余詠珊與老公何哲圖開設了一間製作公司，當中余詠珊佔大部分股權。
探熱針
瓜田李下 獻計裁員 節目外判 余詠珊擁製作公司佔大股
半年有七億利潤的無綫，日前突然向五十名幕後員工派大信封，冷血舉動連 buddy曾志偉都睇唔過眼，以行動響應上星期四（九月二十五日）舉行的「黑衣行動」，抗議大台裁員。
今次大台向綜藝科落刀，原來是殼王陳國強親信余詠珊獻計，之所以在自己話事的山頭放火，一來減少人手有助節省公司成本開支，但更重要是將來大條道理，將節目外判！
據資料顯示，余詠珊與老公何哲圖（原名何明仁）咁啱亦聯名擁有一間製作公司……
自保支持炒人
掌管大台綜藝科的余詠珊，上場後大台綜藝節目收視愈跌愈勁外，今年斥資四億買入世界盃播映權，但節目收視平均只有約六點，初步估計蝕近億元，重災區，余詠珊要急補鑊。
「啲高層嘈得好緊要，開會商量 cut budget， Sandy（余詠珊）就即刻舉手，主動話綜藝科可以削減人手，仲建議將啲節目外判俾出面製作公司做，咁做可以養少好多人，啲節目亦有可能會比自己製作有新鮮感。啲高層聽見話慳到錢就支持，立即放晒手叫 Sandy搞！」一名工作人員說。
余詠珊將節目外判，其實早有先例，例如旅遊節目《走過浮華大地》，主持洪永城、黃翠如是自己友外，負責製作的公司，同樣是她在有線合作過的班底。節目製作外判的做法將會愈來愈多。
不避嫌開製作公司
根據公司註冊處資料顯示，余詠珊與老公何哲圖（原名何明仁）在外擁有一間「威德製作有限公司」，當中余詠珊佔 9,999股份，而何哲圖只佔一股；以余詠珊是操控大台綜藝節目的話事人，背後卻有一間製作公司，瓜田李下，難免會令人覺得有利益衝突。
至於響應「黑衣行動」的曾志偉之所以高調反大台，除了認為無綫炒人不近人情，余詠珊也是導火線。
「 Sandy係志偉一手薦入公司，但佢話事之後，連志偉都唔俾面，加上今次炒人有針對性， Sandy掃走晒啲舊人，淨係留番自己啲愛將喺度，志偉同佢已經擘晒面，所以更加戥班舊人唔抵，一收到風話大炒人，志偉就吹雞叫晒六樓製作部啲同事食飯，睇吓有乜嘢可以幫到大家。」知情者說。
仇口多
余詠珊 12年回巢無綫後，因為持有殼王撐，橫行無忌，動作多多的她，不斷借改革招攬有線愛將過檔，甚至踩過界企圖插手藝人戲劇部，無論對外對內，均惹下不少火頭。
曾志偉
由 Stareast年代已合作的余詠珊與曾志偉，去年因為港姐大改革發生分歧，做了港姐司儀 21年的志偉，反對泳裝環節事先錄影，但余詠珊執意堅持，其後志偉監製劇集《女人俱樂部》，余詠珊不單意見多多，還要安插自己愛將入組，令志偉大感不滿。
曾勵珍
無綫斥巨資 4億購入今年的世界盃播映權後，余詠珊即向戲劇組高層曾勵珍入手，要對方放港姐陳凱琳和蔡思貝出場做世界盃節目，近日更變本加厲，想插手戲劇組製作侵佔山頭，被踩到上鼻的珍姐即時做嘢，全面封殺有線過檔藝人，打殘余詠珊的愛將。
|
鍾意就快D Share啦！
|
|
|
