2014年8月13日 星期三

[FACE 377 專訪] 隔着塵埃說愛你 周柏豪:小♥身體! 柏豪,周柏豪,MF,




真人騷

隔着塵埃說愛你 周柏豪:小♥身體!

事緣在上周,周柏豪去完一轉湛江演出,臨走時在過境女保姆車上發現三個唇印,分別位於兩邊倒後鏡和右邊車身。他說他看到唇印的第一個反應是:「我架車由香港揸到湛江五百公里,封晒塵,咁樣錫落去,嗰晚唔知位歌迷會唔會肚痛?」而我的第一反應則是:「周柏豪,你得咗喇!」

29歲,出道 7年,今年他創立個人服裝品牌、有百幾萬閒錢買入 dream car、終於有獎有機會上台發表愛的宣言、下月開個唱開到入紅館門票半粒鐘賣清、還有歌迷愛他愛到不顧個人安危……今次仲唔係得咗?

重點是,男神無論揸緊咩車、爬到幾高,其實臉皮還是很薄、說話還是小心翼翼、拍起照來被讚兩句還是像 7年前一樣會面紅:「我一直都唔覺得自己真係咁好、值得行到今日,值得行入紅館。死喇,今次紅館真係關我事,人哋買飛真係因為我!點算呢?我做唔做到呢?然後上個月人生第一次跳降落傘,落地一刻我終於諗通,唓……咪同唱紅館一樣,努力過,嚟到呢一步,又有咩好驚呢?」

男神怯怯哋,其實都幾 cute。







最怕啲人 睇到我煩

俾人當男神,感覺如何?

都係一句啫。我係一個活躍嘅藝人,今時今日,活躍緊喺個娛樂圈、有一班支持者,唔係女神就係男神㗎啦……唔好當面咁樣叫我,我會面紅。

你心目中,邊個先至係男神?

起碼要到金城武嗰啲級數,我諗先至稱得上男神。而重點係,男神唔適宜成日出現,要好似金城武咁,間唔中蒲一次頭,一蒲頭贏晒。我呢啲算得係咩男神?我犯咗男神最大忌,就係出現得太多,我唔怕其他,最怕啲人會睇到我煩。

所以你覺得自己未算係「神」級,仲係耕耘期?

係。藝人嘅巔峰期就好似人開花,分分鐘要用十幾廿年時間施肥灌溉。美國藝人,最巔峰係 15至 20歲,香港倒轉,尤其男仔,講緊 40至 50歲。我 30未夠,老實講仲係插緊秧,淋緊水,係唔係堅持得到 40歲等花開,我自己都冇信心。

點解咁講?

因為個過程太唔容易,而要好多付出,最大犧牲係錯過咗生活……所以調整心態好重要。由入行第一日開始,我已經好 buy一句說話:食得鹹魚抵得渴。喂,你去紅館唱歌,一吹雞就想萬五人買飛湧晒入場,但係落咗台又要個個當見你唔到,邊有可能?你要宣傳時,想人哋約你訪問,但出到街又唔俾啲追蹤組跟住你影,邊有咁着數?我唔知我呢朵花有冇機會開,就算開都總有凋謝嘅時候,所以我𠵱家學識享受呢個耕耘期:出街影合照,嚟啦,多多都影。我都試過出街冇人理,感覺一啲唔好受;有狗仔隊影相,做咩啫,人哋又唔係害你,歡容啲出到嚟張相都靚啲。我從來都覺得自己唔算係乜,唔係咁值有今日,唔係身邊咁多人幫、咁多人俾面,又點會行到呢一步?



買車整喊阿媽

20歲

《蘋果日報》圖片

如何在百忙中還能享受生活?

本來我唔識,成日都怨賺錢賺得咁辛苦,唔得閒使都唔知為乜、成日都怨人哋去呢度去嗰度,我就去邊都係做嘢。𠵱家我學識,自己有價值時,享受工作,開開心心去工作。至於生活,交俾阿爸阿媽幫我生活,想去邊?去等我做仔嘅開 cheque請你去。上個月咋嘛,我阿媽同朋友去咗十日西藏。

伯母幾多歲?

58歲喇!係唔係好夠薑先?你知唔知佢喺西藏返嚟同我講咩?佢話夢想成真!細細個係阿媽幫助我完成夢想,𠵱家輪到我支持佢完成夢想,嗰下開心到呢!

有女友

有目標

24歲

咁你自己嘅夢想呢?

其中一個就係買車,最近都達成咗。新車落地幾日,有日阿爸坐隔籬,阿媽坐後座,阿爸話成世人最開心就係今年,我知佢兩老好安心,唔只我一個,仲有大哥開咗自己公司,細佬亦都越嚟越穩陣,嗰個感覺係終於捱大我三個,終於唔再擔心我哋三個。本來開開心心,阿媽嗰下竟然爆喊:「係啦,諗番當年真係慘,阿爸間公司執咗,得我一個返工搵錢,你哋三個日日喺屋企日日都嘈,阿哥就日日唔肯返屋企……」嗰一刻,我口講係安慰阿媽:「冇過去又邊有現在呢?」,實情?幾想停埋架車埋一邊,攬住阿媽喊埋一份。

27歲

從小想買的 dream car終於願望成真,感覺係唔係好正?

好得意,呢架車(百多萬平治 Jeep)真係細細個就鍾意。細個時,一定覺得揸靚車一定要有咁招搖得咁招搖,一定要周圍炫燿至覺得抵買。到真係有一日,自己有能力達成夢想時,除咗真實,其實都幾尷尬,唔多敢話俾人知。俾人影到,我會覺得面紅,朋友問起做咩唔揸架新車出嚟,其實係嘶……一聲,倒抽一口涼氣。

今年買咗新車、去到紅館開個唱、又終於跳到降落傘,下一個目標呢?

我希望每年達成自己一個願望,下一個願望,係放兩個月假學一門樂器,仲有,係想身體健康。今年我咁大個人第一次檢查身體,醫生讀報告時好慢,讀到去尿酸同膽固醇,話我尿酸責界,膽固醇超標囉。喂,我唔煙唔酒又日日做運動,膽固醇超標?唔係呀嘛?都係因為工作太忙、壓力太大,一食我就肆無忌憚想慰勞自己。所以話,凡事都要有節制,我唔想到老時有錢、有時間達成夢想,但係冇咗健康、有心無力。

下一個願望唔係人生大事咩?

人生大事我冇 plan過,並唔係我下個目標。不過呢一刻安安全全,其實唔需要 plan,隨時可以進行。

戰勝畏高

29歲

愛的宣言

上次攞獎上台係愛的宣言,下個月去紅館開個唱會唔會係求婚?或者行禮?

唔需要咁做,亦都唔係我作風。我唔係嗰啲會將感情生活帶入工作嘅人,同樣係生活中,我亦都唔想將工作帶返去屋企。出面大風大雨,我諗每個人都需要,返去有個人乜都唔使講,淨係俾你挨下。

係唔係覺得自己好好彩?一早遇到呢個人?

我一直覺得自己好好彩,除咗可以專注工作,最緊要係做人變得更有目標。

咩目標?

娶個靚老婆,生番一個仔一個女,然後有間靚屋。日頭淋下花、曬吓太陽,夜晚一家人圍埋一齊食個飯。就係咁簡單。

玩醜都得

百萬豪車

圖片

唱到紅館

《蘋果日報》圖片

燈神

與其說周柏豪是男神,我說他更像燈神。

話說早兩年見面,柏豪教我買重金屬話升硬。這次問他行情,他「紅都面晒」:「唉,唔好提喇,由千七美金跌到𠵱家千四。」

我話好彩我冇錢入市啫,燈神又話喇:「唔係喎,價錢點都會有調整,買重金屬唔係短炒係長揸,目的係對抗通漲啫。」

事業如日方中,危機感卻一日不減,謙虛說自己還沒「開花」,卻已經知道花無百樣紅,買樓買金做生意為自己謀定後路,其實柏豪真係唔係得個樣,真係對得住男神的稱號。



鍾意就快D Share啦!
Related Posts Plugin for WordPress, Blogger...