掃呢頁CODE去手機

2014年8月6日 星期三

[FACE 376] 做死人 無限 LOOP小生 老是常出現 MF,




真面目

做死人 無限 LOOP小生 老是常出現

大台小生唔夠用,家陣連林峯都決定唔續約外闖,搞到大台冇大將,惟有焗將啲二線小生硬推上一線,但缺人情況仍然冇改善。

二線都要焗推,一線孭到收視嘅更加係用到盡,結果做成視帝黎耀祥去年開始不停拍劇,至今計埋準備開拍嘅劇集,已經儲落 7套劇排住隊上,呢頭《商戰》剛拍完,即要拍黃秋生套《梟雄》,嚟緊仲有套《太監五虎》要開。好在祥仔好捱得,拍《梟雄》多群戲已經好感恩話:「多啲人拍冇咁辛苦!」

其實黎耀祥將於下年中約滿,續唔續約都未知,大台梗係有人才唔好嘥。但係今年先同大台續約嘅陳豪,對於班小生無限復活就有不滿咁話:「我想跟唔同嘅演員合作,來來去去都係嗰幾個男女主角,有啲悶!」點只有啲,係好很悶呀!

黎耀祥  7劇無限復活

《載得有情人》

《巾幗梟雄之諜血長天》

《風雲天地》

《無雙譜》

《商戰》

《梟雄》

《太監五虎》

將於下週一( 11日)出街的《載得有情人》已是去年 9月拍落,等足差唔多 1年先排到出街!梗係啦,原先播出個期,咪就係畀膠劇《西遊記》霸鬼咗囉!

祥仔除咗唔推劇,連大台畀咩造型佢都硬食,呢個 look大台話係想抄金秀賢喎,死未?

祥仔套新劇叫《梟雄》,之前又拍咗套叫《巾幗梟雄》,可能連佢自己都分唔到!

蕭正楠 儲 5套雙亞軍

《巾幗梟雄》

《風雲天地》

《師奶 Madam》

《商戰》

《太監五虎》

蕭正楠今年已經拍咗 4套劇未出街,年尾開嗰套《太監五虎》都唔會有期望,係拍《師奶 Madam》時溝掂咗黃翠如囉!《蘋果日報》圖片

黃浩然 佢都有 5劇

《大藥坊》

《無雙譜》

《陪着你走》

《商戰》

《張保仔》

同蕭正楠同級嘅仲有黃浩然,唔覺唔覺都有 5套儲埋,真係後備當主將用。

陳豪 密拍後上

今年生完仔兼正式續約大台,結果唔夠半年已經連拍兩套,下月仲有一套拍蔡少芬嘅新劇要開,又係嗰句,用到盡。

《陪着你走》

《水髮胭脂》

新劇未定名,女主角蔡少芬

陳展鵬 仲有 3套

陳展鵬上半年已經有 3套出咗街,估佢唔到除咗《天眼》同《大藥坊》,嚟緊仲有套《張保仔》,真係幾冧佢都死!

《大藥坊》

《天眼》

《張保仔》

說好的巨星?

大台缺人自己都知,所以晨早放晒風話要請有份量藝人回巢,可惜得個噏字,班巨星真係睬你都傻。

周潤發 吹水多

有傳志偉搵佢返娘家,發哥口話好想,但得個想字,唔會有行動!

劉德華 冇下文

志偉曾自爆華仔應承回巢仲準備緊劇本俾佢,不過講足兩年都唔成事!

梁家輝 受傷推

本來已答應回巢同林峯拍《使徒行者》,但因拍電影《盜馬記》時意外斷肋骨要推劇,角色變咗由三哥苗僑偉頂囉!



鍾意就快D Share啦!