8月 16日，馮寶寶接受記者訪問，提到童年往事及與兩個仔的關係時，她的情緒起伏甚大，動作多多。
滾熱辣
爆 16歲入精神病院 馮寶寶：細個俾老竇賣 依家俾阿仔賣
過了一段漫長隱世生活的馮寶寶，今年突然活躍娛圈，早前她除客串唱大戲，還自爆經歷第二段婚姻失敗。
上月馮寶寶接受本刊訪問，坦言離婚復出對她來說，是難能可貴的重生機會。她唞大啖氣說：「我一直喺度扮演緊馮寶寶，我決定要做番自己。」
回望過去六十年馮寶寶悲多過喜。曾兩度自殺的她，原來 16歲時住過精神病院，足足食了 18年抗抑鬱藥。父親馮峰是她抑鬱源頭，做童星時所賺的每一分毫，到頭來淪為老父賭枱上的籌碼。今日，她 33歲大仔招啟宗決心做導演，做人阿媽亦義無反顧為個仔頻撲。她笑說：「我細個俾老竇賣，依家俾阿仔賣。」上半生還完父親賭債，下半生她則戮力償還兒女債。
今年 60歲的馮寶寶，半生跌宕。現時單身的她，孑然一身，決定出自傳《馮寶寶與我》，以及籌拍一部關於女星悲涼史的電影，以阮玲玉和契媽林黛兩位自殺女星作為藍本外，亦包括自己的悲慘經歷。
馮峰輸晒片酬
回憶做童星時慘況，馮寶寶對着記者倒抽一口涼氣。「我 6歲嗰年已經拍咗 36部電影，好似一棵搖錢樹。」當時她片酬兩萬蚊，足夠買一個廣播道單位。可惜她父親馮峰不但未有把握置業時機，反而將女兒捱更抵夜賺回來的錢，賭錢輸清光。
辛苦錢一鋪清袋，就連馮寶寶唯一感受到的家庭幸福，原來也逐漸消失天與地。「父母嗰時離婚，為咗爭奪我嘅撫養權，唔單止鬧上法庭，仲當住好多記者面前講粗口鬧交。我冇童年㗎！冇家庭幸福㗎！連返學都冇機會。」幸而多得一位忠實影迷資助 5千蚊，令她在 16歲那年遠赴英國讀書。
以為脫苦海，但原來有個大浪正朝她撲來。「我生母搵到上門，話原來馮峰唔係我親生阿爸。」晴天霹靂，她亦被這個驚人消息嚇傻。「我幾日嚟唔食嘢，唔講嘢，最後被醫生確診為『暫時性精神崩潰』， 16歲就要入當地精神病院。」
前夫逼認黐線
別人笑馮寶寶太瘋癲，但不久她就找到白馬王子，與從事金融的招再強結婚，並火速生仔，但幸福生活僅僅維持一年。「佢契爺上門追債，話我前夫用 BB嘅名義問佢借咗幾百萬。欠債還錢好應份，即使係親戚都冇情講，但之後類似事件久唔久再發生。」
白馬王子背後，原來包裹住魔鬼的靈魂。馮寶寶忍無可忍，終於提出離婚。「兩個仔嘅撫養權歸佢所有，因為佢逼我喺協議書上面寫自己有精神病，我冇得揀。」招再強擸仔後，更帶他們到馬來西亞。為了見他們，馮寶寶可以去到好盡，拋低演藝事業，隻身飛去馬來西亞搵仔。「嗰時我乜都冇，寄住喺朋友屋企，差一步就喺廿二樓跳落去。」
與細仔關係疏離
馮寶寶大仔招啟宗，今年已經 33歲，醉心演藝事業； 31歲細仔招啟正則在北京任地產分析員。現時馮寶寶與大仔同住油塘私人樓，母子感情不錯。但正所謂「有立場便有代價」，當時馮寶寶認黐線痛失撫養權，搞到她和兩個仔的關係非常疏離。
「我同大仔感情好啲，大家會講吓笑，佢成日叫我唔好喺屋企講咁多嘢，話我上台講嘢有紋有路啲喎！當時我去馬來西亞搵仔，前夫就掟細仔返香港。有次我打電話俾細仔，埋怨佢唔搵我呢個阿媽，真係死咗佢都唔知。點知佢話：『唔會嘅！你死咗我會睇到報道㗎！』嗰一刻就知我哋關係好疏離。」
現職導演的大仔招啟宗現時身在泰國拍戲，馮寶寶為幫他上位，穿針引線搵惠英紅做電影女主角，自己亦友情價客串。「呢個世界係冇無條件嘅愛，哎！我細個俾老竇賣，大個俾仔賣」為咗個仔，阿媽真是仆心仆命。
大仔做導演
馮寶寶大仔招啟宗，今年已經 33歲，醉心演藝事業，現時身在泰國拍戲。據知他還未有拖拍。
老友少聚頭
馮寶寶一向俾人感覺情緒化，連昔日好友及親人都不是經常聯絡。
馮素波：唔好問我佢嘅嘢
平易近人的馮素波，與馮寶寶是姊妹，應該關係十分密切，但當被問到妹妹近況時，她居然劃清界線：「你千祈唔好問我有關佢嘅嘢！人哋嘅嘢我唔知，亦唔想講，我哋亦好耐冇見過面！」
薛家燕：佢太多嘢想做喇
與馮寶寶同為「七公主」的薛家燕，表示間中只在公開場合撞過馮寶寶。她透露寶寶份人好多理想：「我諗佢係太多嘢想做，又話想拍電影，又唔想個老公成日陪住佢周圍走，所以想有個交代（離婚）啫！」
|
鍾意就快D Share啦！
|
|
|
