何振然《體育世界》主持
苟姑娘最撐嘅巴西輸俾德國 7比 1，苟姑娘扁晒嘴，支持德國嘅何振然都唔敢開心！網上圖片
封面
借細佬過橋 陪仔操波 苟芸慧射中籃球波牛
苟芸慧自從攻佔郭富城失敗兼暴肥後，一代女神冇晒聲勢，好在一個世界盃，令苟姑娘再次憑熱情舉動俘虜眾生，個個睇波之前都要睇吓苟姑娘亂噏幾句先安樂！
查實苟芸慧俘虜嘅點只係市民，減肥成功兼在巴西回復電力嘅苟姑娘，更姣掂同行嘅大台《體育世界》主持何振然。兩人由巴西發展至回港撻着，上週四（上月 31日）苟姑娘仲搵埋細佬做掩護去探新歡練波。熱愛打籃球的何振然，終於被苟芸慧一輪搶攻下失守扯白旗投降，本週一（ 4日）本刊問多何振然兩句，佢已亂亂哋：「唔好問我啦，我唔回應」
界盃期間，網友一致以為 31歲苟芸慧勁冧另一主持潘文迪，又笑潘文迪似兵仔，原來苟芸慧收收埋埋暗自向另一主持、今年得 26歲的𡃁仔何振然埋手，潘文迪只是掩飾。
忍唔住捧場
上週四（上月 31日），同何振然發展地下關係的肥苟，忽然帶埋細佬 Ray去灣仔修頓室內場，睇何振然練波兼打氣，雖然肥苟話陪細佬去練波，但實情係，苟芸慧細佬 Ray從未同何振然所屬的球隊「 mediators」一齊打過，當日仲要係 mediators的固定練波日，雖然何振然在練波前一日同隊友事先張揚苟姑娘會出席，但女神帶埋細佬到場，始終格格不入，明顯陪細佬只屬掩飾，撐新仔才是目的。
當日熱情苟姑娘表現亦冇避忌，同何振然吹水之餘，再應酬埋其他隊員合照，努力攻入波牛陣地。
31/7苟弟掩護
帶埋細佬 Ray去睇何振然傳波，何喺 ig就話：「 Thanks for coming and supporting！」苟姑娘就話去幫細佬執波，一於轉移視線！
情侶波衫？
苟姑娘喺巴西度過 31歲生日，又喺當地收到一件法國波衫做禮物，冇耐何振然就自 up一張法國球衣，仲講話：「法國波衫真係好靚！」好鬼馬喎！
波牛變主持
今年 26歲的何振然， 2年前於珠海學院畢業後，便加入大台體育組，大學時代已是籃球明星的何振然，一向頗受女同學歡迎。雖然個個都知佢有固定女友，但聽佢隊友講近幾個月都冇見佢帶女友一齊練波，而何振然從巴西回港後仲連電話號碼都改埋，似乎有心將新戀情低調。
死貓兵仔潘文迪：「我有同老婆講！」
世界盃播緊嗰陣，個個以為苟姑娘最冧嘅係潘文迪，高登仔仲抵死到 cap晒圖開晒 po咁討論，仲有人話：「肥苟叫潘文迪跳樓佢都去！」勢估唔到苟姑娘原來另有目標，食咗個幾月死貓嘅潘文迪就同本刊話：「我都有睇啲網友留言，我有同老婆講，仲俾啲留言佢睇添，得啖笑囉！」但對於何振然同苟姑娘撻着，阿迪就好小心話：「返香港後我都冇同佢哋聯絡，真係唔知呀！」
女神苟姑娘連環帶波上籃， 26歲仔當然好難抗拒，對於獲女神苟芸慧眷顧，何振然週一（ 4日）接受電話訪問時就顯得有啲避忌兼混亂。
F：《 FACE》 何：何振然
F：點解苟姑娘會帶細佬去嘅？
何：打波啫，冇乜特別。
F：但係佢細佬未同你哋打過？
何：係呀，佢想打咪打吓囉！
F：苟姑娘冇落場喎！
何：我都以為佢會打！
F：你同苟姑娘拍拖？
何：唔……唔係呀……（諗咗好耐）唔好咁講啦，我哋冇嘢嘅！其實我有固定女友，苟姑娘都知㗎！
F：咁你有冇約苟姑娘去街？
何：唔想多講啦，唔好問我啦，唔回應
女朋友啫，城城之前都有個熊黛林㗎，乜你冇睇娛樂新聞咩？
打波真係搵到食！
打籃球真係搵到食㗎，你睇吓周柏豪、余文樂，幾多女食！
食家 余文樂
余文樂搞「橫洲工業」，承認過的女友有盧巧音和最近分手的吳雨霏，傳過緋聞的包括阿嬌、楊丞琳和做咗少奶奶的楊冪；仲有唔知真定假，爆出情慾短訊的𡃁模王璐瑤（ LuLu）。
埋身 周柏豪
同樣屬「橫洲工業」的周柏豪，有正印 I.T女友，又先後傳過有鍾浠文、吳雨霏和連詩雅等緋聞， 11年更爆出同何家淑女何超雲過從甚密，好多女埋身！
雜食 陳偉成
陳偉成（ Avis）同周秀娜 6年戀情最為人所知，分手後就傳過媽模 Mia、陳蕊蕊和黃榕，但他解釋大部份只是宣傳，他現任女友是𡃁模尹蓁晞（ Yumi），早前 Yumi跌貓落街， Avis仲幫手搵貓添。
亂溝 吳浩康
吳浩康唔算紅，但做得波友啲女亦走唔甩。最早期拍拖有胡定欣， 06年就溝咗莊思敏， 11年分手轉玩組合 Mplus成員 Hazel，最近先定性與同門鍾舒漫拍拖。
甲一黃曉明：好波自然多人睇
明星打波多女，而真係打波有一手嘅現役甲一球員，有球壇黃曉明之稱嘅蘇伊俊亦話：「我諗唔關男定女事，好波自然吸引到人睇」
|
鍾意就快D Share啦！
|
|
|
