'08
紐約 Fashion Institute of Technology畢業，做過 model，入娛圈 20年嘅唐文龍一直都 keep住大隻，原來唐文龍自小六已開始操肌，「小學 6年班去咗美國讀書，點知畀啲鬼仔恰，咪放學自己去體育室度練囉，後來就習慣咗做 gym。我又無特別戒口，因為本身唔食肥膩嘢，所以身型都叫做 keep到。」《蘋果日報》圖片
全知言
唐文龍講番《人生馬戲團》思琦妹畀人點錯相
「失蹤」藝人近年紛紛回歸復出，有啲話因為技癢，有啲為錢，不過大部份出番嚟都無令觀眾失望就真。講開回歸，曾幾何時唐文龍都算係電視台當紅小生，加上 keep住操肌，一直都有唔少 fans期待佢回歸。查實唐文龍入行 20年，電影、電視劇拍過唔少，原來佢 8年前離開咗香港北上發展，今年先回歸，全知言都搵佢傾咗幾句。 44歲唐文龍話：「入行拍電影係 94、 95年，咁就 20年。嗰時仲用緊菲林，每一下『格、格』聲嘅菲林聲就好似計時炸彈，好緊張㗎！嗰時心理壓力好大。」
99年以新人姿態加入大台，拍慣電影嘅唐文龍都用咗好長時間去適應。「拍劇時間好長，個人真係好攰。最記得喺番禺拍《人生馬戲團》，當時因為楊思琦生日去唱卡拉 OK，可能俾人點錯相，半夜 3點見到啲人又刀又棍咁衝埋嚟，雖然我中學短跑都係 3甲，但真係未試過着住拖鞋可以跑得咁快，我夠膽講係我人生跑得最快嘅一次，嗰個畫面真係拍都拍唔到出嚟！」
喺國內撈咗 8年，唐文龍話回歸唔係因為撈唔掂，只係掛住香港，「屋企人移民咗去美國，佢哋每次返香港我都喺大陸，見唔到面。返大台？如果劇本啱，我都會返，不過我想電影行先。」
|
鍾意就快D Share啦！
|
|
|
