 [FACE - 417 - 數碼科技] MF,



爬大三巴牌坊

呢幅澳門地標大三巴牌坊,明眼讀者一睇就知其實係鋪喺地面, model Hayden趴喺上面扮嘢,就影到爬緊大三巴嘅效果, easy job!不過要注意雙手一定要前後分開放先會似。

Geek友講場

玩 3D追韓星 港澳影相新蒲點

唔淨係香港人,家陣全世界嘅人去到邊度都要 selfie打咭,周圍話比人知自己去咗邊度玩同玩咗啲乜!《 FACE》素來知道讀者鍾意捐窿捐罅搵玩樂好去處,聽聞澳門就快有間新 3D展館開張,記者梗係立即叫埋 model過大海試玩吓,介紹畀大家之餘,又可搶先上 facebook打張咭先!嫌 3D展館都未夠立體嘅話,仲可以上番香港山頂蠟像館,直頭攬住最新嘅韓星蠟像合照,韓飯一定 like!坐言起行, gogogo!

影盡澳門最立體一面

香港嘅 3D館已經開到成行成市,比人打到咭嘅地方都已經打晒!點算好?唔怕!因為澳門新呢間「 3D奇幻世界」,佔地有成 18,000呎,仲有 6個唔同主題展區任你揀嚟影! Model Hayden話佢最 buy澳門景點呢 part,布景畫得夠立體之餘, 3D效果設計仲幾獨特,你睇佢玩得幾盡興就知

露台 chok睇夜景

Hayden話影露台加夜景嘅指定 pose,一定係 chok樣!事實喺呢個「全世界最安全」嘅露台上面,擺咩 pose都一樣有效果,仲要見埋澳門煙花夜景,正!

被射出的人肉炮彈

其實呢張相 Hayden都係瞓喺地下影,成個構圖係澳門大炮台將佢呢粒「炮彈」射出嚟! Hayden話頭髮一定要整到豎起,再加埋抱膝,咁就堅似噴射緊嗰種效果!

扮 King Kong攀旅遊塔

呢座澳門旅遊塔係全館最有立體效果嘅 3D畫, Hayden見到即時聯想起 King Kong攀帝國大廈,大家一定要試攀!

飛出嚟嘅豬肉乾

去澳門一定要買手信!買手信!豬肉乾就係不二之選! Hayden話呢塊豬肉乾畫得超逼真,真係好似飛出嚟咁!大家記住想影得似,就一定要擺啱手位!

一拉見晒澳門景點

玩得 3D畫,寫實派邊夠過癮?呢幅大拉鍊畫一拉開,就見盡澳門主要景點,有旅遊塔、澳門教堂、大炮台、盛世蓮花、大三巴、觀音像、媽閣廟,真係忍唔住唱多句:「景緻真優美!」

澳門十六浦 3D奇幻世界

開幕日期: 5月 21日

開放時間: 10:00am-08:00pm

地址:澳門十六浦度假村 2及 3樓

票價: MOP$188/  MOP$120( 3-11歲小童)

查詢:http://www.pier16macau3dw.com

遊澳門資訊:澳門幣( MOP)跟港幣匯率為 1兌 1。上環港澳碼頭每日有多班噴射飛航船往返澳門,票價為$164至$200。

影恐龍玩恐龍

澳門呢間 3D奇幻世界其實仲有「法式風情」、「浪漫戀人」、「中華文化」等主題,不過 Hayden覺得繼「澳門 3D之旅」後,最想影嘅係「 3D侏羅紀」!點解?因為延續 22年前經典《侏羅紀公園》嘅新作《侏羅紀世界》( Jurassic World)會喺 6月上畫吖嘛,恐龍熱肯定會翻 hit,梗係要影定相先

而且喺「 3D侏羅紀」展區入面,唔只有恐龍 3D畫影,仲有互動恐龍遊戲玩,所以一定要介紹!不過遊戲專區暗過其他 3D展區好多,記者都嚇到大叫,小朋友要小心呀!

恐龍追殺

喺恐龍時代見到恐龍是常識吧!影呢幅 3D畫嘅技巧係要踩住木條越過地上熔岩,同埋好似 Hayden咁擺出極度驚恐嘅表情先有效果!

左右夾攻

恐龍主題館入面,會有好多立體小恐龍真係凸出嚟,令張相更有立體感,再加埋 3D畫背景,參觀者睇落就好似俾大小恐龍左右夾攻咁!

衝嚟食你

2樓遊戲專區呢塊屏幕本來一隻恐龍都冇,但一有人坐上前面條木條,勁多大小唔同品種嘅恐龍就會走晒出嚟,好似想食你咁款,小朋友可能會好驚,提防!

嚇你一跳

由 3樓經扶手電梯落到 2樓互動恐龍遊戲專區,就會見到呢隻疑幻似真嘅暴龍,佢仲設有感應系統,有人行過就會大叫同猛郁,暗暗哋連嚇咗記者兩鑊!

了解故仔

因為場內嘅恐龍 3D畫實在太多,想影到好效果,一定要了解清楚幅畫嘅故仔先!不過現場都會有專人教你點影,所以唔使擔心!

以 3D懷念 MJ

Michael Jackson雖然就快離開咗我哋 6年,但 King of Pop呢個榮銜係永垂不朽!而澳門十六浦酒店不嬲都有用 MJ作招徠,例如開咗 MJ Cafe同 MJ珍品廊,所以趁住今次開埋 3D館,再搞大啲打造出全球首個 MJ 3D畫展,都係好合情合理嘅事, MJ迷冇理由唔去朝聖啦?

懷念黑面

最大幅嘅畫係呢幅〈 Thriller〉!嗰時 MJ仲係黑面,真係好值得懷念!

必 check 45度

MJ最出名嘅 45度傾斜畫係必 check位!不過呢幅畫冇專人指導, Hayden同攝影師哥哥研究咗勁耐先影到好效果,好考 MJ迷攝影技術!

瘋狂 selfie

一入 MJ展,就見到 8幅不同造型嘅 MJ畫, MJ迷可以同偶像瘋狂 selfie!

山頂擁抱  5大韓星

由澳門返到香港主場,想搵打咭影相景點當然大把有得你揀,但既然《 FACE》讀者有唔少係韓飯,咁梗係推介能夠親近韓星嘅地方畀大家!上山頂吧!事關香港杜莎夫人蠟像館剛開咗個「韓流專區」,入面有 5位韓星嘅蠟像「企定定」等住俾大家集郵,包括金秀賢、裴勇俊、 2PM嘅 Nichkhun,同埋東方神起嘅鄭允浩同沈昌珉。平時想野生捕獲呢 5位韓星,機會近乎係零,就算收晒風去追星,都唔使旨意埋到身,而家有佢哋 5個像真度超高嘅蠟像畀大家近距離朝拜,仲直頭任大家攬添喎,袋住先

試韓服

韓流專區主場景唔只布置成明洞購物街咁款,仲學埋當地啲時裝鋪設置虛擬試衫系統,畀參觀者睇吓試着傳統韓服嘅效果。

扮韓星

專區另一邊廂仲設有 K-wave跳舞機,有得畀參觀者着上閃令令嘅舞衣喺台上跳舞,享受吓自己做 K-pop明星嘅快感。

金秀賢

5大韓星中,金秀賢應該係最多粉絲嗰個,所以韓流專區特別將展場其中一角布置成《來自星星的你》都教授間書房,畀大家重溫呢個場景同金秀賢個齊蔭頭,新劇《 Producer》已經轉晒 look喇!

沈昌珉 Max、鄭允浩 U-Know

雖然 6月東方神起又會喺首爾開演唱會,等唔切嘅話,都可以即刻去睇住蠟像先。尤其近排成日傳允浩就快入伍,可能有排見唔到佢,有個蠟像留念好緊要!

Nichkhun

早排 2PM Nichkhun幫 Emporio Armani影咗輯內衣相大晒腹肌,搞到班 fans勁興奮,但係對住佢個蠟像,千祈咪好似網上流傳啲強國人睇蠟像咁,又剝佢件衫又錫佢呀!

裴勇俊

剛剛宣布即將迎娶女星朴秀珍嘅裴勇俊,佢個蠟像雖然唔係新,但行得韓流專區,同佢合照多次又何妨?傾慕佢嘅 fans亦可以對住佢個蠟像哭訴,話晒佢婚後可能會減少曝光嘛!

崔始源

其實韓流專區仲即將有第 6位韓星蠟像駐場,就係 Super Junior崔始源!之前佢仲親身飛嚟香港主持韓流專區開幕禮,而佢個蠟像將會喺下半年登場,粉絲們要留意實喇!

香港杜莎夫人蠟像館韓流專區

開放時間: 10:00am-10:00pm

地址:香港山頂道 128號凌霄閣 P101鋪

價錢:$245/ $175( 3-11歲小童及 65歲或以上長者)

查詢:http://www.madametussauds.com/HongKong

鍾意就快D Share啦!
Related Posts Plugin for WordPress, Blogger...