掃呢頁CODE去手機

2014年10月2日 星期四

[FACE 384] 偽人撐警察 反佔中 陶傑扯火: X!要上位就專業少少 佔中,陶傑,政治時事,MF,




《蘋果日報》圖片

全知言

偽人撐警察 反佔中 陶傑扯火: X!要上位就專業少少

本週最痛話題,一定係佔中!

罷工、罷課,再衝出中環,去埋銅鑼灣、灣仔、旺角,無非都係想政府聽到市民嘅聲音,爭取真普選。

全民醒覺,藝人都有從唔同渠道表達自己嘅想法。從來都明確表態,熟悉政治與時事議題嘅才子陶傑都同全知言講:「佔中形勢好靚,全部係年輕人就香港未來發表睇法,呢啲睇法平時同梁振英,或者大陸講好似同牆講,今次咪大家出街講,對住空氣講,好過以前對住牆講吖!」

有是就有非,圈中確實仲有啲藝人盲目反佔中,所以連陶傑都睇唔過眼,逐個鬧:「×!佢呢啲藝人,後生想上位就專業少少」

週日( 28日)晚,警方為驅趕佔中市民,不惜持防暴長槍加發出過 87枚催淚彈,邊個先暴力?《蘋果日報》圖片

《蘋果日報》圖片

星星撐佔中

政治唔係咩高深學問,有良知就講得!警方以武力驅趕佔中市民後,唔少星都睇唔過眼撐到底!喂,討厭政治嘅王菀之呢?

陶傑

係咪佢喺台灣,唔知道香港發生咩事呀?做應該做的事,警察係咪應該放 5次催淚彈?警察應唔應該主動搶人啲傘?用噴霧噴人塊面呢?今次佔中出現暴力,就係警察做咗唔應該做嘅事囉!

×!佢呢啲後生想上位,就專業少少入世未深、讀書唔成,就專業少少自己拍戲、進修,好過咁早就有政治表態。唔好立亂加入(政黨),識乜嘢吖?

沈震軒

唔知係咪《使徒行者》仲播緊嘅關係,身在台灣拍劇嘅沈震軒, cap呢張圖放上 Instagram(佢係 cap咗《大藥坊》個奸仔圖㗎吓!),戇居居撐咗對市民使用暴力嘅警察。

網上圖片

羅家英

身為全國政協委員汪明荃老公嘅羅家英,週日( 28日)喺微搏話香港烏煙瘴氣,佔中係禍首。陶傑不就此評論,才子都識揀人嚟鬧㗎!

趙哲妤

身為中國小姐嘅趙哲妤 8月 17日現身,撐掃把頭葉劉做主席嘅新民黨,反對佔中,成功出位,但就被支持佔中人士鬧爆。

謝安琪

與周博賢合作無間嘅謝安琪,早前就派咗新歌〈雞蛋與高牆〉去支持班學生,而週日( 28日)佢亦喺個人 facebook度訴心聲,係圈中少數敢言女歌手。

卓韻芝

週日( 28日)晚,全知言聽聞唔少藝人都有上街佔中,不過有晒眼罩口罩防衞樣嘅,就只得敢言嘅卓韻芝。

葛民輝

葛民輝都忍唔住出聲,佢除咗帶咗代表夢嘅多拉 A夢上街之外,晚上仲 po埋一身防衞裝,睇嚟呢身裝束可以擋催淚彈,但應該擋唔住子彈喎。最正係鬧 689「理露媚」吖嘛!



鍾意就快D Share啦!