擔心樣
週日（ 28日）出席 Samsonite活動的金秀賢，一坐低已經唔係好坐得穩，之後一直心不在焉，笑容欠奉。
真面目
愛回家 怕佔中阻返歸 金秀賢變臉催住走
上週六（ 27曰）韓國兩大男神「都 Manager」金秀賢與 BIGBANG至靚仔成員 T.O.P（崔勝鉉）來港正面交鋒。 T.O.P瞓身谷新戲《千術之神》連跑幾間戲院四圍冧港女；金秀賢就分別出席代言的 Samsung手機及 Samsonite旅行袋活動，食兩家茶禮。
秀賢 Oppa於上週六（ 27日）出席三星活動時，明明心情勁靚，笑住口電粉絲；但翌日啟動佔中後，秀賢 Oppa卻變得憂心忡忡，出席 Samsonite活動時唧都唔笑不特只，更做手勢示意翻譯盡快講。當晚中區及灣仔一帶交通癱瘓，秀賢 Oppa人在異地沒心情是趕返歸啊！絕對可以理解嘅。
28/9 Samsonite Red記者會 7分鐘快閃
週日（ 28日）香港變天，中環至金鐘一帶被「佔中」市民佔領，警察唔只施放催淚彈驅散群眾，更實施封路，不少巴士停駛，私家車亦要改道，當晚金秀賢與廣告拍檔 Angelababy，孖住一齊出席 Samsonite香港記者會及粉絲見面會，但一早訂咗即晚凌晨機飛返韓國的都教授，可能受「佔中」影響心情，亦擔心交通受阻，怕趕不及上飛機返韓國，出席活動時全程冇心機，笑容欠奉。與女神 Angelababy唔只冇偈傾，連眼神接觸都慳番。
由於見完記者，金秀賢還要出席大會安排的粉絲見面會，歸心似箭的都教授亦開始焦急，當司儀問都教授何時開金口出唱片時，都教授就嫌身邊的翻譯譯得不夠快，做出打圈手勢催促對方盡快講。最後都教授訪問連影相只逗留 7分鐘便過隔籬會場同 fans見面，但亦只逗留 10分鐘便離開。
雖然中區主要道路被封鎖，但今次下榻灣仔君悅酒店的都教授，最後亦平安到達赤鱲角機場，搭凌晨機飛返韓國，教授即刻放下心頭大石，輕鬆跟 fans拜拜。
27/9 Samsung「 Do You Note金秀賢見面會」黃金 12分鐘
不過，早一日即上週六（ 27日），未發生「佔中」，都教授面口同態度完全唔同。雖然他當日有幾聲咳，身體有少少抱恙，但心情極靚，出席旺角舉行的 Samsung手機活動時，全程笑晒口，更不時施展迷暈電眼，電暈全場女粉絲。最冧當然係萬人迷賣口乖冧 fans：「我的生活離唔開手機同電子產品，因為我要時刻睇粉絲留言。」最後都教授留足 12分鐘，呢個「黃金 12分鐘」，全程「四萬」。
T.O.P擔擔抬抬
BIGBANG至靚仔 rapper T.O.P的新片《千術之神》將於今週四（ 2日）香港上畫，上週 T.O.P更專程由意大利飛來香港進行一連兩日的宣傳，期間走訪 3間戲院同粉絲會面，非常親民。
唔好睇 T.O.P平時成日一副 cool樣扮 model，查實 T.O.P不知幾玩得。週日（ 28日）於九龍灣出席記者會時，唔只口花花話如果《千術之神》票房好就會搵個香港女友，仲化身工作人員幫手搬枱。最 suprirse係 T.O.P自發擺騎呢甫士引記者笑，實在估佢唔到。
|
鍾意就快D Share啦！
|
|
|
