5/12
離開萬邦行後，齊昕與母親行到對面馬路等車，齊昕一副殘樣挨在牆上，母親手指指對她說話，她都毫無反應。
探熱針
特首女梁齊昕自薦做 model
在英國倫敦政治經濟學院修讀法律學士，一度於社交網站公開「𠝹手」事件，指阿媽唐青儀要負上最大責任的特首梁振英女兒梁齊昕，幾個月前由英國返港，上星期五（十二月五日），兩母女現身中環診所林立的萬邦行，其間唐青儀不時用手拉扯女兒，齊昕雖然顯得不耐煩，但瞬間卻又表現得相當興奮。
與此同時，上星期有多間香港 model公司收到一封由 Chai Yan Leung發出的自薦 email，內附廿多張相片，全部是齊昕的生活照和自拍照，當中不乏三點式泳衣及低胸性感相。
阿媽教女
上星期五（五日）下午五時半，特首夫人唐青儀和女兒梁齊昕坐住掛上政府部門專用 AM車牌的 Audi房車到中環，在皇后大道中落車後，行去集不同專科名醫的萬邦行，母女上樓逗留了四十分鐘後離開。
等司機接，唔想招搖，兩母女於是瑟縮在附近大廈的走火通道後門等，其間齊昕整個身體挨住牆，情緒顯得低落且一臉倦容，只見唐青儀不時對住女兒手指指訓話，更一度用手捉實齊昕左手手臂。
阿媽教女，原本一直木無表情的齊昕，突然瞬間變臉，由無厘神氣變到開懷大笑。
堅拒違例
等了大約五分鐘，見車仲未到，唐青儀吩咐齊昕打電話搵司機，電話接通後，特首夫人親自同司機對話。由於附近一帶路面相當塞車，兩母女於是過馬路行去新世界大廈外會合司機。
司機違例將車停在雙黃線禁區位，當時附近有交通警，但警員並未有上前抄牌或趕車，反而特首夫人見到司機違法表現勞氣，堅持守法，要司機將車倒後，到非禁區位置讓她們上車。過程中，她一直不停口教訓司機。
誠意十足
無論教女兒或教訓司機，唐青儀都盡顯「嚴厲」，但齊昕卻有自己一套想法。
據知，上星期有多間 model公司分別收到一封由 Chai Yan Leung寄出的自薦郵件，內容除了提到 5呎 5吋半身高， 115磅體重， 34C上圍和 24吋腰資料外，還寫了一大段自我介紹。
「我冇任何做 model同 fashion嘅經驗，但係我極度有興趣這方面工作，對時裝亦充滿熱誠，睇好多時裝雜誌同 fashion blogs，亦留意好多世界各地的超模，我知道自己唔夠高行 catwalk，不過願意做其他廣告或者雜誌影相工作。我懂得英文、廣東話、國語，同埋法文、德文及西班牙文，我會好勤力工作，唔會計較每項工作嘅價錢。」
家人同意
Email內更附有二十多張相片，當中包括生活照、自拍照，更有兩張三點式泳衣照，以及一張低胸性感照，這批相有部分曾在齊昕的 facebook或 Instagram見過，亦有部分照片從未曝過光。
另外，本刊收到一段疑似齊昕與 model公司人員的對話錄音，錄音聲帶中齊昕表現得對 model工作十分有興趣。
「 TVC（電視廣告）有興趣，同埋 print ad.（平面廣告）都得㗎！總之任何機會都 OK。（你係咪特首梁生個女？）呀……係呀。（點解你會想做 model？） just part-time想試吓，啱啱讀完書乜嘢類型都想試吓，好 passionate，如果係我轉做 full time。（屋企會唔會反對？）佢哋都 OK嘅，我問過佢哋。」
本週二上午，本刊記者依照信內的電話打給齊昕，她接聽電話時承認是梁齊昕，但當問到有否 send過 email到 model公司，她表示唔方便講、冇評論、唔好意思。之後問她家人會否反對她做幕前，齊昕只講了一句：「所有嘢都 no comment！」然後匆匆收線。
但下午四點半齊昕先去中環再到尖沙咀，其間記者再致電給齊昕，目擊到她有接電話，證實該電話號碼是屬實，之後記者再當面問齊昕有關寫信自薦做 model一事，她有準備地回應：「冇寄過，有好多人鍾意冒充我個名，（咁有冇興趣入娛樂圈？）我讀法律㗎！」但聽番齊昕的聲音，與之前她疑似同 model公司職員對話相當啓合。
到英國讀法律，但廿三歲齊昕的夢想，可能同一般少女無異，希望扮靚做 model，不過唔知齊昕嘅母親知道後，會唔會又再倒抽一口涼氣？
頻惹是非
曾經在訪問中提過「絕不會把孩子送去外國」的 689梁振英，三名子女均在英國留學，其中二女梁齊昕在「外國勢力感染下」，為人分外敢言，有時甚至出言挑釁，同網民掀起罵戰。
2月底，《明報》前總編輯劉進圖遇襲， CY女公開評論事件與新聞自由無關，被網民「圍攻」。
6月底 CY女在 fb上載兩張手腕有兩條紅痕的自殘照，事後 689伉儷飛到英國，一家三口笑晒在公園影相淡化事件。但 CY女接受《信報》訪問時稱，自己「被操控下到海德公園，玩父親建議的『開心家庭』蹩腳公關伎倆」，踢爆是 689的主意，因為母親唐青儀「不會有這種腦筋」，同時亦表明「她在公眾眼中與私底下截然不同」。
7月底 CY女忽發偉論，明踩阿媽：「 Courage and loyalty are the virtues I value the most. My mother embodies the exact opposites of both.」（自己重視勇氣和忠誠這兩項美德，但我的母親卻體現了這兩種美德的對立面。）
8月中凌晨四時，先後留言「跳樓吧」、「死，驚什麼」，其後更轉載自殺的美國女詩人 Sylvia Plath名言。
9月忽然在社交網站賣廣告，為中、小學補習英文，單對單每小時三百元。有網民嫌貴，最後補習廣告亦刪走。
9月底警察出動催淚彈驅趕佔中市民，杜汶澤於 fb留言，指 689「要為今天負上沉重代價」， CY女留下惹火言論：「鍾意乜嘢都借機搏上位。」其後挑釁網民，「就算喺街見到我，諒你都唔敢一拳打我塊面或者吐我口水。」、「踏出中環，有嘢做，認得我有種過嚟打我吖笨。」
11月底， CY女再有尋死跡象，在 instagram貼圖「 May be Suicide is the answer」（自殺可能是答案），再留言：「 Maybe」，此外亦貼上多張負面英文名句，暗示心情欠佳。
|
鍾意就快D Share啦！
|
|
|