網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年11月27日 星期三

保持距離 剃頭遮禿 偉仔嘉玲分房瞓 嘉玲,梁朝偉,偉仔,劉嘉玲,MF,




梁朝偉同劉嘉玲拖到實行紅地毯,但偉仔表情拘謹,唔通佢當時已經估到冇獎?

真面目

保持距離 剃頭遮禿 偉仔嘉玲分房瞓

第 50屆金馬獎上週六( 23日)舉行,香港代表全軍覆沒,顏卓靈、鄭秀文輸畀章子怡唔出奇,估唔到張家輝、梁家輝同梁朝偉呢五分之三機會都唔中,金馬影帝由台灣幫李康生奪得,就連林青霞都忍唔住話爆冷!

原本以為《一代宗師》大熱,剃定個靚 skin head預備攞獎的梁朝偉,專程帶埋老婆劉嘉玲出席。二人近日經常孖住出活動,但據知兩公婆去到台灣竟然離奇分開酒店住,一個住信義區一個住中山區,淨車程都要半個鐘。

無端端分開瞓,唔通嘉玲驚晚晚蒲天光嘈醒偉仔?

凸字額

傳聞偉仔拍完《一代宗師》後一宜受情緒問題困擾,出現脫髮跡象,金馬當晚亦察覺到偉仔髮線明顯向後移,好在頭形靚的偉仔剃成凸字額,望落先冇咁老咋!

章子怡憑《一代宗師》贏金馬影後,反而付出多年青春、又拍到斷手的梁朝偉竟然冇獎攞,心情難免差。頒獎禮當晚,偉仔知道自己做唔成影帝後,成晚扁嘴唔識笑,即使鏡頭影住都黑口黑面,冇同坐附近的張家輝、李冰冰傾偈。

剃頭備金馬

據知偉仔一心諗住繼《重慶森林》、《無間道》及《色•戒》後第 4度做金馬影帝。本刊得悉,其實偉仔自拍畢《一代宗師》後即備受情緒問題困擾,需到中環接受中醫診治。直至最近,更開始出現脫髮問題,所以出發到台北前,偉仔專誠到髮型屋剃個幾乎「見青」的靚 skin head上台,令視覺上覺得只係頭髮短咗,並唔係禿頭,可惜都係輸畀《郊遊》男主角李康生。

「偉仔今次其實信心爆棚,佢覺得花咗咁長時間,傳媒又煲佢大熱,所以《一代宗師》成班台前幕後拉曬大隊現身,又訂定場慶功,結果章子怡有影後,其他細獎又攞埋,偏偏得佢冇份,梗係冇曬心機啦,連王家衞親自叫佢去慶功宴坐一陣,佢都嗌攰唔肯去,搞到嘉玲冇曬癮,咪自己去咗另一個 party囉!」知情人士透露。

《一代宗師》拍足 10年仲拍到斷手,點知都係得個桔,章子怡就攞到金馬影後,偉仔失望絕對可以理解。《蘋果日報》圖片

拒絕慶功

《一代宗師》搞慶功,王家衞攬實章子怡隊酒,失落影帝的男主角偉仔就唔見人。

頒男主角獎前,偉仔聽蔡琴唱歌仲笑得出,不過宣布李康生攞影帝後,即冇曬表情!

唔肯同機走

輸獎冇心機,但今次冇份提名、純粹陪老公的劉嘉玲則心情大好,不停轉場夜蒲,回程返香港時撞到「情敵」張曼玉,更主動合照上載微博,懶理偉仔失落影帝。

唔蒲唔安樂,以往習慣天光先瞓的嘉玲,今次同偉仔分開酒店住,自己住在酒吧林立、位於旺區的寒舍艾麗酒店,反而偉仔鍾情老牌晶華酒店,附近更有個大公園,方便朝早起身跑步。

分開住不特止,據知嘉玲一早安排同偉仔週日( 24日)一齊返香港,但偉仔竟然唔肯走,吩咐嘉玲自己返屋企先。唔同房又唔同機,年紀仲咁大,想生 B真係有難度。

嘉玲早前同鄧永鏘(左一)夾份開家品店,偉仔都肯現身撐老婆,不過去到台灣就分酒店住,二人的相處方法真係與別不同。

情敵互攬

偉仔未走,嘉玲自己返香港時遇著張曼玉同機,兩位過氣情敵完全唔尷尬之餘仲攬到實一實,影後質素冇得頂。

有咁遠住咁遠

劉嘉玲入住大會安排的寒舍艾麗酒店今年 11月先開張,附近有多間酒吧如 Room18、 Spark101等,而偉仔入住的晶華酒店,隔籬係林森公園,啱曬健康偉仔晨運!最離奇係身為夫婦,二人住的酒店竟有半小時車程距離,呢種相處方式真係唔係對對夫婦都可以接受。

台下仲好睇

曼玉風騷

金馬影帝由台灣演員奪得,作為香港人,焦點梗係落番香港幫身上。雖然香港代表一個都攞唔到獎,但當晚劉華同郭富城都非常興奮,不停喪傾偈,身為梁家輝一對孖女契媽的張曼玉,梗係掛住同「一家人」梁家輝咬耳仔啦!

Sammi要扶

完騷後,鬼咁性感的 Sammi、劉華同城城拉大隊到太和殿食麻辣火鍋,唔知係咪太高興,城城飲到醉曬離場。而一向有節制的 Sammi亦有醉意,要由助手扶實慢慢行上車返酒店。

舒淇轉場

有份一齊打邊爐的舒淇,跑完一單慶功又同導演劉偉強轉去《一代宗師》慶功宴繼續玩,不過兩人未入到去已經面紅紅,企咗一輪先畀記者影相!



鍾意就快D Share啦!