掃呢頁CODE去手機

2016年3月23日 星期三

一個月前寫定分手聲明  Stephy離港堅拒小方瘋狂箍煲 [FACE - 461] __,Stephy,方力申,小方,鄧麗欣,MF,

今年1月,已進入冷靜期的方力申及Stephy,努力嘗試修補關係。封面一個月前寫定分手聲明 Stephy離港堅拒小方瘋狂箍煲方力申同Stephy拍拖10年,正當全香港都以為兩人好事近,點知上週四(17日)突然發聲明宣佈分手,阿寶唔再屬於小方。公布甩拖後,小方自己見記者交代,全程12分鐘喊足兩次,期間透露Stephy曾因要小方獨自面對傳媒,而傳短訊講對唔住。原來,掟煲聲明早於1個月前寫好,但當時小方身 ...


今年 1月,已進入冷靜期的方力申及 Stephy,努力嘗試修補關係。

封面

一個月前寫定分手聲明  Stephy離港堅拒小方瘋狂箍煲

方力申同 Stephy拍拖 10年,正當全香港都以為兩人好事近,點知上週四( 17日)突然發聲明宣佈分手,阿寶唔再屬於小方。

公布甩拖後,小方自己見記者交代,全程 12分鐘喊足兩次,期間透露 Stephy曾因要小方獨自面對傳媒,而傳短訊講對唔住。原來,掟煲聲明早於 1個月前寫好,但當時小方身在外地, Stephy要求等齊人先公布。點知上週四發聲明時, Stephy又突然離港,留低小方執手尾!

分咗手都要避開對方,睇嚟今次真係「完了吧!」

以公司名義發聲明後,方力申翌日於活動再獨自交代,詳細交代分手過程,期間忍唔住兩度落淚。

方力申上週五( 18日)獨自面對傳媒,向全港交代同 Stephy分手始末。「分手最大原因,係一啲問題經過多次商討都無法解決,但絕對唔係婚期!」

冇樓冇公司齋買畫

全世界都以為係 Stephy迫婚不遂搞到要分手,其實學 Stephy好友吳雨霏話齋,「唔係呢個問題咁簡單!」

事實上, 32歲 Stephy眼見好姊妹 Kary同 Miki都成為人妻,都開始恨嫁。兩人同居多年,小方父母亦當正 Stephy係半個女,但小方一直你急我唔急,拍拖 10年未曾與 Stephy討論過婚事。兩人除了夾份買名畫投資,從未合資買樓或開公司,小方更已搬離比華利山愛巢,回薄扶林與父母同住。

今年情人節,小方罕有在微博曬 sweet拖手相,企圖氹 Stephy回心轉意。(網上圖片)

今年情人節仍未決定分手的 Stephy,亦在微博晒收花相,當時似乎仍有彎轉。(網上圖片)

太陽娛樂 2月尾舉行春茗,小方同 Stephy煞有介事搵 Paco企中間,唔再做連體嬰。(網上圖片)

突然離港的 Stephy,冇同小方一齊開記招,選擇在 ig發表分手感言,當中透露兩人性格不合,有意見分歧。(網上圖片)

「冇驚喜已經係驚喜!」

據 Stephy身邊人透露,分手只因拍拖 10年小方都未求過婚,而最令 Stephy心淡的,係小方從未做過浪漫事,連花都冇送過!「咪睇小方好似好識冧女仔,其實咁多年來佢都冇送過花俾 Stephy,情人節唔會煮心形牛扒,亦唔會出街食飯慶祝!」

小方唔識做,令 Stephy感到不被重視,今年 1月宣傳電影《紀念日》時,兩人已進入冷靜期,兩人努力嘗試扮冇事;當小方送上自製零食籃、又公開錫錫,一時感觸的 Stephy忍唔住爆喊,仲爆咗句:「佢(送零食)已經好好喇,平時冇驚喜已經係驚喜!」

07年拍《十分愛》,當時兩人已開始拍拖。

14年 1月,本刊發現 Stephy小方孖住去數碼港拍拖睇戲,當時雖然已公開戀情,但對撞破睇戲,小方仍顯得十分避忌。

送花箍煲

Stephy開到聲要人氹,小方再加多兩錢肉緊,於情人節當日高調晒拖手合照示愛,「我拉住妳的手,互相扶持,外面下着雪、落冰雹、刮大風,一起走過最艱難的時刻。」又強調「珍惜在一起的時候。」今年情人節,小方約 Stephy撐枱腳,更送花箍煲,以為「做啲嘢」就冇事。可惜 Stephy已經決定分手,其實二人早於上月中已寫定分手聲明。不過當時小方不在香港, Stephy於是要求延遲公布,小方以為有彎轉準備瘋狂箍煲,點知上週四決定發聲明前一刻, Stephy又突然離港,未有向公司同事交代地點及回程日期。既然決定分開,不妨聽好姊妹 Kary講首歌《分手要狠》呀!

小方拍拖好鬼祟

二人拍拖十年,甚少被人影到撐枱腳,據知小方過去 9年從未陪過女友外出食情人節大餐,終於令 Stephy心淡。

遲遲未嫁得出, Stephy都有為自己謀定後路,早前投資內地時裝品牌「 Loey」,更被影到去 PMQ睇鋪。

幾襯都係要散

圈中唔少熒幕情侶假戲真做,鏡頭內外都襯到絕,不過合久必分,冇幾多對可以走到最後!

《蘋果日報》圖片

胡杏兒 x黃宗澤

04年拍《我的野蠻奶奶》撻着, 12年分手,結束 8年情。現時杏兒已嫁俾夜場老闆 Phil做李太, Bosco則戀上平胸日模 Jun。

周麗淇 x鄭嘉穎

06年拍《天幕下的戀人》開始拍拖,不過嘉穎 08年暗撻佘詩曼, Niki嬲爆分手,之後曾與紗廠太子及藝人徐正曦拍拖。

《蘋果日報》圖片

廖碧兒 x陳豪

04年合作《心花放》撻着,一直有傳廖碧兒嫌棄陳豪冇錢, 10年秘撻富二代林忠豪,數月後正式宣佈與陳豪分手。

採訪、撰文、攝影:娛樂組


鍾意就快D Share啦!