2014年8月13日 星期三

尖嘴舖租狂飆 音樂室逼遷 張崇德不敵自由行:我應付唔到 張崇德,




【短片】【C1頭條】尖嘴舖租狂飆 音樂室逼遷 張崇德不敵自由行:我應付唔到

2014-08-13 02:52:00



其他影片:>>






【C1頭條】尖嘴舖租狂飆 音樂室逼遷 張崇德不敵自由行:我應付唔到

現年42歲的張崇德,93年與哥哥張崇基憑一曲《認錯》贏得新秀冠軍後加入樂壇,張崇德多年來從沒放棄自己的音樂夢。於02年,張崇德與太太劉美娟斥資近百萬,在尖沙嘴諾士佛臺開設「音樂人教室」,開班教授唱歌和樂器技巧,又設數碼錄音室進行音樂製作。

開業初期,生意不俗,可惜03年沙士爆發,將他一舖打沉,那段時間,教室是零學生。咬緊牙關撐過沙士,張崇德滿以為一切雨過天晴,卻又遇上業主拒續租,張崇德花費了的數十萬裝修也化為烏有。

兩度遇上挫敗,張崇德仍心不死,決定將教室搬往加拿分道利嘉大廈2樓,面積近4000呎,月租5萬餘元,除再花上30多萬的裝修費外,鋼琴和錄音室等器材仍要分期付款繼續供,令張崇德百上加斤。

幾經努力辛苦下,05年新址「音樂人教室」總算上了軌道,學生人數高峰期最高去到100人,但正當過去9年生意總算有起色之際,偏偏又遇上約滿業主加租,張崇德今次真的苦無計策,惟有選擇離開。

前日他在即將搬遷的教室受訪無奈說:「就算今次加完之後比同區都係偏低,但我應付唔到,業住冇埋由擺個單位喺度長期蝕價,但就算平啲,我都計唔掂數,租金去到六位數字,其實係好辛苦。雖然有小小無奈要搬,但我諗新地方會有新衝擊。」

政商界反對削減自由行來港,還叫市民大眾多多「包容」,翁靜晶日前卻為民發聲,直斥自由行擾亂香港民生。問到是否自由行湧現尖沙嘴,逼使租金瘋狂上升?張崇德說:「我唔知係咪直接原因,我最開頭搬嚟都未開嗰個商場(K11),到K11開咗,越嚟越多人喺呢區出現,有個自由行一定去買嘅曲奇餅又開喺呢度,打晒蛇餅,所以整個周圍人越嚟越多。0依家樓下又整路,封咗之後成日塞車,以前係一個幾方便地方,包括搭港鐵同揸車都方便,但0依家唔係,好唔方便。人多咗其實唔會影響到我,但租金就直接影響,租金佔咗好大成本,就算未加租,燈油火蠟加加埋埋每個月起碼都要6位數字。」

原來幾年前開始,教室因為入不敷支,張崇德要從登台做騷其他工作賺錢補貼,讓教室繼續營運。問何不將蝕本生意結束?他說:「曾經諗過好多次,點解冇結束,同我開業嗰時個概念有關,我希望可以聚到一班音樂人,唔係淨係生意,我有好多學生冇喺度學,但到過時過節會send啲card嚟,成日掛住呢個地方,譬如BabyJohn係我學生,佢好耐冇學,但大家一直keep住聯絡,所以呢個地方我仍然想保留住。減低租金之後,我成件事就容易好多,生意運作係健康好多。」

可曾考慮提高學費來維本?張崇德說:「好難再加上去,茶餐廳加多幾蚊就容易,但我唔想學生咁大負擔,學唱歌或者學音樂係減壓,如果經濟上令佢哋更大壓力,我覺得冇乜意思。」

由尖沙嘴搬到荃灣,可能會影響收生?張崇德說:「我從好方面諗,跟開我學嘅學生,基本上我都問過佢,冇乜大影響,最多話遠咗少少,但都要嚟學。從好嘅方面諗,可能開發番另一個區域。」



(攝影:陳慧安)



幾年前開始,教室因為入不敷支,張崇德要從登台做騷其他工作賺錢補貼。





張崇德捱過沙士,但卻敵不過貴租,被迫由尖沙嘴搬到荃灣繼續營業。



K11是自由行的熱點之一,連帶張崇德音樂室位於的利嘉大廈,租金亦上升。



鍾意就快D Share啦!
Related Posts Plugin for WordPress, Blogger...