網頁

請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年10月26日 星期五

【無諗過拍劇】入行為做歌星 李成昌:我彈吉他唱民歌好勁媾好多女(足本版) __,

「身如柳絮隨風擺,歷劫滄桑無了賴。鴛鴦配,能結不能解。苦相思,能買不能賣。」昌哥即席唱咗幾句《紅燭淚》,係咪唔錯先?難怪39年前、廿歲出頭、初入行嘅佢 ...




「身如柳絮隨風擺,歷劫滄桑無了賴。鴛鴦配,能結不能解。苦相思,能買不能賣。」昌哥即席唱咗幾句《紅燭淚》,係咪唔錯先?難怪39年前、廿歲出頭、初入行嘅佢,唔係想拍劇做演員,而係想做歌手啦。

昌哥話初入行讀藝訓班時,一心只為兩件事,第一係舞台劇,「第二就係唱歌,我做歌星都得架,因為嗰時我彈吉他唱民歌係好勁,溝好多女,我老婆聽到都唔怕」。之但係TVB藝訓班係專門劇集架喎!昌哥話當時兩隻腳已經踩咗入去,「無得揀喇,一入去就chur喇、捱喇,一直做做做做到今日」。或者呢啲就係神推鬼㧬、冥冥之中自有安排,成就咗而家觀眾心目中「演乜就係乜」嘅專業戲骨!

問到昌哥有無諗過自己點解咁演得?佢好自信咁答「天份囉」!但,根據《壹》仔非正式統計,佢至少講咗6次「好彩」。其實,昌哥字裡行間亦透露:演技同財富一樣,都係累積返嚟。

「我以前o靚仔時呢,好多機會同前輩做,我做得多,積累咗好多嘢,形成我有個百子櫃,百子櫃入面係咩呢?係某種感情、動作、語氣、外形、人物,喺晒入面。假如我遇到某個角色,我就執藥咁執喇,真架。咦!呢個角色可以喺返以前嗰個角色搵返啲嘢出嚟,咁囉。」

演而優,則教。原來,係一種承傳。「以前我做新人呢,啲前輩比如秋官,佢都係咁對我哋啲新人,一嚟就social輕鬆咗先,等我哋唔好咁緊張。而家都係架,有時遇到啲新人,我話:『喂!今次大家想NG幾多次先?(吓!昌哥你講咩?)大佬,我未睇劇本呀!陣間睇住我呀。』即係類似呢啲咁嘅嘢。」

就算無對白嘅茄哩啡,昌哥一樣塞錢入佢哋袋。「《公公出宮》我有三個助手,佢哋無對白架,只係企喺後面,我話:『喂!嘥咗喎。嗱,陣間不如咁樣吖。』我覺得佢哋就無咁悶喇。」

難怪咁多新人爭住同昌哥合作,特別係女新人。「我好恨做某啲女藝員老公,調返轉頭原來好多女藝員呢,係好想做我個女。『昌哥,有無機會做你個女呀?』我話返轉頭:『你有無機會做我老婆吖?』當然我係講笑,佢係講真啦。」

如果65歲係退休年齡,想認昌哥做老竇,豈不只剩低4年?學佢講返句「好彩!」事關佢話呢行無退休呢回事,只有減產:「退休,好老實,我仲好健康架!除非第日有一日我開工阻住人收工,意思係我對白唔記得晒,一句都講唔掂喇,嗰個情況下我就會唔做喇。」就算真係咁,相信到時啲「仔仔女女」,都只係笑住喺一廠擺場謝師宴。

採訪:梁子健

攝錄:黃志明、吳斯金


鍾意就快D Share啦!


Related Posts Plugin for WordPress, Blogger...