【新鮮娛頭】莊思明遭陳司翰打？ 莊思敏：接受唔到另一半郁手郁腳
2014-08-13 07:45:00
莊思敏話拍拖應該係用個口講清楚，唔希望有身體衝突。(攝影：陳慧安)
夏日國際電影2014開幕典禮暨首映之夜，噚晚喺圓方舉行，現場播出兩套電影，包括活地阿倫嘅《情迷月色下》，同麥曦茵嘅《曖昧不明關係研究學會》，一班圈中人包括陳志雲、莊思敏、余安安、杜琪峯、林二汶、林一峰都有出席支持。
有報道話莊思敏嘅妹妹莊思明，被男友陳司翰打，而莊思明咁啱又晒大髀瘀傷照片，咁身為家姐的莊思敏點睇呢？佢就話唔方便回應呢件事，因為同其他人嘅私事有關，仲叫大家俾多啲空間佢哋。
問到莊思敏接唔接受到另一半郁手郁腳，佢話：「冇人接受到囉，冇必要咁樣做，拍拖應該係用個口講清楚，唔希望有身體衝突，不過唔同嘅人處理方法都有唔同。」
問到莊思敏有冇安慰妹妹？佢就話妹妹有開工，仲有發短訊話畀佢知有呢一個報道，不過莊思敏就冇覆妹妹，因為知道對方開緊工，有傳之前莊思敏幫過妹妹出頭，佢就話：「我相信每對情侶都有試過嗌交，總之就畀多啲空間佢哋，阿妹都冇話搞成點，佢覺得有問題，會講就會講，唔使我哋問。」
同場嘅林二汶就有份客串麥曦茵嘅《曖昧不明關係研究學會》，做一個無良嘅廣告公司老闆，哥哥林一峰就專登嚟支持妹妹，仲大爆妹妹成日七情上面，好似做戲咁，又話成日要畀反應妹妹好攰。二汶就話一峰今日喺嚟之前，專登去煮嘢佢食，大讚個意粉好食，仲幫哥哥宣傳新書《慢煮快活》。
二汶嚟緊9月就會有個音樂會，到時會有倫永亮做嘉賓，因為之前倫永亮幫二汶新碟寫咗首歌，所以會喺音樂會彈番首歌，一峰就話每個幸福嘅女歌手，都會有倫永亮嘅歌，所以妹妹都係幸福嘅女歌手，又話到時會煮多啲健康嘅嘢食畀妹妹，咁就唔怕肥，點知二汶就話一峰：「你頭先用橄欖油浸啲意粉畀我食囉！」
林二汶就有份客串麥曦茵嘅《曖昧不明關係研究學會》。
麥曦茵嘅《曖昧不明關係研究學會》噚晚首映。
二汶（右）爆林一峰用橄欖油浸啲意粉畀佢食。
杜琪峯
莊思敏又話唔方便回應妹妹嘅事。
余安安
|
鍾意就快D Share啦！
|
|
|
