掃呢頁CODE去手機

2015年5月28日 星期四

獨家直擊 水中分娩 洗米華全程陪產  Mandy 5.20倫敦生女 [壹週刊 - 1316] 洗米華,Mandy Lieu,Mandy,周焯華,M1,



Mandy生完 B休息唔夠十個鐘就出得院,一家三口齊齊返屋企。

娛頭

獨家直擊 水中分娩 洗米華全程陪產  Mandy 5.20倫敦生女

洗米嫂陳慧玲精心部署,為安排腹中洗米仔,同老公洗米華(周焯華)五月三十日生日出世,不惜將剖腹分娩吉日調前。但世事往往出人意表!英國時間,上星期三 5.20「我愛你」的日子, Mandy Lieu在周焯華全程陪產下,採用水中分娩方式,已為男友誕下一名女嬰。一直被質疑流料,冇肚扮大肚的指控,水落石出。

順產加上 Mandy長期保持運動,產後復元速度快得驚人;生完在醫院休息唔夠十個鐘,已經可以出院,仲要零走樣健步如飛。一家三口離開醫院時,周焯華雙手抱實 BB,細心呵護,充分流露父愛。

比預產期遲咗幾日

兩星期前(五月十一日), Mandy Lieu在 Instagram post了張倫敦風景相,當時周焯華同樣人在英國,陪住隨時生得的女友。據知預產期原本是五月中,但 BB遲遲唔肯出世,周焯華又臨時有公事,必須親自處理,五月十五日他返港一行,三日後(十八日)再搭夜機 BA28,撲往倫敦陪 Mandy生 B。

周焯華抵達倫敦,已是當地時間五月十九日清晨六點,一落機,第一時間飛車直奔往位於馬里波恩( MaryLebone)的 The Portland Hospital,落車急扯兩啖煙後,即疾走入醫院,搭𨋢上房。

在醫院期間,周焯華每隔一段時間就落街煲煙,一路煲一路擔天望地,雖然已經有過兩次經驗,但再做老豆的他,神色看來依然有點緊張。

肉緊抱 B

洗米華相當緊張 B女,全程用雙手攬到實,抱住囡囡的時候,流露住一副慈父樣。

Mandy迅速復元,出院時已經十分靈活,甚至自己打開車尾箱。

由佗 B到生 B, Mandy身形都冇乜走樣,出院時仍然著住低胸衫,唔怕入風。

坐車期間,洗米華(箭嘴)一直護住 B女,側晒身攬住張 BB椅。

水生好處

西方人早已逐漸流行水中分娩,是另一種自然分娩的選擇,產婦在水中順產,過程中,新生兒的頭部必須是完全浸在水中,直至身體完全離開母體,才抱出水面。水中分娩好處多,可以縮短產程時間,減輕產婦待產帶來的痛楚,有助盆骨肌肉放鬆,產傷最少,產婦的身形也可以迅速恢復;至於是否適合進行水中分娩,要由醫生及助產士作最終判斷外,胎兒最好在 3000克至 3500克左右,而孕婦最佳年齡為 20至 30歲,胎兒巨大、肥胖產婦等絕不適合。

勁掃 BB用品

中午十二時,司機送他離開醫院,大約兩小時後折返;落車時見周焯華手上攞住四大袋 Harrods百貨公司購物袋,同行一名女友人又攞住三大袋,當中包括有食物、一些 BB衫褲及日常用品。

「其實之前已經準備好晒啲嘢,不過華哥好緊張同 Mandy生呢個 BB,所以好多時都要自己親手揀,俾 BB嘅乜都要買最好,去到 Harrods見到啲靚嘢,所以又買咗一大堆,廿四孝老豆。」知情者說。

第二日,周焯華在下午兩點離開醫院,同樣去了 Harrods,買外賣俾 Mandy食兼再掃多一袋 BB用品;其時,他的神情也比前一日輕鬆得多,經常面露微笑,相信應該是 Mandy已經順利生 B。

肉緊 B女攬到實

果然,在傍晚六時三十分,便見到周焯華雙手抱住 BB行出醫院, BB著住一套淺灰色長袖衫褲,頭戴一頂布滿粉紅色花花帽仔,身上外加一條粉紅色波點毛巾,從 BB的造型看,相信是 B女; Mandy佗 B以來,肚皮超細碼,但以 B女身長估計,應該有六磅半以上。

抱住初生 B女,猶如捧住珍貴雕塑的周焯華將 B女放到後座 BB座位上,為了令女兒舒舒服服,他又不停調校座椅。至於與男友著住情侶裝、全身黑色衫褲的 Mandy亦步出醫院,紮住馬尾、左手攞住黑色 Celine Luggage Bag,右手拎住個奶樽袋的她,手上仍戴住病人手帶。雖然產後不久,但動作敏捷,甚至自己郁手,打開車尾箱放好物品。

現場所見,啱啱生完的 Mandy沒有出現產婦常見的浮腫影響,身形亦只比未懷孕前肥了一點,大褸之內是低胸衫,完全沒有產婦坐月不可以吹風的禁忌,鬼妹作風,我行我素。

將手上物品放好車尾箱後, Mandy自動波坐上車頭,讓周焯華陪住 B女坐後座,只見他全程攬實 BB椅,唯恐行車期間會整親愛女,十分肉緊。

21/5錫住送機

BB出世後一日,洗米華因公事要趕回香港, Mandy親自到機場送機。

臨走前,洗米華攬實 Mandy,兩人嘴了一啖,難捨難離。

洗米華步入機場前,不時擰轉頭望住車上的 Mandy,個樣好唔捨得。

19/5

Mandy在醫院準備待產,洗米華與一名友人出外買外賣,以及親自揀選了大批 BB用品俾囡囡。

煙癮大的洗米華,間中都有離開醫院外出叉電。

18/5

趕住飛倫敦陪 Mandy的洗米華,在香港 check-in期間,電話未離手,傾得十分雀躍,未知是否同 Mandy傾緊偈。

埋單過廿萬

The Portland Hospital是倫敦一間最有名和唯一完全私立的婦產醫院,強調安全及質素,提供一級的服務,醫院擁有八十多個經驗豐富的助產士及產科醫生顧問,大部分亦在倫敦的頂級 NHS醫院擔任要職。除了自然分娩、剖腹生產外,醫院還提供水中分娩,分娩費用約為港幣 77,000元( 6,500英鎊),產科顧問會因應孕婦情況,提供一個最合適的分娩方法。

此外,醫院擁有頂級的設施,獨立套房、私人購物助理、 24小時酒店式服務,住房每晚約港幣 23,000元( 1,950英鎊)。而助產士及顧問費則約為港幣 11萬元( 9,500英鎊),頂級服務頂級價錢,保守估計, Mandy就算極速出院,都要 22萬埋單。

全英國最好

經本刊進一步了解,醫院方面證實一名叫 Mandy Lieu的產婦,在五月十九至二十日期間入院。據悉 Mandy選擇到這間醫院生 B,原因是醫院的水中分娩設施,是全英國最好,因為 BB比預產期遲了幾日出世,撞正是「 5.20我愛你」的日子,唔擇日,聽由上天安排,有意思。

自然水中分娩的 Mandy復元得相當快,生 B後休息唔夠十個鐘已經出得院,只是稍遜於英國王妃凱特,由作動入院到出院,僅十二小時的記錄。

去年十二月, Mandy入養和醫院,有報導指當時她已懷孕四個半月。(《蘋果日報》圖片)

5月 11日 Mandy在 ig放了一張倫敦風景相,據知當時已踏入原本預產期的階段。

因為 Mandy有做開運動,所以生 B同復元速度都比較快,而且大肚都可以保持身形纖瘦。

返回香港後,洗米華又要迎接同 Heidi所生的 BB,日前他們全家人由澳門來港準備生 B。

狂錫唔捨得

礙於有公事要返香港和澳門,加上又要準備迎接洗米嫂的 BB出世,所以 B女出世第二日,周焯華又馬不停蹄趕回香港,體恤男友的 Mandy亦有去送機,臨行前,兩人難捨難離,攬到實來一個 goodbye kiss,周焯華更不時回望已在車上的 Mandy,表現極不捨得。

本週二(五月二十六日),記者向 Mandy Lieu經理人公司負責人 Marie問回應,她表示:「藝人嘅私事,你哋最好問番 Mandy同周生,我哋冇嘢可以公布。(之前話 Mandy係有咗七個月,今次專登提早生?)其實 Mandy一直都冇公開話過有咗,係啲傳媒一時話佢有咗,一時又話佢冇,一時又話佢假大肚,之前話佢七個月都係你哋話之嘛!都冇經 Mandy證實過。(依家咪向你求證。)唔好意思,真係冇嘢答到你,你都係搵番 Mandy同周生喇。」

鬥快出院

女人最痛!孕婦經歷馬拉松式的佗 B過程,再要面對漫長的陣痛,辛苦之處,絕非局外人所理解,懷胎十月後,可以火速出院返歸,真係睇你有幾本事。

凱特

英國威廉王子太太凱特月初在倫敦誕下小公主,早上 6時作動入院,兩個半小時後 B女出世,同日傍晚 6時,王妃便由威廉王子陪同下,抱着小公主出院,由作動入院,到分娩出院,僅僅 12小時。

陳茵媺

成功三年抱兩的陳豪陳茵媺,今年大年初八細仔 Nathan Lucas出世後短短兩日,豪嫂 Aimee便親自抱住細仔出院;生完僅僅一星期,坐月期被拍到犯禁蒲出街,四圍 shopping。

李英愛

11年, 40歲的韓星「大長今」李英愛,在首爾誕下龍鳳胎,雖然是高齡產婦兼懷孖胎,但李英愛堅持選擇自然分娩,更在產後短短兩天火速出院,轉到高級的療養院坐月。

鍾意就快D Share啦!