網頁

請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年12月11日 星期四

[壹週刊 - 1292] 14K大和解 14K,政治時事,M1,




爆壹爆

14K大和解

14K蕭華有意問鼎龍頭之位,前排和同門「鳩 dee」發生肢體衝突,江湖議論紛紛,蕭華為補鑊,四處同人呻,話《壹》仔隻封面差啲釀成江湖廝殺,搞到佢老人家冇覺好瞓。 Well,爆哥認為世界上冇永遠嘅敵人,好似上兩個禮拜,爆哥喺 14K「紅 van大王」豆腐榮嘅壽宴,見到蕭華成功破冰,即場握實鳩 dee隻手,任人影相,最攞命係二人當晚好似孖生兄弟咁出現,打扮到一模一樣,同樣頭戴禮帽,身穿黑白西裝,似有心夾定做 show。爆哥聽講蕭華一直想搵鳩 dee和解,但對方一直充耳不聞,其間經幫內一名老叔父調停,短短一個月內二人極速 friend番。鳩 dee係 14大圈話事人,佢唔反對,蕭華龍頭之位就坐得更穩。

港女煲點解咁好味?

早排《壹》仔揭港女到 Sogo喪搶名牌煲,在網絡瘋傳,當中一招「無水蒸魚」係熱話,更因魚味極濃成為不解之謎,個個都話要試整。其實呢個煲點解與眾不同呢,咁爆哥就搵理工大學機械工程學系盧覺強教授來解解。

盧教授好科學咁話︰「嗱,個鍋係用生鐵,以攝氏一千五百四十度以上高溫燒熔成液體,再倒模而成的器皿,所以叫鑄鐵鍋,好處係傳熱快。只要用少少水,好快就形成蒸氣傳到整個鍋內,蒸氣就可以蒸魚,琺瑯瓷亦可以保溫,可將溫度保持一段時間。」不過,盧教授就話有樣嘢要以正視聽︰「呢味菜唔應該叫無水蒸魚,應該叫微水蒸魚乜乜乜。」聽到爆哥一嚿雲,總之好味得啦。

盧教授好認真地又摸又磅,解構名牌煲好味之謎。

夜場大亨出火

自從旺角被佔領,爆哥聽到唔少夜總會同桑拿場拍晒烏蠅,佢哋怪佔領人士厚多士,阻住佢哋做生意喎。旺角清場嗰日,新興大廈一批商戶熱烈歡迎警隊清場,新興大廈出名多桑拿同夜總會,唔知佢哋係咪谷鬼氣,喺光明磊落嘅旺角遇見 MK仔,見面梗係打多兩鑊。曾任港九舞廳夜總會聯合總商會主席嘅蕭榮,就同幾個戴住口罩嘅商戶粗口橫飛,與佔旺者互掟雜物,當時木凳、木棍、安全帽亂咁飛,直至軍裝警察趕到,雙方先停手。蕭榮即場向爆哥表示,日日佔旺,搞到生意跌咗好多谷到成肚火,據聞蕭榮喺新興大廈坐擁幾間桑拿場。其實新興大廈啲夜場可以學吓同區啲麻雀館,搞搞新意思吸引客仔,例如 Bingo抽獎咁。而家市民晚晚落旺角「鳩嗚」,爆哥就建議桑拿夜場響應特首呼籲,但凡喺旺角鳩嗚嘅憤怒市民,保留收據,去夜場消費時,咪俾個折頭佢哋消消火,咁就一家便宜兩家着。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!



鍾意就快D Share啦!