掃呢頁CODE去手機

2016年3月23日 星期三

唔明扮明 對黎明又愛又恨 衞蘭重生:你知佢講嘢好深! [FACE - 461 - 專訪] __,衞蘭,黎明,MF,

真人騷唔明扮明 對黎明又愛又恨 衞蘭重生:你知佢講嘢好深!一個時代結束了,另一個時代又再開始。《FACE》的倒數第二個專訪,迎來告別黎明轉投華納、入行15年來第一次以別家歌手身份推出新歌的衞蘭。我和衞蘭的不同在於,專訪做一個少一個,我愈寫愈是捨不得。而衞蘭對於在樂壇的第一個十五年、對於和黎明一起走過的日子,卻在新歌〈穿花蝴蝶〉裡畫公仔畫出腸:「長年被化妝遮蓋我倦容誰人又看得出我也許將要被逼瘋……」 ...


真人騷唔明扮明 對黎明又愛又恨 衞蘭重生:你知佢講嘢好深!一個時代結束了,另一個時代又再開始。的倒數第二個專訪,迎來告別黎明轉投華納、入行15年來第一次以別家歌手身份推出新歌的衞蘭。我和衞蘭的不同在於,專訪做一個少一個,我愈寫愈是捨不得。而衞蘭對於在樂壇的第一個十五年、對於和黎明一起走過的日子,卻在新歌〈穿花蝴蝶〉裡畫公仔畫出腸:「長年被化妝遮蓋我倦容誰人又看得出我也許將要被逼瘋……」 ...


真人騷

唔明扮明 對黎明又愛又恨 衞蘭重生:你知佢講嘢好深!

一個時代結束了,另一個時代又再開始。

《 FACE》的倒數第二個專訪,迎來告別黎明轉投華納、入行 15年來第一次以別家歌手身份推出新歌的衞蘭。

我和衞蘭的不同在於,專訪做一個少一個,我愈寫愈是捨不得。

而衞蘭對於在樂壇的第一個十五年、對於和黎明一起走過的日子,卻在新歌〈穿花蝴蝶〉裡畫公仔畫出腸:

「長年被化妝遮蓋我倦容誰人又看得出我也許將要被逼瘋……」

又會咁啱,見到肥咗又靚咗、說前老闆「講嘢好深」的衞蘭那天,黎明講解自家傳世金句的動新聞剛好推出:「核心,我見到佢嘅外圍,但係外圍裡面一定有內圍,咁內圍如果仲有小核心,你喺出邊鑽咗個窿入去望嘅時候,你依然會見到個外圍, depends嗰個核裡面有幾多個核核,而衍生幾多個外圍同幾多個內圍!」而成段解畫最精彩最畫龍點睛,莫過於黎生 ending嗰句:「清楚晒啦?」

我一邊咀嚼着黎老闆的話,一邊聽衞蘭形容因為不喜歡唱 K歌、不喜歡被包裝出來的形象,十五年來不斷找機會和老闆溝通,卻因為聽不懂黎明的話而不懂裝懂乖乖退下……

33歲的衞蘭,為甚麼會唱「將要被逼瘋」?清楚晒

舊公司令我學識等待。

特別記得有一年等你問回應,好不容易等到,竟然答我:「 Sorry,我唔係 Janice,我係 Jill!」我唔覺我認錯人,但全行得你哋一對 Twins,我都奈你唔何……

哈哈哈……呢個係我哋嘅絕招嚟㗎!哈哈哈……講笑啫……因為我太真喇,我唔會講大話!

阿妹 Jill呢?係唔係比你蠱惑啲?

又唔係喎……不過我哋出世爭三分鐘,性格就爭好遠。我覺得係好嘅,我好容易諗錯隔籬,但佢喺我身邊會令我冇咁灰。

譬如話呢?有咩時候你最灰?

細細個啦,我就俾人笑肥,就算當時我覺得自己已經係最瘦,都係俾人笑……我係到𠵱家,至學識應對呢啲新聞。

欣宜都係咁話,未諗通時上到台淨係心掛掛着呢件衫覺唔覺肥、張相影出嚟條腿粗唔粗,根本個心思就唔喺個表演度……

係呀!我都會!成日懷疑唱得犀利個下巴會好多層,其實根本唔應該咁諗,我覺得個信仰幫我好多,係要享受個 moment,而唔係去擔心啲自己控制唔到嘅嘢……

我又真係唔明,你喺呢行,以前係黎明同 A Music幫你,新一頁係有新唱片公司華納幫你,唔開心係阿妹幫你,就算減肥都要靠自己,乜幫你嘅唔係人咩?實情信仰可以幫到你咩呢?

我相信係神擺呢啲好嘅人喺我身邊,係上帝安排我會感受呢啲安慰。

咁唔好嘅人呢?好似你前男友?(前度 Gordon曾經出賣衞蘭公開親熱照)

唔好嘅人我覺得都係一種考驗,俾我選擇用咩方式,係愛定係恨對呢個人。以前嘅男朋友,我都係人嚟,我都會嬲,覺得有冇搞錯,但時間耐咗你就明再嬲落去係難為自己,既然過咗,再糾纏落去喺嗰個空間冇意思,不如話俾自己聽下次叻小小然後繼續行。

嗰個年代你日蒲夜蒲,男朋友都喺夜店識,同𠵱家嘅你係兩個人?

唔同喇!嗰陣時咁𡃁妹,我𠵱家 33歲喇!就算想蒲都冇 energy喇!以前可以蒲到天光,𠵱家兩個鐘已經覺得音樂嘈,企多陣已經覺得背痛,之前受過傷嘛……好想返屋企瞓覺!

網上圖片

圖片

圖片

仲有呢?過去 15年,除咗前男友仲有咩唔好經歷?

試過一次,發現俾人跟蹤,嗰陣時我仲要啱啱考到車牌掛緊 P牌,我冇顧到坐喺隔籬妹妹嘅安全,就喺條街度開快車想撇甩佢(狗仔隊)……一日半日都算,佢哋等咗我一個星期真係好嬲……𠵱家我諗通咗,其實好多狗仔隊都好好人,對住佢哋笑下都唔係好難啫……

咁你喺 18歲簽約 A Music, 23歲至出碟,喺公司聽咗五年電話叫咗五年外賣又嬲唔嬲?

嗰陣時真係冇諗過要等五年……開頭仲以為一簽完約就可以做大明星……其實都真係幾悶㗎嗰排……但我又冇發脾氣,又唔想人哋覺得自己好巴閉,諗番轉頭學識等待都係一件好事啫……跟住錄第一隻碟又錄咗兩年……

圖片

點解十首歌要錄兩年?

錄到 Leon(黎明)滿意為止囉!我係新人,佢有經驗,佢覺得未得,我就要相信佢直覺……

一等就係五年,「等」有咩竅門?今次搵到新公司都係用咗半年,相對容易好多?

話俾自己聽囉,唔好一味諗住要紅,不如諗下反正我鍾意唱歌,不如就好好唱歌享受唱歌……到今次滿約之後,其實我都唔急,唔想咁快由一間公司跳去另一間公司,我都想溝通下了解下先……

我無耐之前訪問你舊同事 JW,佢話確實係以前喺 A Music瞓唔着覺,入咗新公司終於有覺好瞓囉……

哈哈哈……喺舊公司最後一段日子,真係好難嘅……因為個環境轉變,同公司少咗溝通。我覺得舊公司唔太着重我諗法,經常都係俾首歌就叫我唱:「唱啦你!呢首一定 hit!」但係其實 artists最需要係發掘自己諗法至會成長……我覺得空間因為咁樣收窄咗好多……

舊老闆 Leon講嘢好深!

佢哋對你有全盤計劃,因為當你係個 product?

但係講真,佢哋又做得幾好……但係後期,尤其係第八隻碟,我唱番自己啲歌都好迷失,好似啲歌係人哋嘅。我想做番自己,但係佢哋又覺得呢啲唔係佢哋想要嘅嘢……我唔係冇出過聲,但係當次次講完佢哋都係話:「你唔好理啦……你等我哋去做啦……」我就唔敢再出聲。我覺得佢哋都係為咗我好,佢哋比我更知道個市場要啲乜……

你有冇同黎明出過聲?

有一次……但係我仲細,只可以相信佢哋,唔可以話又係 K歌……唔可以話我其實好憎。我每次唱首歌最大動力就係,可以我唔鍾意啫,但呢首歌對人哋好有意義呢……

吓?咁咪好委屈?

係呀……哈哈……有時都好委屈……不過唔慘嘅,我唱過咁多人哋鍾意嘅歌都係一個祝福,我唔會後悔。

講番轉頭,你同黎明講咗啲咩?佢點回應?

有時係歌,有時係演唱會嘅衫……但係唔記得咗佢講咗乜嘢,你知佢講嘢有時好深……

仲要你中文唔好添!

係呀……咪扮明囉:「得喇得喇!你話點就點好」講真我好感恩,有 Leon陪住我成長,教我點樣做呢行,幫我執啲唔多好睇嘅小動作,教我點樣唱好聽啲歌……

網上圖片

新公司唔再逼我減肥!

所以新公司新歌有句歌詞係「快將我逼瘋」,係真心嘅?

係我以前唔識表達自己啫,我𠵱家學識喇……

其實隻舊碟封套好哋哋點解要做瑜伽呢?你有做開?

冇呀!嗰個係 key我個頭落去㗎……係 Leon諗㗎!你知佢諗啲嘢好勁㗎啦……個 point就係有得 key就有得玩,就引到你哋問問題,就有話題囉!雖然好多 fans好憎個封面,但係有話題喎!點奇怪都好,重點就係有 noise吖嘛!

以前唱片同歌成績其實好好,講番轉頭其實你覺得嗰個唔係你?

咁又唔係……都係我嘅一個旅程,冇嗰段日子,我就唔會知自己鍾意啲咩、唔鍾意啲咩。

咁𠵱家公司由得你健康,舊公司有冇逼你減肥?

其實𠵱家都好多人叫我食少啲,正常嘅,實際上上鏡就係瘦啲好睇啲,但係我𠵱家知道就算食都要食得健康啲。

上次本刊影到你入爆谷店,諗咗好耐都唔買?點解?唔敢食?

係呀係呀!我哋諗住入去聞下咋……唔係問,係聞! smell!聞下都好!聞下就滿足喇!食完又會後悔,既然無益,不如唔好食!

講下感情,除咗 Gordon,有冇其他再唔好嘅經歷?

有吖!有個教會嘅男仔,都仲未發展,因為一次俾報紙影到寫得好衰,咁就嚇走咗佢……佢好注重私隱,佢唔鍾意喺報紙出現……都係一件好事,本來都好好傾,好好 feel,原來知道對方仲緊張過我,遇到事情會係呢種反應……

雖然三年冇拍拖,但係曾經有冇一段感情,好深刻?好深愛?你覺得有一個人你會記一世?

真係冇……我係唔係好悶呢?希望下次見到你我會遇到呢個人,可以話俾你聽。我係期待嘅,我一聽 Jazz就覺得好浪漫好想拍拖,我好掛住,一開始拍拖,啱啱撻着嗰種感覺……

告別後記:倒數之二

合作 15年,衞蘭都唔多明黎明葫蘆裡在賣甚麼藥……其實有幾閒?試問全香港又有幾多個人明呢?

因為少不免會提到前老闆,因為性格也太直腸直肚,加上中文又實在麻麻,話說本來我想約重新出發的衞蘭做訪問,唱片公司怕講多錯多,本來是拒絕的。

我要謝謝華納最後的信任和成全,一向覺得,人物專訪要敢講才好睇,而香港地敢講的人一向不多。黎明敢講金句,衞蘭敢講黎明,娛樂新聞才如此多 fun。

撰文:朱小博

攝影:范仲良

髮型: Jamie@Hair

化妝: Samuel@江中平化妝室

服裝: PLOTZ

場地提供:八一 0四生活盒子


鍾意就快D Share啦!