2014年8月13日 星期三

[FACE 377] 手腳瘀心口痛 維護陳慧琳細佬 莊思明哭訴被打 莊思明,陳慧琳,MF,陳司翰




陳司翰和莊思明曾承認拍拖,但在前年分手,上年翻撻後轉為地下情,但不時被傳媒影到 2人親密出遊,可惜當大家以為他們感情穩定時,原來又再分手。

封面

手腳瘀心口痛 維護陳慧琳細佬 莊思明哭訴被打

莊思明( Lisa)和陳慧琳細佬陳司翰拍拖 3年間曾經情海翻波,雖然男方爛蒲愛溝女,但 Lisa始終不離不棄,視愛郎為終身對象。

有傳近日莊思明手、腳及心口出現幾撻明顯瘀傷,《愛.回家》演員同事紛紛慰問,莊思明亦同《愛》劇好友哭訴被人打傷手腳兼心口勁痛,但因怕事件曝光後,會牽涉男友陳司翰,遂要求《愛.回家》的同事保守秘密。

本刊向莊思明求證被打一事,她就好維護男友:「用我自己去擔保佢嘅人格,唔想有啲傳聞影響咗佢聲譽囉!」不過家姐莊思敏就似乎知悉內情,「屋企嘢我梗係知……!」







週日( 10日)陳司翰不肯談女友瘀傷,並全程木口木面不置可否,之後莊思明反口取消見記者回應事件。

莊思明同陳司翰 11年開始拍拖,二人關係斷斷續續,日前 27歲莊思明在微博 po了一張相片,展露大髀有一大撻明顯瘀傷,估計長達 3吋,她更寫道:「雖然很痛但不要緊,瘀傷會慢慢減退的,痛楚會慢慢消失的,路我還是要繼續走下去!」傷得最痛的,唔通係個心?

網上圖片

莊思明本月 1日在微博放上大髀瘀傷的照片,並感慨「痛楚會慢慢消失的,路我還是要繼續走下去!小明,你可以做到的!」似指瘀傷另有別情。

家姐知內情

屋企嘢我梗係知啦,不過我唔講得畀你聽!(真實對白)《蘋果日報》圖片

一向敢言的莊思敏,對於細妹瘀傷,鮮有地封嘴。

被要求封口

據知部分《愛.回家》的長期戰友都知道真相,眼見 Lisa哭訴都想為她出頭。雖然莊思明跟陳司翰已第 N次分手,但莊思明擔心大家矛頭會直指 37歲男友陳司翰,兼影響再跟男方復合的機會,故要求所有人向外封口。

上週六( 9日)記者致電 Lisa,言談間仍十分保護陳司翰。

F:《 FACE》 莊:莊思明

F:聽講你同陳司翰分咗手喎?

莊:嗯,私人問題唔想再答,總之我 ok。

F:佢最近對你係咪唔係幾好?聽講對你郁手郁腳喎!

莊:(遲疑兩秒)冇呀!

F:咁點解你周身瘀晒?

莊:因為我個人比較容易瘀啲,同埋我之前去玩(遊船河)又唔小心跌親,加上有一次我拍外景俾部攝影機撞咗落隻腳度,所以瘀咗好大撻。

F:遊船河點跌到咁傷?

莊:跣腳囉,我可能成身無端端週圍會有幾撻瘀咗咁囉!

F:其實你係咪唔想講司翰對你唔好咋?

莊:咁私人問題好早之前已經唔想講喇,公司都同我反映咗,唔想覺得我好似得呢樣嘢俾人講囉。

F:你會唔會嬲佢咁做?

莊:首先我澄清唔知點吹出嚟,但係我唔覺意整親啫,外景又受傷,自己上船玩又受傷啫。

F:你受傷司翰有冇陪你睇醫生?

莊:我冇睇醫生,連跌打都冇睇。

陳司翰則於 8月 5日發表微博稱:「看着一堆書信,反省到底有沒有給對方同等量的美好回憶,然後心虛不敢細看…」反省咩呢?心虛咩呢?網上圖片

兩年前加入《愛.回家》大家庭,莊思明(後排左二)與一眾藝員關係要好,今次瘀傷大部分同事都知道內情。圖片

莊思敏與細妹莊思明姊妹情深,但家姐不喜歡陳司翰爛蒲愛滾,一直反對細妹與他拍拖。圖片

未夾口供

莊思明受傷幾乎全組《愛.回家》演員都知,但一律封口避談,不過口供唔一致,一啲話拍劇時受傷,一啲話遊船河跌親,真假自己判斷。

趙希洛:前日(上週四)見過佢,好正常吖,佢俾人打咩?冇聽過喎。

李霖恩:佢喺我哋面前好哋哋喎,佢話自己遊船河跌親,冇詳細問落去呀!

張達倫:返工有見佢(莊思明)隻腳瘀咗,佢拍劇撞到部機嘛,佢識保護自己㗎喇……同佢做同事咁耐都冇見過陳司翰接佢喎。

「身邊好多人都知!」

F:咁有冇話畀佢聽你整親?

莊:其實我身邊好多人都知道嘅,但我唔會特登講畀人聽,我身邊嘅人知道就會知道。

F:佢係你男朋友喎?

莊:我𠵱家都冇講過大家係咩關係,係囉,呢樣嘢我唔講架喇。我覺得有必要澄清,用我自己去擔保佢嘅人格,唔想有啲傳聞影響咗佢聲譽囉!

F:佢係咪成日返大陸,你哋好少見面?

莊:我真係唔清楚喎。我係想保護番啲我絕對關心同埋痛錫嘅人,係事實我已經講咗出嚟。

翌日陳司翰於半山永安閣住所步出,走到停車場,但對本刊提問一律不開口回答,問到知否 Lisa最近手腳嚴重瘀傷時依然漠不關心,全程目無表情,駕車離開。

至週日晚上 Lisa則突然主動聯絡本刊,相約星期一早上在將軍澳電視城門外見面回應事件,但司翰拒絕回應本刊後, Lisa又突然反口取消見面澄清,並 WhatsApp留言表示:「其實我只想保護他,沒有其他回應了,謝謝!」

陳司翰和莊思明於 11年拍拖一年多後分手,之後離離合合,但男方溝女史極多, Lisa家姐莊思敏曾極力反對但阻止唔到。週一( 11日)本刊致電莊思敏,問及細妹瘀傷真相,她唉了一聲後回答:「屋企嘢我梗係知啦,但(原因)唔講得畀你聽。」家姐都管唔到咁多, Lisa自己小心啲

搵姊妹哭訴

前年因為莊思明頂唔順男友陳司翰花弗而第一次分手,分手後 Lisa終日以淚洗面,同朋友聚餐都忍唔住喊出嚟,更喊到眼睛發炎要睇醫生。

花心

台灣圖片

司翰曾多次被發現暗拖女伴出街,前年同馬來西亞籍女模吳孟璇在台北睇戲斷正。

爛蒲

《蘋果日報》圖片

陳司翰爛蒲出晒名,而且兩杯落肚更加玩得癲, 10年他參加清洪契仔巫翊鳴夜店的狂野派對,被指與辣妹玩得激烈。

好打得

陳司翰涉對女友郁手有前科, 03年他被影到在跑馬地疑對拍拖 5年的台模女友 Jacqueline動粗,家姐陳慧琳追問後向傳媒表示:「發生呢啲事好唔好意思,佢仲同我講咗聲對唔住。」事後陳司翰幾乎絕迹香港娛樂圈,近年轉戰內地拍劇,叫搵到兩餐。

四招防家暴

雖然話打者愛也啫,但係俾人打都要識擋識反抗嘛,唔係瘀晒傷晒點見人呀?下面還拖四招各姊妹跟住學冇死!

第一招:學泰拳

學定一招半式,例如𠵱家咁興學泰拳,俾人打都冇咁傷兼有仇報吖。但萬一對方識詠春、自由搏擊、空手道、如來神掌或者係葉問,咁我勸你報警。

第二招:養惡狗

養番隻狼狗或者鬥牛㹴,記住要自己訓練,有乜事叫隻狗幫你擋駕還擊,對方連狗都打就告佢虐畜。

第三招:跳艷舞

夫妻鬥氣係好傷感情,不如準備定件情趣內衣,一嗌交即刻着起跳番 part扭扭舞,挑番起老公嘅情趣,大家 Happy Together好過打打殺殺啦。

第四招:喪練跑

為堅持罵不還口,打不還手嘅原則,最好係走!平時長跑練習定,一來對健康好,二來俾人打可以走為上着,下咗啖氣再傾過囉!

打女人可恥

男人打女人係卑鄙行為,偏偏娛樂圈都發生過多宗類似事件,多數分手收場。

可嵐 家暴

網上圖片

上月初可嵐稱遭結婚 4年、開日本餐廳的老公尤子威家暴,可嵐報警求助,但警方指證據不足雙方銷案,可嵐表示要雙方分居一年至可以離婚,又透露每星期會帶囝囝見爸爸一次,關係開始緩和。

羅霖 離婚

羅霖與前夫劉坤銘分開兩年,上月尾突然自爆在兩年半前遭家暴,之後便提出分居,羅霖說:「唔係好犀利,我冇還手,因為都唔識反應。」不過前夫劉坤銘就反指羅霖博宣傳。

傅穎 棒打

圖片

傅穎與前男友羅仲謙離離合合, 11年傅穎自爆曾被羅仲謙虐打,更展示傷勢;其後羅仲謙開記招,否認曾經動粗,揚言只是為勸止情緒激動的傅穎時唔小心整瘀她。

黃奕 扮慘

網上圖片

內地女星黃奕被爆出軌後,與老公黃毅清便展開罵戰,跟住自爆曾遭家暴,並在微博上載疑似由家暴造成額頭凹陷的照片,但就指扮慘博同情。



鍾意就快D Share啦!
Related Posts Plugin for WordPress, Blogger...