掃呢頁CODE去手機

2016年1月14日 星期四

大阪做妹仔 黃翠如侍候蕭正楠全家 [壹週刊 - 1349] __,翠如,蕭正楠,正楠,黃翠如,M1,

餵埋入口沿路邊行邊掃街邊小食,黃翠如將燒年糕餵入男友口。娛頭大阪做妹仔 黃翠如侍候蕭正楠全家拍拖兩年,蕭正楠公開落大訂娶黃翠如,雖然穩做「蕭家新抱」,但翠如BB未有掉以輕心,對男友家人加倍重視。早前,蕭正楠和屋企人舉家到大阪旅行,女友隨團出發,準新抱全程人釘人,對未來奶奶照顧周到,又做埋領隊編排行程。六日五夜大阪之旅,女神零化妝真面目示人;人在外地,翠如BB和男友又拖又攬,當街互餵,全無戒心。漸進 ...


餵埋入口

沿路邊行邊掃街邊小食,黃翠如將燒年糕餵入男友口。

娛頭

大阪做妹仔 黃翠如侍候蕭正楠全家

拍拖兩年,蕭正楠公開落大訂娶黃翠如,雖然穩做「蕭家新抱」,但翠如 BB未有掉以輕心,對男友家人加倍重視。

早前,蕭正楠和屋企人舉家到大阪旅行,女友隨團出發,準新抱全程人釘人,對未來奶奶照顧周到,又做埋領隊編排行程。六日五夜大阪之旅,女神零化妝真面目示人;人在外地,翠如 BB和男友又拖又攬,當街互餵,全無戒心。

漸進式入侵

去年成功踢走何傲芝,由「小三」變正印後,黃翠如開始布網,逐步入侵蕭正楠的生活圈,半年前更搬埋入男友位於華景山莊寓所,開始試婚生活。

成功入屋後,翠如 BB開始發揮港女本色,除了丟清前度何傲芝用過的舊傢俬,更廿四小時掌握男友行蹤,嚴陣以待。

另方面,翠如 BB深知男友是孝順仔,將來要正式做蕭太的話,必先過「未來奶奶」一關;機不可失,積極安排大阪之旅外,為求讓老人家更接受自己,出發當日,搭早機的翠如 BB即使面青青眼腫腫,照樣零妝出動,亦唔願在準奶奶前,整色整水!

導遊

安排行程又做埋隨團攝影。

一份燒餅成家人分享,黃翠如連男友屋企人口水尾都唔介意,成功融入家中。

拖喼

六人自由行

去到大阪已是當地時間下午三點,自由行之旅正式展開。一行六人攞住地圖周圍向當地人問路,搞了差不多大半個鐘,才成功買到正確路線車票,到下榻的酒店。

家族旅行,但翠如 BB一開始已和男友的胞妹混得極熟,二人雞啄唔斷,翠如 BB更主動攞行李,埋櫃位辦理登記入住手續,領隊一樣。之後各自上房,小休半小時,再出動去附近超市,上定酒店房所需糧水。

爭取時間玩盡啲!翌日一早,一行人先到一間平價牛肉飯店食早餐。沿路上,蕭正楠同女友時不時停低自拍,但他未有顧此失彼,每次過馬路,例必一拖二,一手搭住媽咪膊頭,另一手則拖住女友。

下個目的地是有「大阪人的廚房」之稱,是當地最平藥妝店和零食店所在的黑門市場,拎住旅遊指南的蕭正楠一馬當先帶路,翠如 BB就負責照顧一班團友。

大阪之旅,翠如 BB冧掂男友媽咪,過關攞到「蕭家新抱」准許證。

安排行程又做埋隨團攝影。

每到一個景點,二人例牌頭貼頭自拍。

由大阪出發去京都參觀神社,蕭正楠順道祈福。

六日五夜舉家之旅,蕭正楠、黃翠如並無離隊,只不時爭取片刻二人世界機會。

當眾互餵

行程第三日,一行人如常十點鬆啲出發,到酒店附近的烏冬店食早餐,蕭正楠同翠如 BB一碗兩份食,你一啖我一啖, sweet爆!

醫完肚,行去 JR站搭車前往位於京都市的「伏見稻荷大社」觀光祈福。一個小時的車程中,翠如 BB全程挨住男友肩膊,小鳥依人般。

到達目的地後,蕭正楠急不及待拎出「自拍神棍」影全家福,翠如 BB亦化身大隊攝影,攞住電話幫男友媽咪和胞妺邊行邊影,殷勤到呢!

在神社內走馬看花一遍後,一行人在附近的小食檔買了一份地道燒餅炒麵,一家人每人一啖分享;翠如 BB又走去另一檔買串燒,同男友當眾互餵!

在大阪放完電,返到香港當日,二人重啟戒備程式,戴晒口罩兼前後腳出閘。

推住一車行李的蕭正楠打頭陣,女友殿後,負責照顧未來奶奶。去到停車場,翠如 BB一直低頭㩒電話,蕭正楠一手包辦搬行李上車,之後同車離開。

蕭正楠一手搭住媽咪,一手拖住女友過馬路。

見黃翠如同媽咪及細妹相處融洽,蕭正楠返港後隨即發表「娶硬宣言」,可見未來奶奶已開綠燈。

坐 JR去京都期間,黃翠如全程挨在男友膊頭瞓覺。

早餐一碗烏冬兩份食,你一啖我一啖,勁 sweet!

最錫媽咪細妹

據了解,今次大阪之旅,黃翠如為爭取機會全面融入男友家人關係,主動舉手參與,自稱「旅遊達人」的她,更晒料請纓負責安排行程、訂機票酒店;唔介意六人行伴遊做阿四,黃翠如目標是冧掂男友媽咪,擦住未來姑仔,好等將來順利過關做蕭太。

「 Edwin(蕭正楠)最錫就係媽咪同個妺,今次亦係 Priscilla(黃翠如)第一次同男友屋企人對足咁多日,佢一早睇定晒資料 plan定行程,全程都係觀光同食嘢為主,而且玩嘅食嘅都好平民化,更加冇話好似一般港女咁瘋狂購物。 Edwin同 Priscilla六日冇離過隊二人世界,聽 Edwin講 auntie好滿意,覺得 Priscilla好細心,對老人家好照顧。」蕭正楠身邊人透露。

去到酒店,黃翠如幫手拖喼,又走埋櫃枱 check in,完全唔使其他人操心。

完全改觀

黃翠如成功融化男友媽咪,做蕭家新抱指日可待。近年開始在無綫企穩陣腳的蕭正楠,亦有成家打算,積極儲夠老婆本後,便會向女方家長提出婚事。

「其實 Edwin媽咪以前都唔係咁鍾意 GiGi(何傲芝),想自己將來個新抱唔係做娛樂圈嘅,所以初時對 Priscilla都冇乜好感,但去完今次旅行,就讚佢夠樸素。 Edwin過兩年就四十歲,又係大仔, auntie都心急抱孫,所以佢同 Priscilla都唔會拖太耐!」蕭正楠身邊人說。

第一日去到大阪機場,一行人搞了大半個鐘,才搞清到酒店的路線。

出發前搵定資料編好行程的黃翠如,穩陣帶定旅遊書同行。

去年黃翠如搬入蕭正楠位於華景山莊的寓所同居,二人被拍得啱啱瞓醒落樓,頭髮蓬鬆。

返到香港,二人馬上提高警覺前後腳出閘,蕭正楠先推行李去上車,之後同車離開。

拍拖後,二人連體嬰一樣,出雙入對,融入對方的朋友圈。

進入直路

翠如 BB同蕭正楠的感情由三角關係開始,當中亦有不少風浪,經歷兩年的經營,二人已由同居邁向拉埋天窗,關係進入大直路。

《扮兄妹》

14年 1月,兩人合作《師奶 Madam》撻着,但礙於男方當時尚有正印何傲芝,故刻意以契兄妹相稱,以示沒有發展可能。

《有機可乘》

唔夠一個月,何傲芝夜會大隻男斷正,蕭正楠乘機收車、分手;正在南美拍《走在足球勝地》的翠如 BB積極展開 WhatsApp攻勢,成功坐正。

《變小三》

在蕭正楠屋企纏綿 60小時斷正,男方承認戀情,更力證翠如 BB不是小三,前度何傲芝高調反擊:「邪不能勝正。」

《另築愛巢》

拍拖初期備受各方壓力,原本請了假出埠拍拖二人世界,亦因公司施壓而取消;但翠如 BB並冇放棄,與家人同住的馬鞍山聽濤雅苑的她,另租單位自住,方便和蕭正楠過半同居生活。

《姣花強攻》

拍拖不夠一年,蕭正楠拍賀歲劇《倩女失魂》時遇上逢仔必𠝹的吳若希,姣花積極發功,令兩人一度冷戰「分居」。

《成功補鑊》

拍罷《倩女》後,蕭正楠為安撫翠如 BB,第一時間補鑊,遊東京過二人世界。

《正式同居》

拍拖一年多,翠如 BB終於成功全面侵入蕭正楠生活,一齊住埋。

大眾化為本

蕭正楠和黃翠如 14年被公開戀情後,二人便不再避忌,今次選擇以港人多的大阪、京都為目的地,除了消費較東京平,景點亦較適合老人家,負責編排行程的翠如 BB,絕對有度過諗過。

《大阪黑門市場》

有「大阪人的廚房」之稱的黑門市場,位於大阪市中心日本橋, 81年落成至今約有 170間店鋪,是當地人的傳統購物點,市場每日有新鮮到的甜蝦、長腳蟹、大元貝及大阪名產河豚等海產,數之不盡。另設有熟食、餐廳、日用品店,和全大阪最平、港人最愛的藥妝店,是遊客必到 top 3之選。

《京都伏見稻荷大社》

位於京都稻荷山山麓的伏見稻荷大社,是全日本四萬家稻荷神社的總社,亦是京都市內最古老的神社之一,後山擁有長達 4,000米的鳥居,供人許願捐款,大小鳥居數量驚人,因此被譽為「千本鳥居」,章子怡亦曾到此,拍攝荷李活電影《藝伎回憶錄》。

通關

為入門後有好日子過,不少女藝人捆綁男友為次,都落重藥行奶奶政策為先,融入男方家人圈子,氹掂奶奶,路路暢通。

《熊黛林》

去年搭上家族富貴的郭可盈胞弟郭可頌後, Lynn一直努力融入男友家族,每逢家庭聚會必定現身,對未來奶奶噓寒問暖,過時過節買齊禮物上門,做足禮節功夫,氹得未來奶奶非常滿意。

《蒙嘉慧》

唔定性的鄭伊健,對當年蒙嘉慧逼婚採取逃避態度,其後 YoYo決定向男友父母埋手,經常陪兩老出外飲茶,定時定候陪去旅行,終於打動兩老,自動幫口,二人於 13年拉埋天窗。

《黎瑞恩》

與金利來太子爺曾智明撻着後,為討唔喜歡娛樂圈女子的奶奶歡心, 02年黎瑞恩舉行告別演唱會,並宣布正式退出娛樂圈。

撰文、攝影、攝錄:娛樂組


鍾意就快D Share啦!